پنجاب میں اسموگ کو آفت قرار دیتے ہوئے صوبے میں اسموگ ایمرجنسی نافذ کردی گئی، وزیراعلیٰ محسن نقوی نے عوام سے اپیل ہے کہ وہ ماسک کا استعمال کریں۔

تفصیلات کے مطابق صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے اسموگ کو آفت قرار دے دیا اور پنجاب بھر میں اسموگ ایمرجنسی نافذ کردی گئی۔

نگراں حکومت نے ایک ماہ کے لئے تمام سرکاری و نجی اسکولوں کو بند نہ کرنےکا فیصلہ کرتے ہوئے تمام طلبہ کیلئے ماسک لازمی قرار دے دیا گیا، ماہرین ماحولیات نے کہا کہ اسکولوں میں چھٹی،ٹرانسپورٹ بند کرنے سے فرق نہیں پڑے گا۔

وزیراعلیٰ محسن نقوی نے عوام سے اپیل ہے کہ وہ ماسک کا استعمال کریں اور صوبائی وزراکو کل سے سرکاری و نجی اسکولوں کے وزٹ کرنے کی ہدایت کردی، تعمیر کےدوران مٹی، ریت اور ملبہ پر چھڑکاؤ نہ کرنیوالوں کیخلاف کارروائی ہوگی۔

دوسری جانب پی ڈی ایم اے کی انتظامیہ کو صوبے بھر میں سموگ کے تدارک کے لئے فوری اقدامات اٹھانے کی ہدایات جاری کردی، اس حوالے سے تمام ڈپٹی کمشنرز کو ریلیف کمشنر کے اختیارات سونپ دیئے گئے۔جاری احکامات کے مطابق ہر اس اقدام کو روکیں جو اسموگ کا باعث ہے۔

ڈائریکٹر پی ڈی ایم اے کا کہنا تھا کہ فصلوں کی باقیات کو آگ لگانے پر مکمل پابندی عائد ہے، دھواں چھوڑنے والی گاڑیوں کے خلاف کریک ڈاؤن کی بھی ہدایات کردی اور تمام کارخانے جو ماحولیاتی آلودگی کا باعث بن رہے ہیں کارروائی ہوگی۔

ضلعی انتظامیہ زگ زیگ ٹیکنالوجی سے چلنے والے بھٹوں کےعلاوہ باقیوں پرکڑی نظر رکھے۔ حکومتی احکامات کی خلاف ورزی کرنے والوں کے خلاف سخت ایکشن لیا جائے۔

یاد رہے لاہور ہائی کورٹ نے بھی شہر میں اسموگ کی موجودہ صورتحال پر برہمی کا اظہار کرتے ہوئے اسموگ ایمرجنسی نافذ کرنے کا حکم دیتے ہوئے ہدایت کی تھی کہ اسکولز کالجز کے علاقوں میں اگر کالا دھواں چھوڑنے والا کارخانہ ہے تو اطلاع دیں۔

Advertisements

عدالت کا کہنا تھا کہ اسموگ کی موجودہ صورت حال کی ذمہ دار موجودہ حکومت ہے، شہر کی جو حالت ہے وہ آپ دیکھ لیں، آپ شہر کے مالک ہو آپ کچھ کرسکتے ہو، پہلے یہ اسموگ نومبر کے آخر اور دسمبر میں آتی تھی، اب یہ اسموگ اکتوبر میں شروع ہوچکی ہے۔