ورلڈ کپ کے لیے منتخب قومی ٹی ٹوئنٹی اسکواڈ کل اسلام آباد میں وزیر اعظم سے ملاقات کرےگا۔

ملاقات کا مقصد میگا ایونٹ سے قبل کھلاڑیوں کے حوصلے بڑھانا ہے، 1992ء ورلڈ کپ کی فاتح ٹیم کے کپتان عمران خان اپنے تجربات سے آگاہ کریں گے اور نوجوان کھلاڑیوں کو ٹپس دیں گے۔

وزیر اعظم عمران خان پاک نیوزی لینڈ سیریزمنسوخی کے بعد پیدا ہونیوالی صورتحال پر بھی کھلاڑیوں سے بات کریں گے۔

اس ملاقات میں پاکستان کرکٹ بورڈ کے چیئرمین رمیز راجہ بھی موجود ہوں گے۔

نیشنل ٹی ٹوئنٹی کپ کے لیے پاکستان ٹی ٹوئنٹی اسکواڈ کے تمام کھلاڑی اسلام آباد میں موجود ہوں گے۔ پی سی بی نے تمام کھلاڑیوں کو نیشنل ٹی ٹوئنٹی کپ کھیلنے کا پابند کیا ہوا ہے تاکہ میگا ایونٹ کے لیے بھرپور تیاری کی جا سکے۔

واضح رہے کہ نیشنل ٹی ٹوئنٹی کپ کا پہلا مرحلہ 23 ستمبر سے راولپنڈی اسٹیڈیم میں شروع ہو رہا ہے۔

یاد رہے کہ اسکواڈ میں کپتان بابراعظم، نائب کپتان شاداب خان اور آصف علی شامل ہیں۔اعظم خان، حارث رؤف، حسن علی، عماد وسیم، خوشدل شاہ اور محمد حفیظ بھی ٹیم کا حصہ ہیں۔

محمد حسنین، محمد نواز، محمد رضوان، محمد وسیم جونیئر، شاہین شاہ آفریدی اور صہیب مقصود بھی ٹیم کا حصہ ہیں۔