یونان کے ساحلی علاقے میں تارکین وطن کی کشتی ڈوبنےکے حادثے میں بچ جانے والے افراد نے یونانی حکام کے خلاف مقدمہ دائر کر دیا۔

زندہ بچ جانے والے 40 افراد نے یونانی حکام کی غفلت کے خلاف مقدمہ دائرکیا ہے جس میں شکایت کی گئی ہےکہ یونانی حکام نے کشتی کے مسافروں کو بچانے کے لیے بروقت مناسب کارروائی نہیں کی۔

ایتھنز کی بحری امور سے متعلق عدالت میں دائر مقدمے میں الزام عائدکیا گیا ہےکہ یونانی کوسٹ گارڈ کشتی حادثے کے وقت کشتی سے 70 میٹر کے فاصلے پر تھے، یونانی حکام اور کوسٹ گارڈ کے مطابق وہ گھنٹوں کشتی کی نگرانی کرتے رہے لیکن انہوں نے الٹنے والی کشتی نکالنے کی کوشش نہیں کی۔

یاد رہے کہ رواں برس جون میں تارکین وطن کی کشتی اٹلی جاتے ہوئے یونان کے قریب بین الاقوامی پانیوں میں ڈوبی تھی۔

Advertisements

کشتی میں پاکستان، شام اور مصر کے 400 سے 750 تارکین وطن سوار ہونے کا بتایا گیا تھا، کشتی کے صرف 104 مسافر بچے تھے جب کہ 82 لاشیں سمندر سے نکال لی گئی تھیں۔