• صفحہ اول
  • /
  • نگارشات
  • /
  • اقبال کے مصور پاکستان ہونے کی اصل حقیقت کیا ہے۔۔ ارشد بٹ ایڈووکیٹ

اقبال کے مصور پاکستان ہونے کی اصل حقیقت کیا ہے۔۔ ارشد بٹ ایڈووکیٹ

یہ عمومی طور پرتسلیم کا جاتا ہے کہ علامہ اقبال تصورپاکستان کے خالق تھے جبکہ 1930 کو مسلم لیگ کے سالانہ اجلاس میں علامہ اقبال کے صدارتی خطاب کو اسکی بنیاد کہا جاتا ہے۔ کیاعلامہ اقبال کے اس خطاب سے قبل کسی مفکر، دانشور یا سیاستدان  نے ایسے موضوع پر کچھ لکھا یا کہا تھا یا کہ برصغیرکی تاریخ میں اقبال ہی پہلے مفکر یا سیاستدان تھے جنہوں نے متحدہ ہندوستان میں مسلم ہندو مسئلے کا ایسا حل تجویز کیا تھا جس نے آگے چل کرتحریک پاکستان کو نظریاتی بنیاد فراہم کی۔ کیا قائد اعظم نے تحریک پاکستان کے دوران یا پاکستان کے معرض وجود میں آنے کے بعد کہیں تسلیم کیا ہو یا یہ تذکرہ کرنا مناسب سمجھا ہو کہ تحریک پاکستان کی سیاسی اور نظریاتی راہنمائی کی بنیاد علامہ اقبال کا یہ خطبہ تھا۔ قائد اعظم کی زندگی میں منعقد ھونے والے مسلم لیگ کے کسی اجلاس میں کسی تقریر، تحریر یا قرارداد سے یہ اظہارہوتا ہو جس میں علامہ اقبال کو تصور پاکستان کا خالق مانا گیا ہو اوراس سلسلہ میں ان کی بے مثال خدمات پر خراج تحسین پیش کیا گیا ہو۔

اس مضمون میں ان سوالات کا تاریخی حقائق اور دستاویزات کے حوالے سے جائزہ لینے کی کوشش کی گئی ہے۔ اس مضمون میں دیے  گئے حوالہ جات مستند کتابوں سے لئے گئے ہیں اور ان کو بغیر کسی ردوبدل کے پیش گیا ہے۔

اصل موضوع پر آنے سے قبل علامہ اقبال کی سیاسی زندگی کا مختصر جائزہ لینا بھی ضروری ہے۔

ڈاکٹر جاوید اقبال “زندہ رود” میں لکھتے ہیں کہ علامہ اقبال نے 1926 سے پیشتر عملی سیاست میں حصہ نہ لیا تھا۔ ڈاکٹر جاوید اقبال کے مطابق 1926 کی پنجاب کونسل کے انتخاب میں کامیابی کے بعد اقبال نے سر فضل حسین کی قائم کردہ یونینسٹ پارٹی کی رکنیت اختیار کر لی تھی اور اقبال 1927 سے 1930 تک پنجاب کی قانون ساز کونسل کے رکن رہے۔ یہ تین سال انہوں نے یونینسٹ پارٹی کے اندر رہ کر اس جماعت کے طریقہ کار کو بغور دیکھا۔۔۔۔۔۔ عملی سیاست میں قدم رکھنے کے سبب وہ اسی سال پنجاب صوبائی مسلم لیگ کے سیکریٹری بن گئے۔

ہندوستان میں دستوری اصلاحات کے لئےحکومت برطانیہ نے نومبر 1927 کو سائمن کمشن کا اعلان کیا جس کے تمام اراکین انگریز تھے۔ جناح اور دیگر سیاسی راہنماوں نے کمشن کی تشکیل پراعتراض کیا کیونکہ سائمن کمشن میں کسی ہندوستانی کو شامل نہ کیا گیا تھا۔ جناح اور دیگرراہنماؤں نے بعد ازاں سائمن کمشن کے بائیکاٹ کا اعلان کر دیا۔

ا س وقت پنجاب مسلم لیگ کے صدرسرشفیع اور سیکریڑی علامہ اقبال تھے جو سائمن کمشن سے تعاون کرنے کے حامی تھے۔ جس بنا پر انہوں نے جناح سے راستے جدا کرکےعلیحدہ مسلم لیگ کا اعلان کر دیا تھا۔ دسمبر 1927 کو مسلم لیگ دو حصوں میں بٹ گئی۔ ایک جناح لیگ کہلائی اوردوسری شفیع لیگ۔ شفیع لیگ کے صدر سرمحمد شفیع جبکہ علامہ اقبال سیکریٹری قرار پائے۔ جناح انگریزحکومت کی من مانی پالیسی کی وجہ سے سائمن کمشن سے تعاون کرنے کے شدید مخالف تھے۔

