نجانے کتنے برسوں سے آگ برسا رہا تھا ۔ لو کے تھپیڑے اور چلچلاتی گرم دوپہروں نے ہر سانس لینے والے حشرات کا جینا دوبھر کر رکھا تھا ۔ ایک پراسرار سی خاموشی اطراف میں چھا ئی ہوئی تھی۔ پہاڑ جیسے اونچے، لمبے، گرم اورخشک دن کاٹے نہ کٹتے تھے۔ چاروں طرف ہو کا عالم تھا۔
اس کے تخیل کی پرواز اسے یہاں سے نکالنا چاہتی تھی لیکن وہ بری طرح اس گرداب میں پھنس چکا تھا۔۔
وہ ایسے لوگوں میں رہتا تھا۔ جن کی شکل سے اب کراہیت برستی تھی خود اس کی اپنی شکل بھی وقت کے خوفناک تھپیڑوں میں کھو چکی تھی ۔ جوانی کے حسین خدو خال اور نقوش ماند پڑ چکے تھے اور ان کی جگہ مشقت کی جھریوں نے لے لی تھی۔ حالات نے اسے ایک تکونی ٹیلے کی نوک پر کھڑا کردیا تھا۔ جس کے نیچے گہری کھائی تھی واپسی کے سبھی راستے بند ہو چکے تھے۔۔ وہ بری طرح ہوس کی دلدل میں پھنس چکا تھا۔ اس جیسے بہت سے مجبور بھی اسی دلدل میں آدھے اندر دھنسے ہوئے تھے۔ ان سب کے نچلے دھڑ کو کسی مقناطیسی کشش نے اپنے حصار میں جکڑ رکھا تھا۔
اس کی سوچ کی نازک تتلی پرواز کے لئے شعور کے اندھیرے دریچوں میں بھٹک رہی تھی اور روشنی کی متلاشی تھی۔
یہ اور اس کے سبھی ساتھی اسی چلچلاتی دھوپ میں شکار کی تلاش کو نکلتے تھے۔انکا ذریعہ معاش شکار سے منسلک تھا۔۔ ان کے وجود اس کالی مکھی کی مانند ہو چکے تھے ۔جو تلاش کرکے صرف گند پر بیٹھنے کو ترجیح دیتی ہے ۔ان سب کے دلوں پر سیاہ دھبے پڑ چکے تھے ۔جیسے کسی نے دلوں پر قفل لگا دیے ہوں۔ سفاکیت عروج پر تھی ۔ وہ حلال و حرام کی تمیز تک بھول چکے تھے۔ اس لئے جو بھی شکاران کے ہاتھ لگتا وہ اسے چیڑ پھاڑ کر صرف اپنا مقصد حا صل کرتے تھے۔ ان کو اس سے غرض نہیں تھی کہ شکار کیا ہے۔ کیسا ہے، کون ہے؟
ان کا مقصد تو صرف شکار کرنا اور اس کے جسم کو بھنبھوڑنا یا چیر پھاڑ کرنا تھا۔ کبھی کبھی ایسا شکار بھی ہاتھ لگ جاتا تھا۔ جسے بھنبھوڑنے کے ساتھ ساتھ اس سے لذت بھی حاصل کی جاتی تھی۔۔

شہر کے وسط میں ایک چار دیواری تھی۔ جس کی دیواروں سے بھی وحشت برستی تھی۔ یہ لوگ اپنا شکار اسی وحشت زدہ چار دیواری میں لے جاتے تھے۔ پھر اسے ننگے، گندے فرش پر پرانی دری کی طرح بچھا دیتے تھے۔ ان میں سے کچھ لوگ دوسرے شہروں میں جاکر بھی شکار کے مختلف اعضا کو بیچنے پر مامور تھے۔ اس کام سے جو رقم حاصل ہوتی ا سے وہ آپس میں تقسیم کر لیتے تھے۔
وہ سب کے سب مردہ ضمیر اور مردار خور ہو چکے تھے ۔ ان کو مردار کھانے کی لت پڑ چکی تھی اور انکی نہ ختم ہونے والی بھوک صرف یہی مردار مٹایا کرتے تھے جن میں کتے ، بلیاں ،گدھے اورگھوڑے اور انسان بھی شامل تھے۔گوشت کے علاوہ اب وہ کسی دوسرے ذائقے سے نا آشنا تھے۔۔
جب انہیں زندہ شکار میسر نہ آتا تو وہ مردار کی تلاش میں قبروں کا رخ بھی کرتے تھے۔ دن کے اجالے ہوں یا رات کے اندھیرے۔ ان کے کالے دھندوں کا بیوپار عروج پر تھا اور ان کو روکنے والا بھی کوئی نہیں تھا۔

کبھی کوئی بھولا بھٹکا اندھوں کی نگری میں آئینہ بیچنے آجاتا تو اسے، اسی کے آئینے کی کرچیوں سے لہو لہان کر دیا جاتا تھا یا اپنے جیسا مردار خور بنا دیا جاتا تھا۔
شہر میں ہرغریب اور مظلوم کا چہرہ دہشت زدہ ہو چکا تھا کیونکہ ان کودیکھنے اور سننے والے سبھی دانشوران اب دونوں نعمتوں سے محروم ہو چکے تھے اور ان کی سوچ کی لکڑی کو دیمک چاٹ چکی تھی۔ شہر کے اکثر صاحب حیثیت کا حال بھی کچھ ایسا ہی تھا۔
عیاشیوں کی کھنک نے انہیں مدہوش کر رکھا تھا۔ ان میں سے اکثر اپنی اپنی ہڈی کے منتظر رہتے تھے ۔ اس لئے یہ بیو پاری ان کو ہڈی ڈال دیتے پھر کوئی ان کے خلاف آواز نہ اٹھاتا تھا۔۔ یہی وجہ تھی ان کا بیوپار زوروں پر تھا۔ مال کی فراوانی کے باوجود بھی اسے سکون کیوں نہیں تھا؟

اکثر اس کے تخیل کی پرواز اسے ضمیر کی وادی میں لے جاتی تھی۔ جہاں کوئی اسے چیخ چیخ کر یہ باور کروانے کی کوشش کرتا تھا کہ
پرواز ہے دونوں کی اسی ایک فضا میں
کرگس کا جہاں اور ہے شاہیں کا جہاں اور
کوئی اسے جھنجوڑتا، بے تاب کرتا اور پھراسی وادی میں کہیں غائب ہو جاتا تھا ۔