اسلام آباد:وزیراعظم عمران خان کو نوبل امن انعام دینے کیلئے قومی اسمبلی میں قرارداد جمع کرا دی گئی۔
تفصیلات کے مطابق، جمعرات کو وزیراعظم کو نوبل انعام دینے کیلئے قرارداد تحریک انصاف کے رہنماء اوروفاقی وزیراطلاعات فواد چوہدری کی جانب سے قومی اسمبلی سیکریٹریت میں جمع کرائی گئی۔
قرارداد کے متن میں کہا گیا کہ وزیر اعظم عمران خان نے پاک بھارت کشیدگی کم کرنے کیلئے انتہائی دانشمندانہ کردار ادا کیا، بھارتی قیادت کا جنگی جنون دونوں ممالک کے درمیان تناؤ کا سبب بنا۔
قرارداد میں مزید کہا گیا کہ بھارتی قیادت کا اظہارِ جارحیت دونوں ایٹمی ریاستوں کو جنگ کے دہانے پر لے آیا، بھارت کے جنگجو یانہ رویئےسے سرحد کے دونوں طرف بسنے والے کروڑوں لوگوں کی زندگیوں کو خطرہ تھا۔
قرارداد میں کہا گیا کہ عمران خان نے فعال کردار ادا کرتے ہوئے مہارت کے ساتھ اس صورتحال کو امن کی جانب موڑ دیا، امن کیلئے خدمات پر وزیراعظم عمران خان کو نوبل امن انعام دیا جائے۔
Facebook Comments
بذریعہ فیس بک تبصرہ تحریر کریں