سر شفیع کی انگریز حکمرانوں سے وفاداری کوئی ڈھکی چھپی بات نہ تھی۔ انکے سائمن کمشن سے تعاون کرنے کے موقعہ پر مولانا محمد علی اپنے اخبار”ہمدرد” میں لکھتے ہیں۔

“سرشفیع سے بھلا یہ کیونکر ممکن ہے کہ کسی وائسرائے کی رائے سے ہم رائے نہ ہوں۔ انہوں نے وفاداری کا الاپنا  گانا شروع کر دیا ہے۔ یہ پنجاب کی بد قسمتی ہے کہ سرمحمد اقبال جیسے لیڈر بھی شفیع جیسے وفادار کو اپنی آزاد خیالی کی سطع تک نہ ابھار سکے بلکہ برخلاف اس کے معلوم ھوتا ہے کہ وہ خود بھی سرشفیع کی وفاداری کی پست سطح پر اتر آئے ہیں۔”

1927 میں مسلم لیگ سیاسی اور فکری خلفشارکا شکارھو کر دو حصوں میں تقسیم ھو چکی تھی۔ پنجاب مسلم لیگ نے سرشفیع اورعلامہ اقبال کی قیادت میں انگریزوں سے وفاداری نبھاتے ہوئے جناح کے خلاف اعلان بغاوت کر دیا تھا۔ واضع رہے کہ اس ٹوٹ پھوٹ کے بعد ایک طویل عرصہ تک مسلم لیگ پنجاب میں قدم نہ جما سکی۔

جناح اورمسلم لیگ کو مزید دھچکے دینے کے لئے آل پارٹیزمسلم کانفرنس وجود میں لائی گئی اوراقبال اس کے بانیوں میں سے تھے۔ جناح مسلم لیگ کے سوا تمام مسلم جماعتوں نے اس کانفرنس میں شرکت کی جبکہ جناح نے آل پارٹیزمسلم کانفرنس کا بائیکاٹ کیا تھا۔

29 دسمبر1928 کو آل پارٹیز مسلم کانفرنس کا اجلاس زیر صدارت آغا خان دہلی میں منعقد ہوا جس میں ھندوستان کے مسلمانوں کے مطالبات پرمبنی ایک قرارداد منظور کی گئی۔ 398۔ جناح نے اس قرارداد کو قبول کرنے کی بجائے اپنا فارمولا دیا جو جناح کے 14 نکات کے نام سے مشہورھوا اور بعد ازاں یہ 14 نکات مسلمانان ہند کے مطالبات قرار پائے۔ جناح نے موقع  پرستانہ اورمصلحت کوش سیاست سے خود کو علیحدہ رکھا۔ بالآخر سرشفیع اورعلامہ اقبال بھی جناح کی قیادت تسلیم کرنے پرمجبورہو گئے اور 28 فروری 1930 کو مسلم لیگ دوبارہ متحد ہو گئی۔ مسلم لیگ کے فکری، سیاسی اورتنظمی انتشار، خصوصاً  پنجاب مسلم لیگ کی انگریز نواز پالیسی کی وجہ سے جناح ذہنی پریشانی کا شکار تھے اوربلآخرانہوں نے ترک وطن کرکے انگلستان میں مستقل سکونت اختیار کر لی۔

یہ بھی پڑھیں :  ایک متعصبانہ فیصلہ ۔۔ حیدر سید ایڈووکیٹ

“اقبال کے آخری دو سال” کے مصنف عاشق حسین بٹالوی لکھتے ہیں کہ یونینسٹ پارٹی ، مسلم لیگ کی حریف پارٹی تھی اور جس کے دروازے ہندووں، مسلمانوں، سکھوں، اچھوتوں اور مسیحیوں پر یکساں کھلے تھے ۔ بٹالوی مزید لکھتے ہیں کہ فضل حسین کے حیرت انگیز اثرورسوخ نے جناح کو بے دست و پا بنا کر رکھ دیا۔ اور آخر اس یاس و حرماں اور شکست خوردگی کے احساس ہی نے انہیں وطن ترک کرنے اورانگلستان میں مستقل اقامت اختیار کرنے پر مجبور کر دیا تھا۔ ۔ بٹالوی مزید لکھتے ہیں کہ جب 1929 میں مسلم لیگ کا زور توڑنے کے لئے آل انڈیا مسلم کانفرنس وجود میں آئی ڈاکٹر اقبال اس کانفرنس کے بڑے سرگرم رکن تھے۔ پہلے اس کی مجلس عاملہ کے ممبر اور پھر اس کے صدر بن گئے تھے۔ یہ ذہین میں رہے کہ سرفضل حسین پنجاب یونینسٹ پارٹی کے لیڈر تھے اوراقبال اس پارٹی کی اہم راہنما سمجھے جاتے تھے۔

