دنیا کا کوئی بھی ملک آئین وقانون کی بالادستی کے بغیر ترقی کرنا تو کجا اپنی سلامتی تک برقرار نہیں رکھ سکتا۔ یہ بجا کہ دنیا کے ہر ملک میں آئین وقانون شکن پیدا ہوتے رہتے ہیں لیکن جہاں نظامِ انصاف مضبوط تَر ہو وہاں ایسے جرائم کو پنپنے کا موقع نہیں ملتا۔ پاکستان مگر ایسا ملک جہاں ہردَور میں جسٹس منیر کا نظریۂ ضرورت جاری وساری رہا۔ اُدھر پارلیمنٹیرینز کی حالت یہ کہ 90 فیصدنے کبھی آئین کی کتاب کھول کر بھی نہیں دیکھی ہوگی۔ ہم نے لگ بھگ 37 سال آمریتوں کے زیرِسایہ گزار دیئے لیکن پھر بھی ہمارے بزعمِ خویش رَہنماؤں کو ہوش نہ آیا۔ یہاں جو لنگڑی لولی جمہوریت گھٹنوں کے بَل رینگ رہی ہے، اُسے بھی ہمارے رَہنماء اپنی ذاتی مصلحتوں کی بھینٹ چڑھانے کے لیے ہمہ وقت تیار رہتے ہیں۔

ہمیں نوازلیگ سے کوئی غرض ہے نہ پیپلزپارٹی سے اور نہ ہی تحریکِ انصاف سے۔ ہمارے لیے وہی حقیقی رَہنماء جو آئین کی بالادستی کا علمبردار ہو اورجس کے سینے میں ملک وملت کا درد ہو۔ حقیقت یہی کہ عمران خاں کے چاہنے والے آج بھی بہت، مریم نواز کے جلسوں کی رونق بڑھانے والے بیشمار اور بلاول بھٹو زرداری کو اُبھرتا ہوا سیاسی لیڈر سمجھنے والے جیالے اَن گنت لیکن مریم نواز کے کندھوں پر مملکت کا بوجھ پڑا نہ بلاول کے کندھوں پر لیکن عمران خاں جو ساڑھے تین سالوں تک ارضِ وطن کے بِلاشرکتِ غیرے حکمران رہے، اُن سے سوال تو بنتا ہے۔

حیرت کی بات تو یہ ہے کہ اسٹیبلشمنٹ نے یہ انمول موتی کہاں سے ڈھونڈ نکالاجو کبھی جرمنی اور جاپان کی سرحدوں کو ملاتا ہے اور کبھی پاکستان میں 12 موسموں کی نوید سناتا ہے۔ جس کا اعلان یہ کہ اُس سے زیادہ صاحبِ علم اور کوئی نہیں۔ جب دین کی بات کرتا ہے تو کہتا ہے کہ تاریخ میں تو حضرت عیسیٰؑ کا ذکر تک نہیں، دعویٰ پھر بھی قُرآن فہمی کا جس میں جابجا حضرت عیسیٰ کا ذکر موجود۔ دینِ مبیں کے بارے میں اُس نے وہ کچھ کہا اُسے دہراتے ہوئے بھی ہم لرزہ بَراندام۔ پتہ نہیں وہ اُس وقت اپنے حواس میں ہوتا بھی ہے یا نہیں جب کہتا ہے کہ جب پاکستان بنا تو اِس کی آبادی 40 کروڑ تھی۔
جب اُسی جیسا “صاحبِ علم” لقمہ دیتاہے کہ 40 کروڑ نہیں 40 لاکھ تو پہلے خان انکار کرتا ہے لیکن پھر اُس کی بات مان لیتا ہے۔ جس شخص کو یہ علم بھی نہیں کہ قیامِ پاکستان کے وقت پاکستان کی آبادی ساڑھے 7 کروڑ سے زائد تھی جس میں 3 کروڑ 37 لاکھ مغربی پاکستان اور 4 کروڑ 20 لاکھ مشرقی پاکستان کی آبادی تھی۔ یہ اعداد وشمار 1951ء میں پہلی مردم شماری میں سامنے

