صدر بائیڈن کے  بیٹےہنٹر بائیڈن پر اسلحہ رکھنے کے وفاقی قوانین کی خلاف ورزی پر فرد جرم عائد،25سال قید سزا ہوسکتی ہے  ۔
غیر ملکی میڈیا کے مطابق پلی بارگین ختم ہونے پر امریکی محکمہ انصاف نے ہنٹر بائیڈن پر باقاعدہ 3 الزامات عائد کر دیے ہیں۔فرد جرم کے مطابق ہنٹر بائیڈن نے 2018 میں اسلحہ خریدتے وقت منشیات کے استعمال سے متعلق غلط بیانی کی تھی۔یہ ہنٹر بائیڈن کے بارے میں طویل عرصے سے جاری تحقیقات میں اب تک کا تازہ ترین اور سب سے ٹھوس ا قدام ہے۔
بائیڈن پر الزام ہے کہ انہوں نے اپنے منشیات کے استعمال کے بارے میں اس وقت جھوٹ بولا تھا جب انہوں نے اکتوبر 2018 میں آتشیں اسلحہ خریدا تھا۔ڈیلاویئر کی وفاقی عدالت میں دائر فرد جرم کے مطابق ایسااس عرصے میں ہوا جب ہنٹر نے کوکین کی لت سےنجات پانے کی کوشش کا اعتراف کیا تھا، صدر بائیڈن کے بیٹے کے کاروباری معاملات کی بھی تحقیقات کی جا رہی ہیں۔ہنٹر بائیڈن سے ان کے کاروباری معاملات کے بارے میں بھی تفتیش کی گئی ہے۔ کیس کی نگرانی کرنے والے اسپیشل کونسل نے کہا ہے کہ وقت پر ٹیکس ادا کرنے میں ناکامی کے الزامات واشنگٹن یا کیلی فورنیا میں دائر کیے جا سکتے ہیں، جہاں وہ رہتے ہیں۔

تین الزامات پر مبنی فرد جرم میں کہا گیا ہے کہ ہنٹر بائیڈن نے اکتوبر 2018 میں ولمنگٹن، ڈیلاویئرکی ایک ’گن شاپ‘ سے” کولٹ کوبرا اسپیشل “خریدی تو انہوں نے گن کی خریداری کے لیے درکار فارم پر جھوٹ بولا تھا۔

Advertisements

ان پر یہ کہہ کر دروغ گوئی کا الزام لگایا گیا ہے کہ انہوں نےاس بارے میں باکس کو غلط طریقے سے چیک کیا کہ وہ منشیات کا استعمال نہیں کرتے یا اس کے عادی نہیں ہیں اور منشیات کے استعمال کے ساتھ بندوق کو غیر قانونی طور پر رکھنے کا تیسرا الزام عائد کیا گیا ہے۔
ان میں سے دو الزامات میں 10 سال تک قید کی سزا دی جا سکتی ہے جبکہ تیسرے کے جرم ثابت ہونے پر پانچ سال تک قید ہو سکتی ہے۔