سید علی گیلانی کی رحلت فقط مسلمانوں کے لیے ہی نہیں بلکہ تمام حریت پرست انسانیت کے لیے ایک سانحہ ہے، یہ ایک بہت بڑے شخص کا سانحہ ارتحال ہے۔ 92 برس کی زندگی میں سید علی گیلانی نے 14 برس کی باقاعدہ قید کاٹی اور 12 برس سید علی گیلانی گھر میں نظر بند رہے، جو ایک طرح کی قید ہی ہے۔ پس آزادی اور بڑے انسانی مقاصد کی خاطر قید رہنے والے افراد میں سید علی گیلانی کا ایک بڑا نام ہے۔ سید علی گیلانی اپنے بڑے ہدف اور مقصد کی خاطر تقریباً 26 برس قید رہے۔ سید علی گیلانی کو اپنے عقیدے اور نظریے پر اس قدر ایمان تھا کہ اس کی مثال کم ہی ملتی ہے۔ بڑھاپے اور پیرانہ سالی کے باوجود جیسے وہ اپنے نظریہ کو بیان کرتے تھے، کم نظیر ہے۔ سید علی گیلانی ظلم، استبداد اور برہمنی سامراج کے وحشیانہ مظالم کے خلاف ایک چٹان کی مانند ایستادہ رہے۔ اگر ہم مجموعی طور پر کشمیری قیادت کو دیکھیں تو اس میں ہم متعدد گروہ اور نظریات کے حامل افراد دیکھتے ہیں، تاہم سید علی گیلانی واضح موقف کے حامل انسان تھے۔

یہ ایک بڑا مسئلہ ہے کہ ہندوستان کے آئین کو قبول کرنا ہے یا نہیں کرنا، اگر یہ فیصلہ کر لیا کہ آئین ہندوستان کو قبول نہیں کرنا تو پھر سوال پیدا ہوتا ہے کہ مقبوضہ کشمیر کو ایک آزاد ریاست کے طور پر رہنا ہے یا اس کو پاکستان کے ساتھ الحاق کرنا ہے۔ مقبوضہ کشمیر کے مسئلے پر غور کیا جائے تو ہم دیکھتے ہیں کہ یہ تقسیم ہند کا ایک نامکمل باب ہے۔ تقسیم ہند کے معاہدے اور اقوام متحدہ کی قراردادوں کے مطابق مقبوضہ کشمیر کو پاکستان کا حصہ بننا ہے۔ ہم اچھی طرح سے جانتے ہیں کہ کشمیر کے مسلمانوں کی ایک بھاری اکثریت آزادی چاہتی ہے اور پاکستان سے الحاق کو اپنا ہدف و مقصد بنائے ہوئے ہے۔ اسی وجہ سے کشمیری ظلم سہنے کے باوجود پاکستان سے الحاق کی آواز بلند کرتے ہیں۔ ان کے شہداء سبز ہلالی پرچم میں دفن ہوتے ہیں۔ سید علی گیلانی کا جسد بھی سبز ہلالی پرچم میں دفن ہوا، حالانکہ بھارتی افواج ان کی لاش کو اٹھا کر لے گئیں، تاہم ان کے پسماندگان نے سبز ہلالی پرچم میں تدفین پر سمجھوتہ نہ کیا۔

