نیشنل ڈیٹا بیس اینڈ رجسٹریشن اتھارٹی (نادرا) نے آن لائن شناختی کارڈ بنوانے کیلئے موبائل ایپ تیار کرلی ہے۔
تفصیلات کے مطابق پاکستان میں پہلی بار جدید ترین ٹیکنالوجی کی بدولت شناختی کارڈ بنوانے کے لیے موبائل فون پر ہی فنگر پرنٹس بھی لیے جائیں گے۔
نادرا کی ویب پورٹل سے منسلک کی جانے والی پاک آئیڈنٹِٹی موبائل ایپ پلےاسٹور سے ڈاؤن لوڈ ہوگی۔ وزیراعظم عمران خان نے بھی جدید ترین ٹیکنالوجی کے لیے نادرا کی ٹیم کو مبارکباد دی ہے۔
چیئرمین نادرا طارق ملک کا کہنا ہے کہ ڈیجیٹل شعبے میں اس ٹیکنالوجی سے ہونہار پاکستانی نوجوان نہ صرف بے شمار نئی مصنوعات، خدمات اور سہولیات متعارف کرا سکیں گے بلکہ یہ اقدام معیشت کے کئی شعبوں میں انقلاب برپاکرسکتی ہے۔
انہوں نے کہا کہ ایمازون جیسے بڑے آن لائن عالمی اداروں کا اس ٹیکنالوجی کی بدولت اعتماد بھی بڑھے گا۔
طارق ملک نے مزید کہا کہ نادرا کی ویب سائٹ (id.nadra.gov.pk) کے درخواست گزار موبائل فونز کے ذریعے ہی انگلیوں کے نشانات، تصاویر اور دستاویز حاصل کرسکتے ہیں۔
Facebook Comments
بذریعہ فیس بک تبصرہ تحریر کریں