سابق ایڈیشنل آئی جی سی ٹی ڈی نے جے آئی ٹی کو اپنے بیان میں کہا ہے کہ ذیشان کا تعلق داعش سے تھا اور وہ کئی کارروائیوں میں سہولت کار بھی تھا۔

سانحہ ساہیوال کیلیے بنائی گئی جے آئی ٹی کے سامنے سی ٹی ڈی کے ملوث اہلکاروں اور آپریشن کے دوران فون پر رابطے میں رہنے والے افسران کے بیانات قلمبند کرانے کاسلسلہ جاری ہے۔

ذرائع کے مطابق سابق ایڈیشنل آئی جی سی ٹی ڈی رائے طاہر جمعرات کو جے آئی ٹی کے سامنے پیش ہوئے، انھوں نے بتایاکہ ساہیوال آپریشن سے 2 روز قبل 17جنوری کو ذیشان کی گاڑی کا نمبرLEA6683-12 سیف سٹی اتھارٹی کی واچ لسٹ میں شامل کرا دیاگیاتھا۔

انہوں نے بتایا کہ کہ 19جنوری کو صبح 9:30 بجے گاڑی نے مانگا منڈی کو عبور کیا توسیف سٹی کیمروں نے الرٹ جاری کردیا جس پر سیف سٹی انتظامیہ نے سی ٹی ڈی کو گاڑی شہر سے باہر جانے کی اطلاع دی۔

حکام نے بلاتاخیر لاہورسے ایک ٹیم ایس ایس پی جواد قمر کی سربراہی میں ان کے پیچھے روانہ کی جبکہ دوسری جانب ساہیوال میں بھی سی ٹی ڈی ٹیم کو سفید گاڑی سے متعلق آگاہ کیاگیا، جیسے ہی مشتبہ گاڑی نے ساہیوال ٹول پلازہ کراس کیا تو سی ٹی ڈی ساہیوال کی ٹیم نے تعاقب شروع کردیا اور قادرآباد پہنچتے ہی گاڑی روکنے کیلیے ٹائروں پر گولیاں ماریں لیکن اس کے باوجود ذیشان نے گاڑی نہیں روکی۔

سابق ایڈیشنل آئی جی نے کہا کہ آپریشنل ٹیم کو خدشہ تھ اکہ گاڑی میں موجود چاروں افراد دہشت گرد ہیں اور وہ تخریب کاری کیلیے خودکش جیکٹس اور دھماکا خیزمواد ساتھ لے جارہے ہیں۔

گاڑی کے بائیں جانب پچھلے دروازے کے شیشہ پر کالا رنگ ہونے کی وجہ سے اہلکاروں کو بچوں کی موجودگی کاعلم نہ ہوسکا، فائرنگ شروع ہوتے ہی اگلی سیٹ پر بیٹھے مہر خلیل نے اپنی بیٹی منیبہ اور پچھلی سیٹ پر اس کی بیوی نبیلہ نے باقی دونوں بچوں عمیر اور ہادیہ کوفوری طورپر اپنے پیروں میں بٹھالیا، ان کے نیچے جھکنے کی وجہ سے آپریشنل ٹیم کو تاثر ملا کہ وہ بارودی مواد کی مددسے حملہ کرنے لگے ہیں جس کے فوری بعد اہلکاروں نے فرنٹ اسکرین پرفائرکیے، 2سے 3گولیاں ڈرائیونگ سیٹ پر بیٹھے ذیشان کول گیں اور گاڑی دیوار سے جا ٹکرائی۔

انہوں نے مزید بتایا کہ سی ٹی ڈی ٹیم نے شیشے ٹوٹنے کے بعد بچوں کو دیکھتے ہی فائرنگ روک لی اورانھیں گاڑی سے باہر نکالا، اس دوران اہلکاروں کو پچھلی سیٹ پر زخمی حالت میں بیٹھی اریبہ پرشک ٹھہرا کہ اس نے خودکش جیکٹ پہن رکھی ہے، اسی خدشے کی وجہ سے بچوں کو گاڑی سے نکالتے ہی دوبارہ فائرنگ کرنا پڑی جس سے گاڑی میں موجود چاروں افراد کی موت واقع ہوگئی، آپریشن مکمل کرنے کے بعد سی ٹی ڈی ٹیم تینوں بچوں کو ساتھ لے کر اسپتال چھوڑ آئی۔

ذرائع کے مطابق ایڈیشنل آئی جی رائے طاہر مقتول ذیشان سے متعلق ملنے والی معلومات کی بنیاد پر ابھی تک اسے دہشت گرد قرار دے رہے ہیں۔

ان کا دعویٰ ہے کہ ذیشان کا تعلق کالعدم تنظیم داعش سے ہے اور وہ دہشت گردوں کیلیے بطور سہولت کارکئی کارروائیوں میں حصہ لے چکاتھا۔

سی ٹی ڈی کے سابق سربراہ رائے طاہر جے آئی ٹی کو مبینہ دہشت گرد ذیشان کی لاہورمیں عدم گرفتاری سے متعلق کوئی مناسب جواب نہ دے سکے۔

دوسری جانب سانحہ ساہیوال میں ہلاک ہونے والے افراد کے ورثا کو حساس اداروں کے خلاف استعمال کرنے کی چال کامیاب نہ ہوسکی، خلاف نعرے بازی دیکھ کر احتجاج کیلیے مال روڈ پر آئے متاثرین گھروں کو واپس چلے گئے، مقامی کالج کے پروفیسر اور طالب علم ایک ہفتہ قبل متاثرین کے گھر گئے اور انھیں اتوار کے روز انصاف کے حصول کیلیے مال روڈ پر ریلی نکالنے کا کہا جس پر ورثا تیار ہوگئے۔

واضح رہے کہ طلبا اور پروفیسرز کے اسی گروپ کے چند افراد کے خلاف تھانہ گلبرگ میں حساس اداروں کے خلاف نعرے بازی اور ریاست مخالف سرگرمیوں میں ملوث ہونے کا مقدمہ بھی درج ہے۔