یہاں ایک مسئلہ غور طلب ہے کہ بھارتی افواج نہ فقط سانس لیتے سید علی گیلانی سے خوفزدہ تھیں بلکہ وہ ان کے جسد خاکی سے بھی خوفزدہ تھیں، اسی لیے ان کی میت کو گھر سے اٹھا کر لے گئے۔ بھارتی افواج کے اس اقدام سے دنیا کو یہی پیغام جاتا ہے کہ بھارت مقبوضہ وادی پر زبردستی قابض ہے۔ اگر کشمیری عوام ان کے ساتھ ہوتے تو بھارتی فوج کو کیا خوف تھا کہ ایک بوڑھے شخص کی میت کو کشمیر کے عوام اور ان کے پس ماندگان جیسے چاہتے دفن کر دیتے۔ یہ ہے مرد استقلال اور مرد حر، اسے آزادی پسند اور حریت پسند کہتے ہیں کہ آپ کی میت سے بھی جابر حکمران خوفزدہ ہیں۔ سید علی گیلانی نے مر کر بھی ثابت کر دیا کہ بھارتی افواج مقبوضہ وادی پر زبردستی مسلط ہیں اور ہمیں جنازہ و تدفین تک کی آزادی نہیں ہے۔ بالکل اسرائیل کی مانند جو کہ فلسطین پر باہر سے آکر مسلط ہوا ہے۔ کشمیر کا مسئلہ بھی اسی زمانے سے قابل حل ہے۔

یہاں یہ بات قابل ذکر ہے کہ پاکستانی عوام ہمیشہ سے مسئلہ کشمیر کے حوالے سے یکسو رہے ہیں کہ اسے ہم نے آزاد کروانا ہے، لیکن ہماری ریاستی طاقتوں اور حکومتوں نے اس مسئلہ کو اس انداز سے نہیں لیا جیسا کہ لیا جانا چاہیے تھا۔ ہمارے حکمرانوں میں کئی ایسے تھے، جنہوں نے اس آزادی کی تحریک کو پھلنے پھولنے کا موقع فراہم کیا اور اس کی سرپرستی کی، تاہم کچھ ایسے بھی تھے جنہوں نے اس تحریک پر یو ٹرن لیا اور اس تحریک کی پشت میں خنجر گھونپا۔ جنرل پرویز مشرف کو میرے خیال میں تاریخ کبھی معاف نہیں کرے گی، جنہوں نے اس آزادی کی تحریک کو نقصان پہنچایا۔ اس مسئلہ میں ایک اور اہم نکتہ یہ ہے کہ ایران نے انقلاب اسلامی ایران کے بعد ایک موقف اختیار کیا کہ اسرائیل ایک ناجائز اور غاصب ریاست ہے اور فلسطین کو آزادی ملنی چاہیے۔

اس موقف کو عام کرنے لیے انھوں نے پوری دنیا میں جدوجہد کی ہے۔ یوم القدس کے عنوان سے ایک دن فلسطینیوں سے اظہار یکجہتی کے لیے منانا جس میں پوری دنیا کے مسلمان ہم آواز ہو کر فلسطینیوں کی حمایت کرتے ہیں اور غاصب ریاست کے خلاف اپنے جذبات کا اظہار کرتے ہیں، ایسے ہی فلسطینیوں کے اندر بھی ایک نیا جذبہ پیدا ہوا ہے، اس کے پیچھے جمہوری اسلامی ایران کی انقلابی سوچ ہے، جس پر ریاست کا ایمان ہے اور وہ اس کے لیے جدوجہد کرتی ہے۔ اگر ہم دیکھیں کہ اس وقت اسرائیل کمزور سے کمزور تر ہوتا چلا جا رہا ہے تو اس کے پیچھے ایران کی پالیسی ہے۔ یہ سبق ہے ہمارے حکمرانوں کے لیے بھی۔ اگر ہم فلسطین اور ایران کو دیکھیں تو ان ممالک کے مابین ترکی، اردن، شام آتا ہے، لیکن کشمیر میں تو ہمارے دریا، پہاڑ، زمینیں، سرحدیں اور خاندان سانجھے ہیں، لیکن ہمارے حکمرانوں نے اس مسئلہ کو اس انداز سے نہیں اٹھایا جیسے اٹھانا چاہیے تھا۔ کشمیر یا پاکستان میں اگر برہمن سامراج کے خلاف کوئی آواز اٹھاتا ہے تو اسے دہشت گرد کے طور پر دنیا میں پیش کیا جاتا ہے، یہ ہماری حکومت کی ناکامی اور نااہلی ہے۔