ماحل اس کونج کی طرح ہے جو آکاش پر اُڑتے وقت بھی دھرتی سے جُڑی رہتی ہے
وہ آکاش کی وسعتوں میں اُڑتی پھرتی ہے پر اس کا دل دیس کی گلیوں میں رُلتا رہتا ہے
ماحل بلوچ دھرتی کی آخری کونج تھی، کُوک تھی، ایسی کُوک جس کُوک کو سُن کر پورا دیس جاگ جائے
آج ماحل بلوچ کے بچے جاگ رہے ہیں اور بلوچ دھرتی سو رہی ہے،بلوچ شعور سو رہا ہے، بلوچ قلم سو رہی ہے، بلوچ ذہن سو رہا ہے،بلوچ گیت سو رہے ہیں، بلوچ انقلاب سو رہا ہے، بلوچ سرمچار سو رہا ہے، بلوچ عقل سو رہی ہے اور بلوچ نوحہ نوحہ گر ہے۔۔پر بلوچ دھرتی کے عظیم پہاڑ جاگ رہے ہیں۔
اور شاید ہیں اس سفر کے جو سفر دھرتی کی محبت میں کیا جاتا ہے اور پہاڑ کی تنگ گلیاں ان پیروں کے لیے وسیع ہو جا تی ہیں۔بلوچ سیاست سو رہی ہے۔پر وہ چاند جاگ رہا ہے جو ان گھروں کا طواف کرتا ہے جو گھر دیس کا درد جھیلتے ہیں  اور دیے کی لَو کی طرح جلتے رہتے ہیں ۔

کیا اب ماحل کا گھر بھی دیس کے درد میں دِیے کی لَوکی طرح جلتا رہے گا؟

اور کیا چاند اب اس گھر کا بھی طواف کرے گا جس گھر میں اب ماحل نہیں ،پر وہ سسکتے بچے موجود ہیں جو اس ماحل کے دامن سے ایسے چھڑائے گئے جیسے کونج کے دامن سے بچے چھڑا کر کونج کو گھائل کیا جاتا ہے؟یہ درد تھا یا اعزاز کہ ماحل ایک دیش بھگت کی بیوی ہے اور اپنی محنت سے اپنی محبت کی نشانی کو پال رہی ہے۔دیس کے گیت گاتی ہے۔آنکھوؤں سے آنسو پونچھتی ہے اور جا تے سورج سے پوچھتی ہے کہ
”سحر کب ہوگی،جس کا وعدہ ہے؟“
بلوچ دھرتی گُنگ ہے اور پہاڑوں پر ماتم!
یہ ماتم میدانوں میں ہونا چاہیے تھا۔دھرتی جل جا تی اور کوئی ہاتھ جلے ہوئے پتھروں سے اداس پتھروں پر لکھتا
”مائیں محبت ہیں انہیں اذیت مت دو“
پر ایسا کچھ نہیں،بلوچ مائیں   مسافر بنیں اب تو آپ ہی درد ہیں،اب ان گم شدہ ناموں میں ان بلوچ ماؤں کے نام بھی درج ہونے لگے ہیں اور ماحل ایک اور اضافہ ہے۔ماحل ان گم شدہ ناموں میں فل  اسٹاپ نہیں پر وہ کامہ(،) ہے جس کے بعد اور نام درج ہو سکتے ہیں اور بلوچ دانش ہے تھر کی اس ریت کی طرح ثابت ہو رہے ہیں جو ہاتھوں میں اُٹھائی جائے تو بہہ جائے اور زمیں پر پڑی رہے تو ہوا سے اُڑتی رہے۔

حالاں کہ ہونا تو یہ چاہیے تھا کہ دیس کو جل جانا چاہیے تھا اور سب کو یہ بتا دینا چاہیے تھا کہ مائیں محبت ہیں پر دیس کی تنگ گلیاں کیا پر سوشل میڈیا کی وہ گلیاں بھی نہیں جل رہیں جن گلیوں میں بیٹھ کر شیخ رشید جیسے شیدو بھاشن ما رتے ہیں اور سوشل میڈیا کی سب گلیاں نمکین سگار کے دھونے سے بھر جا تی ہیں

مجھے نہیں معلوم کہ بلوچ یکجہتی کمیٹی کہاں ہے؟مجھے نہیں معلوم کہ بلوچ سیاسی اکابرین کہاں ہیں؟
پر مجھے یہ معلوم ہے کہ بلوچ دھرتی بھی یہیں ہے اور اس کا درد بھی یہیں  ہے
بلوچ مائیں بھی یہیں ہیں اور ان کے بے منزل سفر بھی یہیں  ہیں
اداس بیٹیاں بھی یہیں  ہیں اور ان کے بے سود احتجاج بھی یہیں  ہیں
مٹتی تصویریں بھی یہیں  ہیں اور اداس نین بھی یہیں  ہیں
راتیں بھی یہیں  ہیں اور ان راتوں کے رتجگے بھی یہیں  ہیں
مائیں بھی یہیں  ہیں اور ان کے ڈوبتے دل بھی یہیں  ہیں
مری ہوئی نیندیں بھی یہیں  ہیں اور پاگل ہو تی مائیں بھی یہیں  ہیں
تو دیس کی گلیاں کیوں نہیں جلتیں؟

Advertisements

بلوچ دانش کا احتجاج کیوں شور کی شکل نہیں لیتا؟بلوچ گیت کیوں نوحہ نہیں بنتے؟بلوچ موسیقار ایسی سیمفنی کیوں تخلیق نہیں کرتے جس سے پہاڑ چلیں نہ بھی تو بھی سرکیں تو سہی!
بلوچ ادیب درد کی دانھن(شور) کیوں نہیں بن جاتا
اور وہ دانھن سن کر پو ری بلوچ دھرتی ایسی کیوں نہیں بن جا تی جس کے لیے ایاز نے لکھا تھا کہ
”جڈھن دھرتی گاڑھو کھونبو تھی ویندی!“
”جب دھرتی دلہن کے لباس کی ماند سرخ ہو جائے گی!“
پر کب؟
جب دیس کی گلیوں میں یہ گونج رہ جائے گی  کہ
”ماحل محبت ہے!“
ماحل کونج ہے
دھرتی کی گونج ہے
جب زبانیں گُنگ نہیں ہو ں گی  اور ہاتھ آگے بڑھ کر ماحل کا نام پتھروں پر نقش کردیں گے
جب دھرتی کا پلو عیار ذہن کے بدلے فقیر کے ہاتھوں میں ہوگا
اور فقیر اپنا کستہ بجا کر صدا لگا ئے گا
”ماحل محبت ہے!“
جب پیڈ دانشور سب اچھا ہے نہیں لکھے گا
اور پے رول پر بیٹھا دانشور محبت کی باتیں چھوڑ کر درد کی باتیں لکھے گا
تب سب سے پہلے وہ لکھے گا
”ماحل محبت ہے!“
جب دیس کی گلیاں درد سے بھر جائیگی
اور اُڑتی دھول چھٹے گی
تو بوسیدہ دیوار پر نازک ہاتھ لکھ رہے ہونگے
”ماحل محبت ہے!“
تب ہم بات کریں گے اس کونج کی جو دھرتی سے محبت کے جرم میں کہاں ہے؟
نہیں معلوم!