انور مقصود خوش قسمت ہیں کہ اردو ادب، تحریک پاکستان اور دوسری شخصیات سے مسلسل رابطے میں ہیں۔ ہم نے سوچا ہم بھی ایک آدھا خط لکھ دیں شاید جواب آجائے۔ سوچنے لگے کہ کس سے خط و کتابت کی ابتدا کی جائے، جو پہلا نام ذہن میں آیا وہ تھا شاعرِ مشرق علامہ محمد اقبال کا۔ ان کو ایک خط بھیجا۔ انہوں نے اسکا جواب لکھ بھیجا ہے جو آپ سب کے ساتھ شیئر کر رہا ہوں۔

بیٹا ضیاء،

تمہارا خاط ملا، انور مقصود کے بعد تم پہلے انسان ہو جس نے ہم سے رابطہ کیا۔ جس وقت تمہارا خط ملا محمد علی جناح آئے ہوئے تھے، حقے کی چلم تیار کرنی تھی لیکن آگ کا بہت مسئلہ ہے۔ دوسری جانب والے حضرات کو اس معاملے میں آرام ہے لیکن یہاں یہ سہولت موجود نہیں۔ زمین پر موسم کی کیفیت دیکھ کر یہاں آگ لگانے پر سخت پابندی ہے، محمکہ موسمیات کافی سخت ہے۔ پاشا کو تو تم جانتے ہی ہوگے، جب سے آئے ہیں ضیاء (تم نہیں دوسرے والے) کے ساتھ مل کر محکمہ موسمیات کا کنٹرول اپنے ہاتھ میں لے لیا ہے۔ پہلے پہل تو یہی کہتے تھے کہ کچھ عرصہ تک سب ٹھیک کر کے محکمہ لیاقت علی خان کو سونپ دیں گے لیکن پرانی عادتیں ہیں کہ مر کر بھی نہیں جاتیں۔ آٹھ برس ہونے کو ہیں ابھی تک محکمے کے چیئرمین ہیں۔

چائے کا یہاں ہرگز مسئلہ نہیں دودھ کی فراوانی ہے ذرا دن چڑھتا ہے تو نہر سے گرم دودھ لیکر چائے بنا لیتے ہیں۔اپنے خط میں جناح کے بارے تم نے پوچھا تھا، وہ یہاں بہت خوش ہیں، شام ہوتے ہی سرسید احمد خاں کے ساتھ شطرنج کی بازی لگاتے ہیں، علی گڑھ کالج کے لڑکے بھی آجاتے ہیں، شطرنج کے بعد رات کو خبرنامہ چلتا ہے تو جناح خاموشی سے اٹھ کر چلے جاتے ہیں، ہم نے بہت پوچھا کہ آپ خبرنامہ کیوں نہیں دیکھتے؟ لیکن جواب میں بس خاموش ہوکر ہلکا سا مسکرا دیتے ہیں، شاید ملک کے حالات دیکھ کر اداس ہو جاتے ہیں، معلوم نہیں اس بارے میں بات بھی بہت کم کرتے ہیں۔

کوئی دو ہفتے قبل یہاں میری سالگرہ منائی گئی تھی۔ چوہدری رحمت علی، سرسید احمد خاں، لیاقت علی خان، محمد علی جناح اور فاطمہ سمیت سب دوستوں نے بھرپور شرکت کی۔ فیض اور جالب نے خصوصی طور پر کہا ہوا تھا کہ ہمیں بھی مدعو کیجئے گا اس لئے وہ بھی شامل تھے۔ذوالفقار علی بھٹو بھی آنا چاہ رہا تھا لیکن جناح اڑ گئے کہ اگر وہ آئے گا وہ میں ہرگز شریک نہیں ہونے والا، فاطمہ نے سمجھایا کہ اب ان باتوں کو چھوڑئیے، ہم کیک کاٹ کر واپس آجائیں گے لیکن جناح نہیں مانے، کہنے لگے جو کیک میں دے کر آیا اس کو کاٹ کر بانٹ دیا، ذولفقار نے حالات دیکھ کر خود ہی آنے سے انکار کر دیا۔سالگرہ میں خوب مزہ آیا، مغرب پڑھ کر سب دوستوں نے مل کیک کاٹا، شام کا وقت تھا گرم دودھ ملنا مشکل ہو جاتا یہ سوچ کر کھانے سے پہلے ہی چائے کا دور چلا۔ کھانا کھا کر سب اپنے اپنے گھروں کو ہو لئے۔ قائد کو یہاں ایک محل نما گھر الاٹ کیا گیا تھا انہوں نے لینے سے انکار کر دیا، کہنے لگے کسی اور کے کام آجائے گا۔ اب لیاقت علی خان کے ساتھ ان کے کوارٹر رہتے ہیں۔

اس ماہ جناح کی سالگرہ بھی آرہی ہے، بے نظیر بھٹو کی فاطمہ سے اچھی دوستی ہو گئی ہے۔ اس کی کوشش ہے کہ جناح اور ذولفقار کے درمیان معاملات کو درست کیا جائے تا کہ ذولفقار بھی جناح کی سالگرہ میں شریک ہو سکے۔ کل میری اسی سلسلے میں ایوب خان سے بھی ملاقات ہوئی تھی لیکن وہ جناح سے بھی زیادہ غصہ ہیں۔ کہتے ہیں اس معاملے میں مجھے مت گھسیٹیں میں بول پڑا تو بہت سی پرانی باتیں نکل آئیں گی۔ فی الحال اس مسئلہ کا کوئی حل نہیں نکل رہا۔ تمہارے پاس کوئی حل ہو تو ضرور بتانا۔

مجھے سیالکوٹ کے بارے میں تم نے کچھ نہیں لکھا، اگلی بار جب بھی خط لکھو مجھے ضرور بتانا کہ میرا سیالکوٹ کیسا ہے۔ آباد رہو اور وہیں رہو، لکھتے رہو اور انور مقصود ملے تو کہنا اقبال پوچھ رہے تھے کہ تم نے خط لکھنا کیوں چھوڑ دیا؟