آدھی چھٹی ۔۔۔۔
محفل عروج پر تھی
اور
ہم نے معذرت کرکے رخصت لی۔
اب
اپنی ذات کی انجمن میں
رونق افروز ۔
خوب بھرا میلہ ہے
ادھر بھی۔
نہ کسی معصوم بھروسے کے
ٹوٹنے کا ڈر۔
نہ حسن ظن،
نہ بدظن خیال ۔
کسی نادانستہ غلطی کا
احساس جرم۔
نہ بے اعتنائی کا قلق،
نہ ہی کشکول کی حاجت ۔
نہ وضاحت، نہ جراحت کردار ۔
نہ انگشت بدنداں حیرانی۔
اپنی ذات کی بزم میں عجب تریاق زہر ہے
کہ موت کے حلق میں اترنے سے پہلے
امرت بن کر زندہ کردے۔
شہر کے ہاتھوں پر
نشان مل بھی جائے تو کیا؟
نہ منصف کی تمنا
نہ میزان پر دستک۔
کوئی شکوہ نہ
دل میں رکھی کسی کی بات بے بات ان کہی چبھن ۔
اپنا آئینہ ،اپنی مسکراہٹ ،اپنی گنگناتی ذات۔
بڑی ہی بے ضرر سی، شوخ و چنچل ہے۔
اپنی ذات کی انجمن۔
جیسے کسی مکتب کے بچے
آدھی چھٹی پر میدان میں اترے ہوں ۔
صادقہ نصیر۔
Facebook Comments
بذریعہ فیس بک تبصرہ تحریر کریں