نگراں حکومت پنجاب نے اسموگ کی وجہ سے اسکولز اور ٹرانسپورٹ بند نہ کرنے کا اہم فیصلہ کر لیا۔

انسداد اسموگ اقدامات کیلیے نگراں وزیر اعلیٰ پنجاب محسن نقوی کی زیرِ صدارت کئی گھنٹے طویل اجلاس ہوا جس میں ماہرین ماحولیات نے بریفنگ دی کہ اسکولوں میں چھٹی اور ٹرانسپورٹ بند کرنے سے فرق نہیں پڑے گا۔

اجلاس میں ایک ماہ کیلیے تمام سرکاری و نجی اسکولوں میں طلبہ کیلئے ماسک لازمی قرار دیا گیا۔

محسن نقوی نے کہا کہ عوام سے بھی اپیل ہے کہ وہ ماسک کا استعمال کریں۔ انہوں نے صوبائی وزرا کو کل سے سرکاری و نجی اسکولوں کے وزٹ کرنے کی ہدایت کر دی۔

نگراں وزیر اعلیٰ نے کہا کہ تعمیر کے دوران مٹی، ریت اور ملبہ پر چھڑکاؤ نہ کرنے والوں کے خلاف کارروائی ہوگی۔ انہوں نے اسموگ کے دوران کاشت کاروں کے خلاف چالان واپس لینے کا حکم دیا۔

Advertisements

محسن نقوی نے کہا کہ کاشت کار فصلوں کی باقیات نہ جلائیں بلکہ انہیں مناسب طریقے سے تلف کیا جائے، دھواں چھوڑنے والی گاڑیوں اور فیکٹریوں کے خلاف بلا امتیاز کارروائی جاری رکھی جائے، جو کچھ انسانی بس میں ہے اسموگ میں کمی کیلیے ہر وہ اقدام اٹھایا جائے۔