وزارت انفارمیشن ٹکنالوجی (آئی ٹی) نے ریکارڈ مدت میں موبائل ایپ بنا کر حج آپریشن کو ڈیجیٹلائزڈ کر دیا۔

نگراں وزیر آئی ٹی عمر سیف اور وزیر مذہبی امور انیق احمد نے ایپ کا اجرا کیا۔ قومی آئی ٹی بورڈ کی موبائل ایپ سے عازمین کیلیے تمام معلومات فنگر ٹپ پر ہوں گی۔

عمر سیف نے بتایا کہ ایس آئی ایف سی کی ہدایت پر ڈیجیٹلائزیشن کا عمل تیز کر دیا گیا، عازمین حج کیلیے پاک حج ایپلی کیشن کا اجرا اسی سلسلے کا اہم سنگ میل ہے۔

انہوں نے کہا کہ عازمین کی درخواست، مناسک کی ادائیگی اور واپسی تک معلومات ایپ میں شامل ہے، حج گروپ معلومات، تربیتی شیڈول اور سعودی عرب میں رہائشی معاملات بھی شامل ہیں، عازمین رقم کی ادائیگی، دوران حج مقامات کے لائیو نقشے اور لوکیشن سے مستفید ہوں گے۔

ادھر، نگراں وزیر مذہبی امور انیق احمد نے بتایا کہ وزارت آئی ٹی اور ماتحت ادارے این آئی ٹی بی کی کاوشیں لائق تحسین ہیں، حج آپریشنز سے متعلق نظام اپ گریڈیشن میں یہ ایپ اہم قدم ہے۔