: کراچی میں ملک کی پہلی الیکٹرک بس سروس کا افتتاح کردیا، یہ بس ملیر، ایئرپورٹ سے ہوکر سی ویو تک جائے گی جس کا کرایہ پچاس روپے رکھا گیا ہے۔

تفصیلات کے مطابق یہ افتتاح وزیر اطلاعات و ٹرانسپورٹ شرجیل انعام میمن نے کیا ان کے ہمراہ ناصر حسین شاہ، سعید غنی بھی موجود تھے۔

افتتاح کے بعد میڈیا سے بات چیت میں انہوں نے بتایا کہ پیپلز پارٹی کی جانب سے کراچی کے لیے پہلی الیکٹرک بس سروس شروع کی جا رہی ہے، یہ بس ماحول دوست ہے جو کس قسم کی آلودگی نہیں پھیلائے گی، یہ بجلی سے چارج سے ہوتی ہے اور ایک چارج پر 240 کلومیٹر چلتی ہے، بس کی شروعات ملیر ٹینک چوک سے شروع ہوگی جو ایئر پورٹ سے شارع فیصل سی ویو تک جائے گی۔

انہوں نے کہا کہ ایسی کوئی بس سروس ایئرپورٹ تک نہیں جاتی، پرائیویٹ ٹیکسی ایئرپورٹ تک 1500 روپے تک وصول کرتی ہے جبکہ الیکٹرک بس سروس کا کرایہ 50 روپے ہوگا۔ کراچی میں اربوں روپے کے منصوبوں پر کام جاری ہے، کراچی پاکستان کا معاشی حب ہے جس میں کسی نے پہلے ایسی پروجیکٹ نہیں دیئے، عوام سے گزارش ہے کہ اس بس کا خیال رکھیں یہ سہولت آپ کے لیے ہے اس طرح کے مزید پروجیکٹس لائیں گے، پیپلز پارٹی باتیں نہیں کام کرتی ہے۔