1930 میں جناح ھندوستان سے ہجرت کرکے انگلستان سکونت اختیار کر چکے تھے اوراقبال ابھی تک یونینسٹ پارٹی سے مستعفی نہیں ہوئے تھے۔ یہ حالات تھے جب دسمبر 1930 کو مسلم لیگ کا سالانہ اجلاس علامہ اقبال کی صدارت میں آلہ آباد میں منعقد ہوا۔ قابل ذکر بات یہ کہ قائد اعظم سمیت مسلم لیگ کے کئی سرکردہ راہنما اس اجلاس میں شریک نہ تھے بلکہ جب علامہ اقبال نے اپنا تاریخی خطبہ دیا تو اجلاس کا کورم بھی پورا نہ تھا۔

اس اجلاس میں علامہ اقبال کے صدارتی خطاب کو تصورپاکستان سے تعبیر کیا جاتا ہے جس کو بنیاد بنا کراقبال کو تصورپاکستان کا خالق کہا جاتا ہے۔ اقبال نے اس اجلاس سے خطاب کرتے ہوئے کہا”مسلمانوں کا یہ مطالبہ قطعاً  منصفانہ ہو گا کہ ہندوستان کے اندر ایک مسلم انڈیا قائم کیا جائے۔ میں یہ دیکھنا پسند کروں گا کہ پنجاب، سرحد، سندھ اور بلوچستان کو ایک مملکت میں مدغم کر دیا جائے۔ مجھے یوں لگتا ہے کہ سیلف گورنمنٹ ، خواہ یہ سلطنت برطانیہ کے اندرہو  یا سلطنت برطانیہ کے باہر ہو، اور ایک مربوط شمال مغربی ہندی مسلم ریاست کی تشکیل بالآخر مسلمانوں کی کم از کم شمال مغربی ہند کے مسلمانوں کی تقدیر ٹھہرے گی۔۔۔۔۔۔ اس سے مسلمانوں کا احساس ذمہ داری مضبوط ہو گا اور جذبہ حب الوطنی فروغ پائے گا۔ اگر شمال مغربی ہندوستان کے مسلمانوں کو یہ بھر پور موقع  دیا جائے کہ وہ ہندوستان کے نظام سیاست میں رہ کر نشونما کرسکیں تو وہ ہندوستان کے خلاف تمام حملوں کی صورت میں، چاہے یہ حملہ بزور قوت ہو یا بزور خیالات، ہندوستان کے بہترین محافظ ثابت ہوں گئے۔۔۔۔۔۔۔۔ خود اختیار یعنی سیلف گورننگ، ریاستوں کے سپرد ہونے چاہییں ۔ مرکزی وفاقی ریاست کے سپرد صرف ایسے اختیارات ہونے چاہییں جو تمام وفاقی ریاستیں واضع طور پر بخوشی اس کے سپرد کریں۔”

اقبال کے اس خطاب میں ہندوستان کے مسلمانوں کے لئے کسی آزاد یعنی سوونر اسلامی مملکت کا تصور پیش نہیں  کیا۔ اس میں آسام اوربنگال اکثریتی مسلم علاقوں اور ریاست جموں اور کشمیر کا کوئی ذکر نہیں ۔ اقبال اپنی تقریر میں شمال مغربی ھندوستان میں مسلم اکثریتی علاقوں کو ایک ریاست میں ضم کرکے وفاق ہندوستان کے دائرے میں ایک خود مختاریونٹ تشکیل دینے کی تجویز پیش کر رہے ہیں۔

“پاکستان کی سیاسی تحریک” کے مصنف زاہد چوہدری لکھتے ہیں”علامہ اقبال کے خطبہ سے ظاہر ہے کہ انہوں نے دسمبر 1930 میں پنجاب، سندھ، سرحد اور بلوچستان کو ضم کر کے وفاق ھندوستان کے دائرے میں ایک خود مختار یعنی آٹونومس ریاست قائم کرنے کی خواہش کا اظہار کیا تھا اس کی بنیاد دراصل کسی نئے تصور پر نہ تھی۔ علامہ کے اپنے بیان کے مطابق ،،1927 میں آل پارٹیزکانفرنس منعقدہ دہلی کی قراردادوں سے اسی بلند نصب العین کا اظہار ہوتا تھا” اور پھر 1928 میں نہرو کمیٹی کے رو برو بھی یہ تجویز پیش کی گئی مگر اس نے اسے مسترد کر دیا۔ اسی سال یعنی 1928 میں ہی پنجاب میں سر فضل حسین کی یونینسٹ پارٹی کے ترجمان اخبار انقلاب میں مرتضے خاں میکش کے نام سے ایک سلسلہ مضامین شائع ہوا جن میں یہ ہی مطالبہ کیا گیا تھا۔ علامہ اقبال ان دنوں پنجاب کونسل میں یونینسٹ پارٹی کے رکن تھے اور جب 1930 میں انہوں نے یہ خطبہ پڑھا اس وقت تک انہوں نے یونینسٹ پارٹی سے استعفی نہیں دیا تھا۔”

