پانچ اگست2019کو مودی سرکار کی جانب سے جموں کشمیر لداخ کی خصوصی حیثیت سے متعلق ہندوستانی آئین کی دو اہم شقوں کے خاتمے کے بعد اور مورخہ 12 اگست 2019 کو پاکستان تحریک انصاف کے رہنما اور پاکستان کے وزیر خارجہ شاہ محمود قریشی کی جانب سے مظفر آباد میں پریس کانفرنس کرتے ہوئے گلگت بلتستان کو کسی قسم کا صوبہ بنانے کی کوششوں سے انکار پر گلگت بلتستان میں سٹیٹ سبجیکٹ کا مطالبہ اس وقت سوشل میڈیا پر ٹاپ ٹرینڈ بنا ہوا ہے۔ ہر کوئی یہی سوال اُٹھا رہا ہے کہ گلگت بلتستان میں اسٹیٹ سبجیکٹ کی خلاف ورزی سب سے پہلے کس نے کی؟ اور کون اس کام کو انجام دینے کیلئے کلہاڑی کے دستے کے طور پر استعمال ہوئے۔

لہذااس حوالے سے اگر ہم ماضی میں پلٹ جائیں تو اس قانون کی خلاف ورزی میں گلگت بلتستان کے مذہبی اکابرین کا ہی ہاتھ نظر آتا ہے۔ کیونکہ یہ بات تاریخ کا حصہ ہے کہ 1956 میں سکندر مرزا کے دور میں اُس وقت کو پولیٹیکل ایجنٹ سردار جان محمد خان نے ایک سازش کے تحت اُس وقت کی کچھ مقامی مذہبی شخصیات مرحوم آغا برمس اور مرحوم مولوی گلمتی کو اعتماد میں لیا۔ حالانکہ یہ دونوں شخصیات اس حوالے سے مجازاتھارٹی نہیں تھے لیکن اُن کے سامنے گلگت بلتستان میں سٹیٹ سبجیکٹ کی خلاف ورزی کیلئے دلیل پیش کی کہ اس قانون کی وجہ سے گلگت بلتستان میں ترقی اور تعمیر کا دروازہ ہمیشہ بند رہے گا کیونکہ جب تک باہرسے لوگ کاروبار کیلئے یہاں نہ آئے گا تو یہاں کاروبار کیسے ہوگا نظام زندگی کیسے چلے گی۔

اُس وقت بھی چونکہ لوگ قلیل تعداد میں اپنے حقوق کیلئے متحرک تھے اُن میں کشروٹ سے تعلق رکھنے والے مرحوم غلام محمد غون جو اُس وقت قوم پرست لیڈر ہوا کرتے تھے۔ اُنہوں نے اس فیصلے کے خلاف ٹھیک ٹھاک مزاحمت کی، اُنہیں مزاحمت پر پولیٹیکل ایجنٹ کے زرخرید مقامی افراد کی جانب سے مارنے پیٹنے اور سٹیٹ سبجیکٹ ختم کرنے کی خبروں پر گلگت میں لوگوں نے احتجاج کرنے کے واقعات اورجس کے نتیجے میں چھ سے زیادہ لوگوں کی گرفتار ی اور عوام کا جیل کو توڑنا جیسے افسوناک واقعات پیش آنا بھی تاریخ کا حصہ ہے۔ آگے جاکر ذوالفقار علی بھٹو کے دور میں متنازع حیثیت کےباوجودسٹیٹ سبجیکٹ رول کی خلاف ورزی پر عملی کام شروع ہواجس کے تحت 1974 میں اُس وقت کے ڈی سی نے حکم دیا کہ جن بھی غیرریاستی باشندوں نے گزشتہ پانچ سالوں میں گلگت بلتستان کے اندر زمین خریدی ہے وہ یہاں کا ڈومیسائل حاصل کرسکتےہیں۔ یوں ہم کہہ سکتے ہیں کہ اسکندر مرزا کے دور میں راہ ہموارکرکے بھٹو کے دور میں خلاف ورزی کا باقاعدہ آغاز کرد۔

لیکن اس کے باوجود ریاست پاکستان گلگت بلتستان میں اسٹیٹ سبجیکٹ کی موجودگی کا اعلان بھی کرتے رہے ہیں اور دفتر خارجہ کی طرف سے تازہ ترین بیان جمعہ 5اپریل 2019 کی بریفنگ میں آیا جب صحافی کے سوال پر دفتر خارجہ کے ترجمان نے گلگت بلتستان میں یہ قانون نافذ ہونے کا دعویٰ کیا لیکن عملی طور پر خلاف ورزی ہورہی ہے ۔

اسی تناظر میں چند ماہ قبل شدید عوامی مطالبے کو دیکھ کر موجوہ وقت میں مسلم لیگ ن میں شامل سپیکر گلگت بلتستان قانون ساز اسمبلی فدا محمد ناشاد نے اخبار ی بیان دیا کہ سٹیٹ سبجیکٹ کی خلاف ورزی قانون ساز اسمبلی میں ایک قرارداد سے رُک سکتی ہے۔ یہی وجہ ہےقانون ساز اسمبلی میں اپوزیشن لیڈر کپٹن ریٹائرڈ محمد شفیع خان اور دیگر اپوزیشن اراکین قوم پرست رہنما نواز خان ناجی او ر پیپلزپارٹی کے ممبر اسمبلی جاوید حسین کی جانب سے گلگت بلتستان میں سٹیٹ سبجیکٹ کی خلاف ورزی روکنے کیلئے سمری تیار کی گئی ،جسے باقاعدہ طور پر اسمبلی میں زیر بحث لانے کیلئے ہاؤس ایڈوائزی کمیٹی کے سامنے پیش کیا گیا۔ لیکن میڈیا رپورٹ کے مطابق ایڈوائزی کمیٹی میں اس بل کی سب سے پہلے مسلم لیگ ن سے تعلق رکھنے والے اسپیکر گلگت بلتستان قانون ساز اسمبلی فدا محمد ناشاد اور مسلم لیگ ن کے وزیر قانون اورنگزیب خان اور ایم ڈبلیو ایم سے تعلق رکھنے والے ممبر اسمبلی حاجی رضوان نے دیگر ممبران کی رائے لئے بغیر ہی بل کو غداری قرار دیکر مستردکردیا ۔

ستم ظریفی یہ بھی ہے کہ آج یہی لوگ جموں کشمیر لداخ میں آرٹیکل 370 اور آرٹیکل 35A کی خاتمے پر احتجاج کرتے نظر آتے ہیں۔ حالانکہ گلگت بلتستان ریاست جموں کشمیر کی سب سے بڑی اکائی ہے اور ہمارے عوام کا اس خطے کو پاکستان میں شامل کرنے کیلئے مطالبات کے باوجود ریاست کا قومی بیانیہ یہی ہے کہ گلگت بلتستان ریاست جموں کشمیر کا حصہ ہے لیکن قوانین پہلے جموں کشمیر لداخ اور آزاد کشمیر سے مختلف تھے اور آج آزاد کشمیر سے مختلف طور پر لاگو ہیں۔