کل ایک آرٹیکل آئمہ کرام کو سرکاری تنخواہیں دینے سے دین کی سماجی حثیت کیا ہوگی ؟۔مکالمہ پر شائع ہوا۔مجھے صاحب مضمون سے کامل اختلاف ہے۔مضمون نگار نے مختلف النوع مفروضوں کی بنیاد پر اس فیصلے پر تنقید باندھی ۔اور اس فیصلے کو دین کی سماجی حیثیت پر قدغن لگانے کی گہری سازش قرار دیا۔صاحب مضمون پر دلیل کی بنیاد پر واضح کرنا چاہوں گا کہ محترم آئمہ کرام کو سرکاری تنخواہ کی ادائیگی سے دین کی سماجی حیثیت کو کوئی خطرہ لاحق نہیں ۔مضمون نگار نے باور کرایا کہ آئمہ کرام کو سرکاری تنخواہ کی ادائیگی کے ذریعے حکومت کے پس پردہ عزائم میں مساجد کو ریاستی نظم کے تابع کر کے آزادانہ دینی خدمات پر قدغن لگانا اور سیاسی مفادات کا حصول ہے ۔

پاکستان کے حالات  پر ایک نظر ڈالی جائے تو معلوم ہوتا ہے ،کہ پاکستان دہشت گردی کا عشروں سے شکار ہے۔فرقہ واریت انتہا پسندی عدم برداشت پورے معاشرے میں سرایت کر چکی ہے۔جس کی قیمت معصوم  اور بے گناہ عوام دہائیوں سے چکا رہی ہے۔مذہب کا استعمال فلاح کی بجائے تخریب  کے لیے کیا جا  رہا ہے ۔دہشتگردی نے معاشرے میں تباہی کا رقص جاری رکھا اور مذہبی قیادت اس قدر آزاد رہی کہ کھل کر انسانیت دشمنوں کے خلاف قوم کو یکسو  کرنے کی بجائے خونی درندوں  کے حق میں  تاویلیں پیش کر کے گمراہ کرتی رہی۔پھر اس ملک میں معصوم نو نہالوں  کے خون سے ہولی کھیلی گئی۔آرمی پبلک سکول میں  قیامت سے پہلے قیامت پربا  کی گئی ۔ہر  آنکھ اشکبار  ہر دل خون کے آنسو رو رہا تھا۔تب ریاست نے بھی سنجیدگی سے اس عفریت کو ختم کرنے کی ٹھانی ۔

