نیشنل جیو گرافک اور ناسا کے اشتراک سے چاند کے قطب جنوبی کے اس مقام کی ہائی ریزولوشن تصویر جاری کی گئی۔ یہ تصویر بنیادی طور پر Lunar Reconnaissance Orbiter Camera (ایل آر او سی) اور شیڈو کیم کی جانب سے کھینچی گئی متعدد تصاویر کو باہم ملا کر تیار کی گئی ہے۔ تصویر کے ساتھ جاری بیان میں کہا گیا کہ چاند کے اس حصے میں ہمیشہ تاریکی چھائی رہتی ہے اور شیڈو کیم نے قطب جنوبی کے قریب Shackleton crater کی تصویر کھینچی۔

بیان کے مطابق شیڈو کیم کو چاند کی سطح کے تاریک حصوں کی جانچ پڑتال کے لیے ڈیزائن کیا گیا اور یہ کیمرا جنوبی کورین اسپیس کرافٹ کے ساتھ لگ بھگ ایک سال سے چاند کے مدار میں موجود ہے۔ Shackleton crater کے اردگرد کے حصوں کی تصاویر ایل آر او سی نے کھینچی تھیں اور اس تصویر میں آرٹیمس 3 کے 13 مجوزہ لینڈنگ مقامات میں سے 3 کو دیکھا جا سکتا ہے۔ اس تصویر کے ساتھ نیشنل جیو گرافک نے چاند کے قطب جنوبی کا ایک نقشہ بھی جاری کیا ہے جس میں آرٹیمس 3 کے لیے مجوزہ لینڈنگ مقامات کو دکھایا گیا ہے۔

واضح رہے کہ امریکا کے ساتھ ساتھ چین بھی چاند کے قطب جنوبی میں انسانوں کو بھیجنے کا خواہشمند ہے۔ مگر چین کا مجوزہ مشن 2030 سے قبل روانہ نہیں ہو سکے گا جبکہ ناسا کا مشن 2025 میں شیڈول ہے مگر اس کا انحصار اسپیس ایکس کے اسٹار شپ اسپیس کرافٹ کو پرواز کی اجازت ملنے پر ہوگا۔