اگر آپ ایک بے روزگار نوجوان ہیں ۔ نا ہی کوئی نوکری ہے اور نا ہی کوئی کاروبار کرنے کے لئے سرمایہ رکھتے ہیں تو میری آج کی یہ تحریر آپ ہی کے لئے ہے ۔ یقین مانیں اگر بے روزگاری میں حوصلہ نہ ہارا جاے اور مایوس ہونے کی بجاے اپنی سوچوں کا مرکز حل ” تلاش” کرنے میں لگا دیا جاے تو ایسا کوئی راستہ نظر آ ہی جاتا ہے جس میں اپنی موجودہ صلاحیت و وسائل کے مطابق روزگار کی شروعات ہو سکے ۔

تو جناب اگر آپ کے پاس موبائل ہے اور ڈیٹا پیکج بھی ہے تو ذرا ڈراپ شپنگ کاروبار کے بارے میں جانئے ، سیکھئے اور شروع کر دیجئے ۔ میں بھی آپ کو آج اسی حوالے سے کچھ رہنمائی کرنا چاہوں گا کہ یہ ایک ایسا بزنس ماڈل ہے جو بغیر سرمایہ یا بہت کم سرمایہ ( صرف پانچ ہزار ) تک شروع کیا جا سکتا ہے ۔ اس میں صرف چاہیے ہو گا آپ کا وقت ، نیٹ ورکنگ اور ڈھیر ساری مثبت سوچیں تاکہ آپ ساتھ ساتھ کچھ منفرد سوچتے رہیں جو کہ اس ڈراپ شپنگ کاروبار کی کامیابی کے لئے نہایت ضروری ہے ۔

تو چلئے اب آپ کو ایک ترتیب سے وہ اہم کام بتاتا ہوں جو آپ نے ڈراپ شپنگ کاروبار کے آغاز کے لئے کرنے ہیں ۔

1۔ جیسا کہ میں اوپر بھی بتا چکا کہ پہلے خود سے اس بزنس ماڈل کے بارے جانیں ۔ اس موضوعات پر یو ٹیوب پر موجود ویڈیوز کو لازمی دیکھیں ۔

2۔ ڈراپ شپنگ کاروبار دراصل ای کامرس کا حصہ ہے جس میں ویب اسٹور ( آن لائن دکان ) بنا کر کام کیا جاتا ہے ۔ فرق صرف یہ ہے کہ اس دکان میں جو چیزیں آپ فروخت کے لئے پیش کرتے ہیں ان کا آپ کے پاس ہونا بالکل بھی ضروری نہیں ہے ۔

3۔ سب سے پہلے صرف چند چیزوں سے آغاز کرنا ہے تو ابھی سے سوچ لیں کہ وہ کیا ہو سکتیں ہیں ؟ گارمنٹس ، موبائل ، لیپ ٹاپ ، جیولری، ہینڈ بیگز ، گروسری آئٹم وغیرہ ۔مزید آسان الفاظ میں یہ کہ آپ نے کس چیز کی آن لائن دکان کھولنی ہے؟ میرا مشورہ ہے کہ ابتدا میں کسی بھی کیٹیگری کی صرف چند آئٹمز لیں ۔

4۔ جو آئٹمز آپ نے سیل کرنے کا ارادہ کیا ہے اس کی ہول سیل مارکیٹ کا وزٹ کر کے قیمت کا اندازہ لیں ۔ مختلف ہول سیلرز سے ملیں ۔ آئیڈیا لگائیں کہ ڈیلیوری چارجز اور منافع رکھنے کے بعد اپنی منتخب کردہ آئٹمز کتنے میں سیل کریں گے ۔ یہیں آپ نے یہ بھی چیک کرنا کا دوسرے لوگ انہی آئٹمز کو کتنے میں سیل کر رہے ہیں ۔

5. اب آپ نے ہول سیلر سے یہ بات طے کرنی ہے کہ آپ کو اس سے فی الحال اپنی منتخب کردہ آئٹمز کی تصویریں اور ویڈیوز بنانی ہے ۔ اور جب آرڈر آے گا تو تب آپ ان سے وہ آئٹمز ہول سیل قیمت پر خرید لیں گے ۔ اس بات کا دھیان رہے کہ وہ آئٹم جب ان کے اسٹاک کے ختم ہو تو آپ کو بھی پتہ چل جانا چاہیے ۔

6۔ اب اگلے مرحلے میں اپنی دکان کی مناسبت سے فیس بک پیج یا ویب سائٹ بنائیں ۔ بہتر ہو گا کہ ساتھ ہی واٹس ایپ بزنس اکاؤنٹ بھی بنا لیں ۔ شروع میں بہتر ہے صرف فیس بک پیج سے آغاز کریں مگر کچھ عرصہ تک ویب سائٹ بھی تیار کر لیں گے تو کسٹمرز کی آسانی و اعتماد بحال رکھنے کے بہت کام آے گی ۔

7۔ اگلے مرحلے میں اپنے آئٹمز کی تصاویر و ویڈیوز مختصر ڈیٹیل کے ساتھ اپنے فیس بک پیج پر پوسٹ کریں جس میں شامل ہے؛ پروڈکٹ کی خصوصیات، فوائد، قیمت اور آرڈر دینے کا طریقہ وغیرہ ۔ یاد رہے کہ اگر آپ نے تصویریں اور ویڈیوز موبائل سے بھی بنائیں ہے تو بھی پروفیشنل ہونی چاہیں ۔ اس کا طریقہ کار بھی آپ یو ٹیوب سے سیکھ سکتے ۔

8۔ اب آتا ہے مرحلہ سب سے اہم کام کا اور وہ ہے مارکیٹنگ کا ۔ جس کے لئے آپ مختلف فیس بک گروپس جوائن کر سکتے ہیں ۔ زیادہ بہتر ہو گا اگر آپ فیس بک “پوسٹ بوسٹ” کی آپشن کا استعمال کریں جس میں روزانہ معمولی رقم سے بہت سارے لوگوں تک اپنی پروڈکٹ کی فیس بک مارکیٹنگ کروا کر اچھا فائدہ اٹھا سکتے ہیں ۔ اس بارے بھی تفصیلی معلومات آپ کو یو ٹیوب سے مل سکتی ہے ۔۔