ایڈورڈ ٹامسن کے نام 4۔ مارچ 1934 کے ایک خط میں اقبال اپنے 1930 کے خطبے کی وضاحت کرتے ہوئے لکھتے ہیں “پاکستان میری سکیم نہیں ہے۔ جو تجویز میں نے اپنے خطبے میں پیش کی تھی وہ ایک مسلم صوبے کے قیام کی تجویز تھی۔ یعنی شمال مغربی ہند میں ایک ایسے صوبے کی تشکیل جہاں مسلمانوں کی واضع اکثریت ہو۔ میری سکیم کے مطابق یہ نیا صوبہ آئندہ کی انڈین فیڈریشن کا حصہ ہو گا۔ لیکن “پاکستان” سکیم مسلم صوبوں کی ایک علیحدہ فیڈریشن کے قیام کی سفارش کرتی ہے۔ جس کا براہ راست تعلق انگلستان سے ایک علیحدہ ڈومینین کی صورت میں ہوگا۔ یہ سکیم کیمبرج میں بنائی گی ہے۔”

یہاں یہ وضاحت ضروری ہے کہ پاکستان کا لفظ اوراس نام کے ایک آزاد ملک کا منصوبہ پہلی بار چوہدری رحمت علی نے 1933 میں پیش کیا۔ یاد رہے کہ چوہدری رحمت علی نے کیمبرج میں پاکستان کے حصول کے لئے پاکستان نیشنلسٹ موومنٹ قائم کر رکھی تھی اوراقبال اس منصوبہ کو تسلیم نہیں کرتے تھے۔

1936 اور 1937 کے دوران علامہ اقبال کے جناح کو لکھے گئے مراسلات کو بعض دانشور کے نزدیک بہت تاریخی اہمیت حاصل ہے۔ اقبال نے اس دوران جناح کو مسلم لیگ کی پنجاب میں تنظیم نو، لیگ کے سیاسی اور نظریاتی لائحہ عمل، دستور اور پروگرام میں تبدیلی کےلئے متعدد مشورے دیے ۔ کیا یہ مشورے یک طرفہ ہی رہے یا قائد نے ان خطوط کے جوابات بھی لکھےاور اقبال کے مشوروں پر کس قدرعمل کیا یا کہ ان مشوروں کو قائد نے درخوراعتنا ہی نہ سمجھا۔ یہ ایک الگ بحث کا موضوع ہے۔ 30۔ اکتوبر 1937 کو قائد کو لکھے گئے ایک خط میں اقبال لکھتے ہیں۔”ہمیں مسلمانوں کی تنظیم کے لئے اپنی تمام ترقوتیں ہمیشہ سے زیادہ گرم جوشی کے ساتھ وقف کر دینی چاہیں اور اس وقت تک چین نہ لینا چاہے جب تک پانچ صوبوں میں مسلمانوں کی حکومت قائم نہیں ہو جاتی اور بلوچستان کواصلاحات نہیں ملتیں۔”

تاریخی دستاویزات کی ورق گردانی کرنے سے یہ ثابت ہوتا ہے کی اقبال وہ پہلے یا واحد مفکر نہ تھے جنہوں نے برٹش انڈیا میں مسلم ھندو مسلے کے حل کے لئے خودمختار صوبوں کے قیام کی تجویز پیش کی ہو۔ اقبال کے سیاست میں سر گرم ہونے سے قبل مسلم لیگ کے معروف لیڈر نواب ذوالفقار علی، مولانا حسرت موہانی اور آریہ سماجی ھندو نیشنلسٹ لیڈر لالہ لاجپت رائے انڈیا میں خود مختار مسلم ریاستوں کی تجویز پیش چکے تھے۔ بقول ڈاکٹرجاوید اقبال، بھائی پرمانند، پروفیسر جی۔ آر۔ ابھیا نکر اور نواب ذوالفقار علی ایسی ہی تجاویز اقبال سے پہلے پیش کر چکے تھے۔