آئے۔ اب پاکستان کی آبادی 22 کروڑ نہیں بلکہ 23 کروڑ 14 لاکھ ہے۔ جو شخص پاکستان کے بدترین دشمن بھارت کی آبادی ایک ارب 300 کروڑ بتاتا ہے اور اتنا بھی نہیں جانتا کہ 300 کروڑ 3 ارب ہوتے ہیں، گویا اُس کے حساب سے بھارت کی آبادی 4 ارب ٹھہری، وہ ایٹمی پاکستان کا وزیرِاعظم، ہے ناں حیرت کی بات؟ جس شخص کی کرپشن کی داستانیں زباں زَدِعام وہ دوسروں کو چور اور ڈاکو کہے تو حیرت ہوتی ہے۔ جو شخص وزارتِ عظمیٰ کے حصول کے لیے کسی بھی حد تک گزر جائے اُسے محبِ وطن کون کہہ سکتا ہے۔ جس شخص نے کبھی آئین کی پرواہ کی ہو نہ قانون کی وہ اور سب کچھ تو ہو سکتا ہے، سیاسی رَہنماء ہرگز نہیں۔

2014ء کے دھرنے میں اُس وقت کے آئی ایس آئی چیف جنرل ظہیر الاسلام کی تھپکی پر اُس نے آئین وقانون کو اپنے پاؤں تلے رَوندتے ہوئے سول نافرمانی کا اعلان کیا، یوٹیلٹی بِلز جلائے، رقم ہُنڈی کے ذریعے بھیجنے کا کہا، پی ٹی وی پر قبضہ کیا، وزیرِاعظم ہاؤس پر حملہ کیا، پارلیمنٹ ہاؤس کے گیٹ توڑے لیکن قانون اُس کا کچھ نہ بگاڑ سکا کہ اُس وقت زورآور اُس کی پُشت پر تھے۔ آج زورآور نیوٹرل ہونے کا اعلان کر چکے مگر پھر بھی وہ کچھ لوگوں کے نزدیک ابھی بھی “لاڈلا” ہے۔

ذاتی طور پر بُزدل انسان کی بڑھکوں سے ثابت ہوتا ہے کہ اب بھی کچھ ہاتھ اُسے سنبھالے ہوئے ہیں وگرنہ یہ کیسے ممکن ہے کہ سپریم کورٹ کے 7 اپریل 2022ء کے فیصلے کے مطابق اُس کی صریحاََ آئین شِکنی کے باوجود اُس پر ہاتھ نہ ڈالا جا سکے۔ اُدھر میاں شہبازشریف کی غالباََ پالیسی یہ ہے کہ جن لوگوں نے عمران خاں کو مسلط کیا تھا، اب وہی بھگتیں لیکن عمران خاں کو دی جانے والی ڈھیل اور مفتاح اسماعیل کے ہاتھوں مہنگائی کے ٹوٹتے ریکارڈ نے مسلم لیگ کو بہت پیچھے دھکیل دیا ہے۔ کیا یہ بہتر نہ ہوتا کہ تحریکِ عدم اعتماد کی کامیابی کے ساتھ ہی نوازلیگ عام انتخابات کی طرف قدم بڑھاتی یا پھر ہمت کرکے فتنۂ عمرانیہ کی بیخ کنی کی طرف چل نکلتی۔ ہم نے تو اُس وقت بھی یہی مشورہ دیا تھا کہ

پکڑ کے زندہ ہی جس درندے کو تم سدھانے کی سوچتے ہو

بدل سکے گا نہ سیدھے ہاتھوں وہ اپنے انداز دیکھ لینا

اتحادی حکومت کی کمزوری کے باعث اب صورتِ حال 2014ء کے دھرنے جیسی ہو چکی ہے۔ اُن دنوں جب عمران خاں پر کیسز بنے اور اُنہیں مفرور قرار دیا گیا تو پھر بھی اُنہیں گرفتار کرنے کی کسی کو ہمت نہ ہوئی۔ اُس وقت نعیم الحق مرحوم نے طنزیہ انداز میں کہا تھا “عمران خاں بنی گالہ میں بیٹھا ہے، کسی میں ہمت ہے تو جاکر اُسے گرفتار کر لے”۔ تب بھی عمران خاں گرفتار نہ ہو سکے اور آج بھی وہی دھمکیاں جاری ہیں۔ علی امین گنڈاپور نے کہا “میں عمران خاں کی گرفتاری کی احمقانہ سوچ رکھنے والوں کو خبردار کرتا ہوں کہ اگر اُنہوں نے ایسی کوشش کی تو ہم عوامی طاقت سے اسلام آباد کو ٹیک اووَر کر لیں گے”۔