اسدؔ کو بت پرستی سے غرض درد آشنائی ہے

نہاں ہیں نالۂ ناقوس میں، در پردہ ’یا رب‘ ہا (۱۸۱۶
۰۰۰۰۰۰۰

قوافی ’رّب‘ و ’تب‘، ’مطلب‘، ردیف اک صوت، یعنی ہا
ؑعجب حلیہ ہے اس حلقوم مقطع کا
کہ ’یا رب‘ اِسم ِواحد ۔۔۔اور ’ہا‘ اس پر
(برائے ’جمع‘ کردن ریزہ ہائے عنفی و عطفی۰)۱

تعجب ہے کہ غالب سے بھی ایسا سہو ممکن ہے

چلیں ، اک عام قاری سا سمجھ کر خود سے ہی پوچھیں
کہ کیا ’’ربّ ہا ‘‘ غلط العام ہو گا یا کہ ’’یا ربّ ہا‘‘؟
کہ دونوں ہی غلط ہوں گے؟
اگر غالب نے اس کو بھی نہیں سمجھا تو حیرت ہے
بھلا اک عام قاری کیسےاس عقدے کو کھولے گا؟

چلیں چھوڑیں کہ ہم سب جانتے ہیں، اس زمانے میں ۔۔
روایت ہی نہیں تھیدونوں جانب ’واٗو‘ کے دو حرف یا ’’واوَین ‘‘لکھنا
لفظ یا ترکیب یا جملے کو قلعہ بند کرنے کی
چلیں چھوڑیں کہ ’’رب ہاـ‘‘ کو
فقط ’یک صوت ‘ ہی سمجھا گیا ہے ،یعنی ایک نعرہ
تو ’’یا ربّ ہا‘‘ کو بالّسان ہی سمجھیں

چلیں پیچھے؟

’اسدؔ کوبت پرستی سے غرض درد آشنائی ہے
یقیناًہے
مگر اک ’آشنائی‘ تک ہی رہتا یہ تعلق تو ۔۔۔
یقینا مان جاتے ہم
مگر اس پر اضافہ۔۔۔ ’درد‘ کا؟
درد آشنائی‘ ؟ اور بتوں سے؟
کون بہتر جانتا ہے ایک قاری سے
کہ سچ کیا ہے، دروغ ِ نا روا کیا ہے

غرض کو بھی ذرا دیکھیں
غرض ۔۔تخفیف ۔۔ ’’غرضیکہ‘‘ کی خاطر ہے یہاں ، شاید؟
چلیں، تسلیم۔۔۔
پر یہ لفظ در آیا ہے گویا بے سبب،بے معنی و مطلب
کہ اس سے پیشتر اک شائبہ تک بھی نہیں ملتا
کہ کوئی بحث جاری تھی اسدؔ کے بت پرستی سے تعلق کی
کہ ’غرضیکہ‘ کے لیے شاعر کو تکیے کی ضرورت ہو
غرضکی کیا غرض تھی یاں؟
کہو، ’بھرتی‘ کہیں اس کو؟
کہ یہ فاضل تو لگتا ہے کسی آگاہ قاری کو

غلط ہے ’’نالہ ٔ ناقوس‘‘ غالب، ٓآپ کو یہ کیسے سمجھاؤں
کہ اک ناقوس(یا اک ’شنکھ) کی آواز ہوتی ہے
بلانے کے لیے بھگتوں کو مندر میں
خوشی ہےاس میں۔۔
کوئی رونا دھونا نالہ کش ہونا نہیں مطلوب اس
ناقوس کی آواز سے ۔۔۔ یعنی
لڑائی میں سپاہی اک اسی آواز کو سن کر
ہی دھاوا بولتے تھے اپنے دشمن پر
پجاری بت کدے کا بھی وہی پیغام دیتا ہے
(پرستش کرنے والوں کو)
کہ آوٗ، وقت ہے اب آرتی کا اِس شوالے میں
یہی مُلّا کا فرض ِ اوّلیں ہے اُس کی مسجد میں ۔۔۔۔
نماز ِ با جماعت کا بلاوا ، یااذاں آہنگ ِ شیریں میں
تو گویا ’نالۂ ناقوس‘ میں’ نالہ‘
فقط اک غیر طلبیدہ اضافہ ہے

نہاں ہیں نالہ ٔ ناقوس میں در پردہ ’ یا ربّ ہا‘
چلیں، ’یا ربّ‘ سے ’ہا‘ کو تسمہ پا کرنے پہ لے دے ہو چکی۔۔۔۔
اب مدعا اس شعر کا دیکھیں!

بہت ہیں بت پرستی کے حوالے غالب دیندار میں، لیکن
بلاغت اور طلاقت کا یہ اک نادر نمونہ ،بے بدل مصرع
یقیناً سب پہ حاوی ہے

نہاں ہیں نالہ ٔ ناقوس میں در پردہ ۔۔۔۔‘‘ کیا؟ دیکھیں
ذرا سمجھیں
وہی آواز، لا اللہ ال اللہ ۔۔
یقیناً جو اذانوں کی صدا بھی ہے
ہزاروں پردہ ٔ ہائے صوت میں مخفی، مگر ظاہر
وہی آواز ’’اللہ ایک ہے‘‘، دُوجا نہیں کوئی