30 دسمبر 1929 کو خلافت کانفرنس کے اجلاس منعقدہ لاھور میں نواب ذوالفقار علی خاں نے تقریر کرتے ہوئے کہا” ہندوستان کی آزادی اور ترقی کا انحصار اس بات پر ہے کہ مسلمانوں کو شمالی ھند میں ایسا علاقہ دے دیا جائے جو دو یا تین صوبوں پرمشتمل ہو یا انہیں مدغم کر کے ایک صوبہ بنا دیا جائے۔ اسی طرح مشرقی ھند میں بنگال کی ایسی ہی تقسیم کر دی جائے۔”

نواب ذوالفقار علی کے اس بیان سے تقریبا 5 سال قبل ہندوستان کی مذہبی بنیادوں پرتقسیم کا نظریہ لالہ لاجپت رائے نے 1924 میں پیش کیا۔ گانگریسی اورآریہ سماجی لیڈر لالہ لاجپت رائے نے لاھور کے ایک اخبار ٹریبون میں 1924 کوایک آرٹیکل

“The Hindu-Muslim problem (part II – Some suggestions for political improvements)”

میں لکھا ۔

“Maulana Hasrat Mohani has recently said that the Muslims will never agree to Indias having Dominion status under the separate Muslim states in India, united with Hindu states under a National Federal Government. He is also in favour of smaller states containing compact Hindu and Muslim population. If communal representation with separate electorate is to be rule, then Maulana Hasrats scheme as to smaller provinces seems to be the only workable proposition. Under my scheme the Muslims will have four Muslim states: 1. The Pathan province or NWF, 2. Western Punjab, 3. Sindh and Eastern Bengal. If there are compact Muslim communities in any other part of India, sufficiently large to form a province, they should be similarly constituted. But it should be distinctly understood that this is not a united India. It means a clear partition of India into a Muslim India and a non-Muslim India.”

،،پاکستان کی سیاسی تحریک،، کے مصنف زاہد چوہدری لکھتے ہیں کہ یہ حقیقت دلچسپی سے خالی نیہں کہ جو پاکستان 1947 میں وجود میں آیا وہ لالہ لاجپت کی سکیم کے عین مطابق تھا۔ چنانچہ یہ کہنا بے جا نہ ھوگا کہ تصورپاکستان کا ابتدائی خالق کوئی مسلمان مفکر نہ تھا۔ بلکہ پنجاب کا ایک آریہ سماجی لیڈر تھا۔ جس کہ سینے میں اسلام اورمسلمانوں کے خلاف نفرت اورعداوت کا بے پناہ جذبہ موجزن تھا۔

یہ بھی پڑھیں :  فسطائیت کیا ہے ۔۔منصور ندیم

زاہد چوہدری مزید لکھتے ہیں”اقبال نے ہندوستانی وفاق کے دائرے میں رہتے ہوئے ایک خود مختار وفاقی مسلم ریاست یا ریاستوں کا تصور پیش کیا تھا اس کا اس تصور سے کوئی تعلق نہیں  جس کی بنیاد پر 14۔اگست 1947 کو پاکستان وجود میں آیا تھا۔۔۔۔۔ علامہ اقبال کے خطبہ کے کسی حصہ سے بھی یہ ثابت نہیں کیا جاسکتا کہ ان کے ذہن میں کلی طور پر ایک آزاد اور خود مختار یعنی سوونراور انڈی پنڈنٹ، اسلامی مملکت کے قیام کا تصور تھا۔”

زاہد چوہدری بیان کرتے ہیں کہ اسلامی مملکت پاکستان کا تصور دراصل پہلی مرتبہ علامہ کے اس تاریخی خطبہ میں پیش کیا گیا تھا ۔ تاریخ کو مسخ کرنے کی اس سے بد ترمثال شاید ہی کہیں اور ملے۔

ڈاکٹر جاوید اقبال ،زندہ رود، میں لکھتے ہیں”کہ دلچسپ بات تو یہ ہے کہ تحریک پاکستان کے بعض لیڈرخود ہی اقبال کو مسلم ریاست کے تصور سے الگ تھلگ ر کھنا چاہتے ہیں۔ وہ لکھتے ہیں اس کی مثال مسلم لیگ یا تحریک پاکستان کے ایک نامور لیڈراورقاید اعظم کے دست راست ایم۔ اے۔ ایچ۔ اصفہانی کی تحریر کے حوالے سے پیش کی جاسکتی ہے۔ اصفہانی لکھتے ہیں کہ اس بات سے بلا شبہ انکار نہیں کیا جا سکتا کہ ڈاکٹر اقبال کی فکر، شاعری اور خطبات بھی اس سمت اشارہ کرتے تھے لیکن یہ کہنا کہ وہ مسلم ریاست کے تصور کے خالق تھے تاریخ کو مسخ کرنا ہے۔”

