بولی وڈ اداکارسوشانت سنگھ راجپوت کومداحوں سے بچھڑے ایک سال ہو گیا 34 سالہ سوشانت سنگھ راجپوت کی موت نے ایک بار پھر بھارت سمیت دنیا بھر میں ان کے مداحوں کو غمزدہ کردیا ہے اور اداکار کی موت ایک بار پھر ٹوئٹر پر ٹاپ ٹرینڈ ہے –

سوشانت سنگھ راجپوت نے بھارتی ریاست مہاراشٹر کے دارالحکومت ممبئی کے پرتعیش علاقے ویسٹ باندرا میں اپنی رہائش گاہ پر اپنے دوستوں اور ملازمین کے ساتھ رہنے کے باوجود اپنی زندگی کا خاتمہ کیا تھا-

پولیس کو ان کی رہائش گاہ سے ان کے علاج و معالجے کے دستاویزات ملے تھے جس سے اندازہ لگایا گیا کہ وہ ڈپریشن کا علاج کروا رہے تھے۔

اداکار کے قریبی دوستوں کے ذرائع کا کہنا تھا کہ وہ گزشتہ چند ماہ سے ڈپریشن اور ذہنی دباؤ کا شکار تھے، تاہم ان کی پریشانی میں کورونا کے باعث لاک ڈاؤن ہونے کے باعث اضافہ ہوا –

بعد ازاں سوشانت کے مداحوں نے اداکار کی گرل فرینڈ ریا وتی کو موردالزام ٹھہراتے ہوئے ان کے خلاف کاروائی کا مطالبہ کیا 25 جولائی کو سوشانت سنگھ کے والد کی جانب سے درج کرائی گئی ایک ایف آئی آر میں ریا پر سوشانت کو خودکشی کے لیے مائل کرنے کا الزام عائد کیا گیا۔

انہوں نے ریا پر سوشانت کا پیسہ چوری کرنے، انھیں نشہ آور ادوات دینے، ان کی ذہنی صحت کے بارے میں لوگوں کو بتانے کی دھمکی دینے کے علاوہ خاندان سے دور کرنے کا الزام بھی عائد کیا تاہم وہ اس چیز کی تردید کرتے ہیں کہ ان کے بیٹے کسی قسم کے ذہنی مسائل سے دوچار تھے۔

سوشانت سنگھ راجپوت نے کیریئر کا آغاز 2008 میں ٹی وی سے کیا تھا، تاہم انہوں نے 2013 میں فلمی کیریئر کا آغاز کیا ، انہوں نے اب تک محض ایک درجن فلموں میں ہی کام کیا تھا۔

سوشانت سنگھ راجپوت کی فلموں میں کائی پو چے، شدھ دیسی رومانس، پی کے، ڈیٹیکٹو بایو مکیش بخشی، ایم ایس دھونی: دی یونائیٹڈ اسٹوری ، رابطہ، ویلکم ٹو نیویارک، کیدرناتھ، سون چڑیا، چھچھورے اور ڈرائیو شامل ہیں۔

سوشانت سنگھ راجپوت کو ان کے 12 سالہ کیریئر کے دوران 20 کے قریب ایوارڈز کے لیے نامزد کیا گیا اور انہوں نے 9 ایوارڈز جیتے، انہوں نے بہترین ڈیبیو اداکار، بہترین پاپولر اداکار اور بہترین اداکار کے فلم فیئر، اسکرین ایوارڈ اور زی سائن ایوارڈز جیتے۔

انہیں سب سے زیادہ شہرت عامر خان کی فلم پی کے میں پاکستانی مسلمان لڑکے سرفراز کا کردار ادا کرنے سے ملی، جس سے فلم میں بھارتی ہندو لڑکی یعنی انوشکا شرما محبت کرتی ہیں۔