بحیرہ عرب میں بنے انتہائی شدید سمندری طوفان ‘بائپر جوائے’ کے اثرات سندھ کی ساحلی پٹی اور خاص طور پر کراچی میں واضح ہونا شروع ہوگئے ہیں۔ پہلے تیز ہوا کے جھکڑ اور اب کئی مقامات پر بوندا باندی بھی جاری ہے۔

تفصیلات کے مطابق آئندہ 48 گھنٹوں میں طوفان ساحلی پٹی سے ٹکرائے گا۔ موسمیات کے ماہرین نے کراچی سمیت مختلف علاقوں میں تیز ہواؤں کے ساتھ موسلا دھار بارش کی پیشگوئی کی ہے۔

سندھ حکومت نے کسی بھی ہنگامی حالات سے نمٹنے کیلئے اقدامات شروع کردیے ہیں۔ پاک فوج کے جوان اور پاک رینجرز کے دستے بھی صوبائی حکومت کی مدد کررہے ہیں۔ سندھ حکومت اور پی ڈی ایم اے کی جانب سے ہنگامی نمبرز جاری کیے گئے ہیں۔ جن پر کسی بھی وقت مدد کیلئے رابطہ کیا جاسکتا ہے۔