جاوید اقبال کہتے ہیں کہ اصفہانی دراصل شریف الدین پرزادہ، ڈاکٹراشتیاق حسین اور تحریک پاکستان کے ایک نمایاں راہنما چودھری خلیق ا لزمان کی تحریروں سے متاثر معلوم ہوتے ہیں۔ شریف ا لدین پیرزادہ کی تحقیق کے مطابق اقبال سے قبل کئی ا نگریز، مسلم اور ہندو مفکر، مسلم ہندو تنازعہ کے حل کے لئے خود مختار ریاستوں کے قیام کی بنیاد پر ھندوستان کی تقسیم کی بات کر چکے تھے۔ اس کے مطابق 1917 میں ڈاکٹرعبدالجبارخیری اور پروفیسرعبدالستارخیری نے سٹاک ہوم کی سوشلسٹ انٹرنیشنل کانفرنس میں ایک تحریری بیان میں کہا تھا کہ ھندوستان کے ہرصوبے کو خودمختاری کا حق دیا جانا چاہے۔ تاکہ مسلم اورھندو اکثریتی صوبے علیحدہ علیحدہ وفاق قائم کرسکیں۔ 1924 میں مولانا حسرت موہانی نے تجویز پیش کی کہ شمال مغرب کے مسلم اکثریتی صوبوں کو مدغم کر کے ایک صوبہ بنا دیا جائے اور اسے ھندوستان کے وفاقی نظام میں ایک وحدت کی پوزیشن حاصل ہو۔

ڈاکٹر اشتیاق حسین قریشی اپنی تصنیف “پاکستان کی جدوجہد” میں لکھتے ہیں کہ اقبال سے پیشتر بر صغیر میں مسلم ریاست کا تصور پیش کرنے والوں میں جمال الدین افغانی، چوھدری رحمت علی، ڈاکٹر جبار خیری، پروفیسر ستار خیری، عبدالقادر بلگرامی، لووٹ فریزر، ساورکر، لالہ لاجپت رائے، سردار گل خان، مولانا محمد علی اور آغا خان کے نام شامل ہیں

قائد اعظم 1934 کو انگلستان سے واپس انڈیا لوٹ آئے اور مسلم لیگ کی قیادت انہیں ایک بار پھر سونپ دی گئی۔ 1935 کے انڈیا ایکٹ کے نفاذ کے بعد 1937 میں صوبائی انتخابات ھونے قرار پائے۔ برٹش انڈیا میں 1937 کے صوبائی انتخابات اور انکے نتیجہ میں پیدا شدہ صورت حال نے آئندہ  آنے والے حالات کا رخ متعین کرنا شروع کر دیا تھا۔

عاشق بٹالوی لکھتے ہیں کہ حقیقت یہ ہے کہ جب سے مسٹرجناح انگلستان سے واپس آئے تھے ان کی سب سے بڑی خواہش یہ ہی تھی کہ 1916 کے میثاق لکھنو کی طرح کانگرس اورمسلم لیگ کے درمیان کوئی پائیدار مفاہمت ہو جائے تاکہ ہندواورمسلمان مل کر آزادی وطن کی تحریک میں حصہ لے سکیں۔” اس کے ثبوت میں بٹالوی قائد کی ڈھاکہ میں 8۔ جنوری 1937 کو کی گئی تقریر کا حوا لہ دیتے ہیں۔ جس میں قائد نےکہا۔”جداگانہ انتخاب کے باوجود اوران مشکلات کے باوجود جن کا آج ملک کو سامنا کرنا پڑ رہا ہے، ہندو اورمسلمان متحد ہو کر ایک پارٹی بنا سکتے ہیں۔ بشرطیکہ ہم ایک ایسی مشترکہ پالیسی اور پروگرام وضع کر سکیں جس پر ہندواورمسلمان اسمبلیوں کے اندراور باہرعمل پیرا ہوسکیں۔”

عاشق حسین بٹالوی لکھتے ہیں۔” پنجاب مسلم لیگ پارلیمانی پارٹی بورڈ نے جو مینی فیسٹو شائع کیا اس کا پروگرام بھی کم و بیش انہی خطوط پر مرتب کیا گیا تھا۔”یاد رہے کہ اقبال اس وقت پنجاب مسلم لیگ کے صدر تھے اور پنجاب لیگ کا الیکشن مینی فسٹوعلامہ اقبال کی براہ راست نگرانی میں مرتب کیا گیا تھا۔