سرکار نے دہشتگردی کا قلع قمع کرنے کے لیے مشکل فیصلے کیے ۔مساجد کو ہمارے معاشرے میں ریاست کی جانب سے آج تلک کسی بھی قسم کی مداخلت کا سامنا ہر گز نہیں  رہا۔سوائے لاوڈ سپیکر پر پابندی جیسے حکم ناموں کے ۔ سرکار نے مساجد کے متعلق کبھی سنجیدگی سے مسائل کو سمجھنے کی کوشش ہی نہیں  کی ۔مساجد میں آئمہ کرام شدید معاشی مشکلات کا شکار ہیں ۔اور غربت ذرہ علاقوں میں  تو محض دو وقت کے کھانے پر بھی اپنے فرائض انجام دینے پر مجبور ہیں ۔آئمہ کرام بھی ہم جیسے انسان ہیں ان کی بھی ضرویات زندگی ہیں ۔آئمہ کرام کے بچے بھی کھلونے مانگتے ہیں ۔آئمہ کرام کے بچے بھی اچھے سکول میں  پڑھنے کی خواہشات رکھتے ہیں ۔مگر امام مسجد بیچارہ اپنے بچوں کی معصوم خواہشات کا گلا  گھونٹے پر مجبور ہے ۔ملک میں  قائم مساجد میں 10 ہزار سے 15 ہزار تک آئمہ کرام کو معاوضہ دیا جاتا ہے ۔بعض مساجد میں  تو محض پانچ ہزار تک ۔دین کے نام پر سیاست کرنے والی جماعتیں اور ان کی قیادت خود تو ڈبل کیبن اور پراڈو گاڑیوں میں محافظوں کے نرغے میں  انتہائی پر تعیش زندگی گزارتے ہیں ۔مگر آج تک وفاق المدارس یا کسی دینی جماعت کی قیادت نے  غربت کی چکی میں پستے آئمہ کرام کی تکلیف کو محسوس نہیں کیا۔آئمہ کرام نے سرکار کے اس فیصلے کا خیر مقدم کیا۔غربت ایک ایسی بلا ہے جو انسان کو کفر تک پہنچا دیتی ہے۔غربت اور لاچاری  کا شکار انسان جس کے دل و دماغ میں  بھوک اور معاشی بدحالی جیسے خیالات ہمہ وقت کلبلاتے  ہیں ۔ایسا شحض  کامل یکسوئی اور دل جمعی  کے ساتھ کون سی دینی خدمت سر انجام دینے کی پوزیشن میں  ہوتا ہے ۔آئمہ کرام کی معاشی مجبوریوں کا فائدہ مسجد کمیٹیوں کے کرتا دھرتا بھی اٹھاتے ہیں۔ایسے میں  ملک دشمن عناصر سے آئمہ کرام کی مجبوریوں کا فائدہ اٹھانا  کون سا مشکل کام ہے ۔لہٰذا آئمہ کرام کو سرکاری تنخواہ کی ادائیگی سے فکر معاش  سے نجات ملے گی ۔نظم و ضبط کسی بھی ریاست  کے استحکام کے لیے بنیادی ضرورت ہے ۔ریاستی نظم کے تابع ہو کر مساجد پر کوئی دینی  قدغن نہیں  لگے گی ۔ہر مسجد میں پانچ وقت اذان ہو گی نماز کی ادائیگی ہوگی ۔البتہ  مساجد میں فرقہ واریت مذہبی منافرت انتہا پسندی اور عدم برداشت پیدا کرنے والے عناصر کو اپنا کھیل کھیلنے کا موقعہ  نہیں  ملے گا۔اور آئمہ کرام کو سیاسی مقاصد کے لیے تو خود دینی جماعتوں کی  قیادت استعمال کر رہی ہے ۔ریاست تو ماں جیسی ہوتی ہے ۔یقینی طور پر آئمہ کرام کو مذہبی رہنماؤں کے استحصال سے محفوظ کر ے گی۔آئمہ کرام کو معاشی فکر سے آزاد کرنے کا یہ فیصلہ استحکام پاکستان کی بنیاد بنے گا۔مساجد اللہ کا گھر ہیں  آئمہ کرام کو نفرت اور تفرقہ پھیلانے کے لیے استعمال نہیں کیا جا سکے گا۔امام مسجد کو بھی احساس ہو گا کہ سرکار مجھے تنخواہ ادا کرتی ہے ۔میری ضروریات زندگی آسانی سے پوری ہونے لگی ہیں ۔لہٰذا آئمہ کرام کو اپنے غلط نظریات اور مقاصد کے حصول کے لیے استعمال کرنے والے عناصر کی بیخ  کنی ہو گی ۔آئینی طور پر یہ نامناسب طرزعمل  ہر گز نہیں ۔پاکستان کے آئین میں  اقتدار اعلیٰ کی مالک اللہ تعالی  کی ذات  ہے ۔پاکستان کے آئین میں واضح تحریر ہے کہ اقتدار اللہ تعالیٰ کی امانت ہے ۔اور پاکستان کی حکومت عوام کو اسلام کے اصولوں کے مطابق زندگی بسر کرنے کے لیے ہر قسم کی سہولت فراہم کرنے کی پابند ہے ۔مساجد میں اللہ تعالیٰ کی عبادت ہوتی ہے۔مساجد کا انتظام و انصرام تو آئین  پاکستان کی رو  سے حکومت پر فرض ہے۔آئمہ کرام کو تنخواہ کی ادائیگی کس بنیاد پر آئین کے متصادم  ہے۔مضمون نگار نے ایک اور مفروضہ بھی بیان کیا کہ شرعی اور اخلاقی طور پر بھی سرکار کا آئمہ کرام کو معاوضہ ادا کرنے کا فیصلہ غلط ہے۔عجیب حیرت کی بات کی ہے صاحب مضمون نے۔آئمہ کرام باقاعدگی سے ہر قسم کی موسمیاتی سختیوں کے باوجود پانچ وقت مقررہ اوقات کے مطابق اپنی ذمہ داری ادا کرتے ہیں ۔اپنے فرض کی ادائیگی کا معاوضہ غیر اخلاقی کس بنیاد پر ہو سکتا ہے۔بجائے  آئمہ کرام کو تنخواہ کی ادائیگی کے لیے چندہ جمع کرنا ۔نمازی حضرات کے آگے جھولی پھیلانا لاؤڈ سپیکر پر لوگوں سے چندے کی بھیک مانگنا تو غیر اخلاقی اور غیر شرعی امر ہو سکتا ہے ۔مگر عزت نفس کو مجروح کیے بغیر ہر مہینے تنخواہ وصول کرنا کس بنیاد پر غیر اخلاقی ہے ۔۔۔