یہاں اس کا تذکرہ کرنا اہم ہو گا  کہ آل انڈیا مسلم لیگ کا الیکشن منشور لیگ کی آئندہ  پالیسی اورسرگرمیوں کا سنگ بنیاد تھا۔ مسلم لیگ نے 1937 کے الیکشن کیلئے میثاق لکھنو کے تحت مسلم ہندو مفاہمت، ہندوستان میں مسلم اکثریتی اوراقلیتی صوبوں میں مسلم عوام کے سیاسی، قانونی، معاشی اور ثقافتی مسائل کو مد نظر رکھ کر اپنا لائحہ عمل مرتب کیا جسکا اظہار مسلم لیگ کے الیکشن منشوراور اس دوران جناح کی تقاریرمیں نظر آتا ہے۔ مسلم لیگ اور جناح متحدہ ھندوستان میں مسلمانوں کے حقوق کا منشورلے کرمیدان میں آئے تھے۔ اس الیکشن میں پاکستان کے نام کا ذکر یا ہندوستان سےعلیحدہ ہو کر کسی الگ ملک کا تصور،مطالبہ یا اس کا کسی طرز یا سطع پراظہارنظر نہیں آتا۔

ان الیکشنوں میں کانگرس کی غیرمتوقع  کامیابی نے آئندہ آنے والے حالات کا پانسہ پلٹ کر رکھ دیا۔ مسلم لیگ ان الیکشنوں میں کوئی خاطرخواہ کامیابی حاصل نہ کر سکی۔ مگر جناح یہ ثابت کرنے میں کامیاب ھو گے کہ صرف مسلم لیگ ہی مسلمانوں کی واحد نمائندہ جماعت ہے کیونکہ لیگ ہی مسلمانوں کی واحد جماعت تھی جس نے مسلم نششتوں پر تقریبا پورے ملک میں اپنے نمائندے کھڑے کئے تھے۔ کانگرس قیادت کی رعونت اورغیرمفاہمتی پالیسی نے ہندوستان کی سیاست کو ایک نئے رخ پہ ڈال دیا جس سے نہ صرف مسلم لیگ اورکانگرس کی قیادت میں فاصلے بڑھنےشروع ہو گئے بلکہ مسلم اورھندوعوام میں اختلافات کی خلیج وسیع ہونے لگی۔ کانگرس کےصوبوں اورملک میں بلا شرکت غیرے حکومت کرنے کے جنون اور معاندانہ پالیسی کیوجہ سے ھندوستان کے مسلمانوں میں بے چینی، عدم تحفظ اورغصے کی لہر دوڑنے لگی اور اپنے حقوق کے تحفظ کے متعلق خد شات پیدا ھونے شروع ہو گئے۔

الیکشن کے بعد قائد اعظم مسلم لیگ کی خودمختارحیثیت برقرار رکھتے ہوئے کانگرس کے ساتھ صوبائی وزارتوں میں مسلم لیگ کی شمولیت چاہتے تھے۔ مگرکانگرس کی قیادت مسلم لیگ کی آزادنہ پارلیمانی حیثیت تسلیم کرنے کی بجائے اس کو ختم کرکے کانگرس میں ضم کرنے کی شرط پرحکومت میں شامل کرنے کی پالیس پربضد تھی۔ کانگرس کے اس طرزعمل سے ھندوستان کے حالات کس قدرخطرناک رخ پہ چل پڑیں گئے اس کا اندازہ شاید اس وقت کانگرس اورمسلم لیگ کی قیادتوں کو بھی نہ تھا۔

انتخابات کے کچھ عرصہ بعد 21۔ اپریل 1938 کو علامہ اقبال انتقال کر گئے۔ اقبال کے انتقال کے بعد مسلم لیگ کا سالانہ اجلاس دسمبر 1938 کو قاید اعظم کی صدارت میں منعقد ہوا جس میں ایک قرارداد کے ذریعےعلامہ اقبال کو مندرجہ ذیل الفاظ میں خراج تحسین پیش کیا گیا۔ ،،آل انڈیا مسلم لیگ کا یہ اجلاس سرمحمد اقبال مرحوم کے اسلام کا ایک فلسفی صوفی و قومی شاعر ھونے کی حیثیت سے ان کی خدمات کی تحسین کرتا ہے۔ مسلمانوں کو انہوں نے یہ پیغام پہنچایا تھا کہ وہ اپنے ماضی کی روایات سے اپنے مستقبل کو بنائیں،،۔یہاں پراقبال کے کسی مسلم ریاست کے تصور کے خالق ھونے یا مسلمانان ھند کی سیاسی یا نظریاتی رانمائی کرنے پر انکی تحسین نہیں کی گئی۔

علامہ اقبال کی رحلت کے تقریباً  دو سال بعد مسلم لیگ کا تاریخی اور یاد گاراجلاس مارچ 1940 کو لاھورمیں مزار اقبال سے چند قدموں کے فاصلے پرمنعقد ہوا۔ جس میں تاریخی قرارداد لاھور منظور کی گئی جسے بعد ازاں قرارداد پاکستان کا نام دیا گیا۔ اس قرارداد میں بھی آزاد پاکستان کا مطالبہ نہیں پیش کیا گیا تھا مگر یہ قرارداد آگے چل کر تحریک پاکستان کا سنگ میل ثابت ہوئی۔ حیران کن بات ہے کہ اس قرارداد میں، قائد اعظم یا کسی اور لیگی لیڈر نے کسی تقریریا تحریرمیں اقبال یا انکے اس خطبے کا اشارتاً  بھی ذکر نہیں کیا۔ نہ ہی اس اجلاس میں اقبال کو تصورپاکستان کا خالق ھونے پر خراج تحسین پیش کرنے کی ضرورت محسوس کی گئی۔ یہ حقیقت بھی توجہ طلب ہے کہ قائد اعظم اور مسلم لیگ کی قیادت نے چند قوموں کے فاصلہ پرموجود مزاراقبال پرحاضرھوکرتصورپاکستان پیش کرنے پراقبال کا شکریہ ادا کرنے اور خراج عقیدت پیش کرنے کی بھی زحمت گوارا نہ کی۔

ایک اوراہم تاریخی حقیقت جو قابل غور ہے کہ علامہ اقبال کے 1930 کے خطاب کے بعد اور قیام پاکستان تک آل انڈیا مسلم لیگ کے کسی اجلاس یا قائد اعظم کی کسی تنظیمی یا پبلک تقریر یا تحریر میں اقبال کے اس خطبے کا کوئی تذکرہ نہیں ملتا اورنہ ہی اس خطبے کو تصور پاکستان کی بنیاد قرار دیا گیا۔ قائد اعظم کی حیات میں ایسا کوئی دستاویزی ثبوت یا شہادت نہیں ملتی جس سے یہ اخذ کیا جاسکے کہ مسلم لیگ یا قائد اعظم نےعلامہ اقبال کے تصور پاکستان کا خالق ھونے کا اعتراف کیا ھو۔

علامہ اقبال نے پاکستان کا خواب کب دیکھا اور یہ کہ وہ تصور پاکستان کے خالق تھے تاریخ کے صفحات اس کی شہادت پیش کرنے سے قاصر ہیں۔ تصورپاکستان یا پاکستان کے حوالے سے جو باتیں بغیر تاریخی ثبوت کے علامہ اقبال سے منسوب کی جاتی ہیں وہ علامہ اقبال کے ساتھ سراسر ناانصافی تو ہے ہی مگر تاریخ مسخ کرنے کی ایسی بھونڈی مثال شاید کیہں اور نظر نہ آئے۔ یہ بظاہر نظر آتا ہے کہ پاکستانی ریاست نے کچھ دانشوروں کی ملی بھگت سے یہ سب کچھ قائد اعظم کے انتقال کے بعد تخلیق کیا اورمتعارف کرایا۔ اسوقت پاکستانی ریاست کے کرتا دھرتا افراد کو یہ نظریہ کیوں اپنانا پڑتا اور انہیں اسکی ضرورت کیوں محسوس ھوئی یہ ایک الگ موضوع بحث ہے۔

یہ بھی پڑھیں: ہنس کی چال۔۔محمد فیصل

یہاں یہ واضع کرنا بہت ضروری ہے کہ اردو اورفارسی شاعری میں علامہ اقبال کو وہ مقام حاصل ہے جو صدیوں میں بھی شاید کسی کو نصیب نہ ھوتا ہو۔ گذشتہ صدی اورعصرحاضرمیں انکے پائے کے شاعر اور مفکر پوری مسلم دنیا میں بہت کم پیدا ہوے ہیں۔ علامہ اقبال کی ایک طویل عرصہ عملی سیاست سے کوئی خاص دلچسپی نہ رہی اور انکا برصغیرکی عملی سیاست میں سرگرم دورانیہ تقریبا 10 سال تک محیط رہا ہے اس لئے تاریخ میں انکے منفرد اوراعلی مقام کو انکے مختصر سیاسی کردار کے حوالے سے متعین کرنا مناسب نہیں ہے۔

حوالاجات۔

۱۔زندہ رود، مصنف ڈاکٹر جاوید اقبال۔2 ۔ پاکستان کیسے بنا،مصنف، زاھد چوھدری۔ 3۔اقبال کے آخری دو سال،مصنف، عاشق حسین بٹالوی۔ 4۔تاریخ آل انڈیا مسلم لیگ، مصنف، ڈاکٹرسرفراز حسین اورحنیف شاہد۔ ناشر نظریہ پاکستان ٹرسٹ۔ 5۔مسلم لیگ کا قیام، مصنف، شریف ا لدین پیرزادہ۔

بذریعہ فیس بک تبصرہ تحریر کریں

براہ راست تبصرہ تحریر کریں۔

Your email address will not be published. Required fields are marked *