پھر صاحب مضمون نے ایک اور مفروضہ اپنے آرٹیکل میں پیش کیا ۔کہ اکابرین نے فرنگی استبداد کے دوران آزادانہ دینی خدمات کے لیے ہمیشہ حکومت سے دور رہ کر مساجد کا انتظام و انصرام کیا۔اور ہمیشہ حکومت کو دینی معاملات سے دور رکھا ۔اور اب بھی ہم سرکار کو مساجد اور آئمہ کرام کو ریاستی نظم کے اندر نہیں آنے دیں گے۔تو محترم آپ کی اطلاع کے لیے عرض ہے پاکستان فرنگی استبداد سے ستر سال پہلے آزادی حاصل کر چکا ہے۔اب پاکستان ایک اسلامی جمہوریہ ہے ۔اب اس ملک پر مسلمانوں کی حکومت ہے۔اور ریاست اگر آئمہ کرام اور مساجد کو ریاستی نظم میں لانا چاہتی ہے تو اس میں  کوئی مضائقہ نہیں ہے۔پاکستان میں آزادانہ دینی خدمات پر کوئی قدغن موجود نہیں ۔اللہ تعالیٰ کا شکر ہے پانچ وقت نماز کی ادائیگی جمعہ کے اجتماعات محافل میلاد سیرت النبی کے جلسے جلوس سب ہوتے ہیں ۔اور مستقبل میں بھی جاری رہیں گے ۔تنخواہ کی ادائیگی سے سرکار آئمہ کرام کو نماز کی امامت سے نہیں روک دے گی۔بالکل چنتا نہ کریں اس ضمن میں ۔

Advertisements

جس قسم کی آزادانہ دینی خدمات پاکستان میں آئمہ کرام کا استحصال کر کے لی جا رہی ہیں ۔اس کی ایک بھی مثال کسی دوسرے اسلامی میں  موجود نہیں ۔سعودی عرب میں تمام مساجد کے آئمہ کرام اور خطیب حکومت مقرر کرتی ہے۔خطبات حکومتی اداروں کی چھان پھٹک  کے بعد خطیب کو تحریر کی صورت میں حکومت فراہم کرتی ہے ۔اور ان اقدامات کے ثمرات سے سعودی عرب کی عوام کے ساتھ ساتھ غیر ملکی مقیم افراد بھی مستفید ہو رہے ہیں۔سعودی معاشرے میں انتہاپسندی کا نام و نشان نہیں مساجد میں نماز کی ادائیگی پر فوکس ہے ۔شیعہ سنی رفع یدین اور رفع یدین کے بغیر اپنے مسلک کے مطابق مسجد میں عبادت کی جاتی ہے ۔اور کوئی کفر کے فتوے نہیں لگاتا۔پاکستان کے مذہبی رہنما  ویسے تو ہر جگہ سعودی عرب کی وکالت کرتے ہیں۔مگر اس ضمن میں ان کی زبان کو تالا کیوں لگ جاتا ہے۔یہ تضاد کیوں؟ راقم سعودی عرب میں سات سال سے مقیم ہے ۔مساجد کا مکمل انتظام و انصرام سرکار کے کنٹرول میں ہے۔ایک اور عجیب منطق مضمون نگار نے پیش کی کہ آرمی سکول کالجز میں عربی ٹیچر کو دینی خدمات کی ادائیگی میں مشکلات کا سامنا ہے ۔جبکہ موصوف کی یہ بات بھی زمینی حقائق کے یکسر خلاف ہے۔پاک فوج اور محکمہ اوقاف کے زیرانتظام مساجد کے آئمہ کرام مکمل آزادی کے ساتھ دینی خدمات سر انجام دے رہیں ہیں ۔سکول کالجز میں تعینات اسلامیات اور عربی اساتذہ کو بھی دینی خدمات پر کوئی قدغن موجود نہیں ۔البتہ سرکاری آئمہ کرام پر چند پابندیاں ہیں ،کہ وہ فرقہ واریت ۔انتہا پسند اور بات بات پر قتل کے فتوے لگانے میں  آزاد نہیں ۔نفرت کے بیوپاری نہیں بن سکتے۔معاشرے میں انتشار اور نفاق پیدا کرنے میں آزاد نہیں ۔دین کی خدمت اسلام کی تعلیمات پر عمل پیرا اور تبلیغ دین  کی مکمل آزادی انہیں میسر ہے۔ سرکار کا آئمہ کرام کو سرکاری تنخواہ کی ادائیگی کا فیصلہ استحکام پاکستان کی جانب پہلا قدم ہے اس کی بے جا مخالفت صرف ذاتی مفادات کے لیے کی جارہی ہے۔دینی طبقے  کی اشرافیہ ہمیشہ کی طرح اپنے سیاسی اور معاشی مفادات کے حصول کے لیے آئمہ کرام کو ورغلانے میں  مصروف ہے۔میرا مقصد مضمون نگار کی دل آزاری  نہیں مگر درست اقدام کی بے جا مخالفت کو روکنے کی ایک عاجزانہ کوشش ہے۔