’ٗٗقصّے سناتے رہو کہ لوگ شاید سوچ بچار کریں ۔‘‘
قال الملاٗرکوع ۱۱، الاعراف ۶، (القران)

پہلا قصہ
بارش ہے اور میں ویپنگ وِلّو کے ساتھ جُڑا بیٹھا ہوں
ٹپ ٹپ اشک بہاتی وِلّو، اور میں، دونوں
بچپن سے اک سنگ رہے ہیں
’’بارش کب لاؤ گے، اے میرے ہمجولی؟‘‘
ہوا کی شائیں شائیں کرتی بولی میں وہ روز پوچھتی
اور میں اکثر
بادل کو بالک ہٹ سے کھینچ کےنیچے لے ہی آتا
ٹپ ٹپ رونے لگتی ولّو
۔۔۔اس کا رونا اس کی ہنسی تھی

نوّے سال کی عمر میں دونوں
پھر مل بیٹھےہیں ہم سنگی
چھتری، چلمن ، سائبان سی ویپنگ وِلّو
ٹپ ٹپ آنسو روتی روتی
ہنستے ہنستے جھوم رہی ہے
مَیں، لیکن
واماندہ، بے دم، اعضا شکنی کا مارا ہوں
اس کی جانب جھُک کر دھیرے سے کہتا ہوں
تم تو، ِولّو،
ویسی ہی ہو جیسی بچپن میں ہوتی تھیں
مَیں، لیکن ، ہلکان کھلاڑی
دنیا کی ہر دوڑ میں اوّل آتے آتے
پاؤں زخمی کر بیٹھا ہوں
اس کے آنسو
ٹپ ٹپ کے سرگم میں جیسے پوچھ رہے ہیں
دنیا کی ہر دوڑ میں اوّل آنا ہی کیا اہم تھا اتنا
جس کی خاطر تم نے خود کو مار دیا ہے؟
اب بھی آخر کیا بگڑا ہے؟
آؤ، دونوں پھر مل بیٹھیں
آنچل کھینچ کے بادل کا بارش برسائیں۔۔
بارش ہے اور میں ویپنگ وِلّو کے ساتھ جُڑا بیٹھا ہوں

دوسرا قصہ
’’ہنسنا، رونا، ایک عمل کے دو چہرے ہیں
ٹپ ٹپ روتی، ویپنگ وِلّو، ہنستے ہنستے یہ کہتی ہے
’’ اپنے چہرے سے ہنسنے کی پرت ہٹاؤ
نیچے گالوں پر آنسو بہتے دیکھو گے
غم اور خوشی کو ایک سا جانو
دل کا فولادی مادہ پگھلا کر اس کو موم بناؤ
آنکھوں میں آنسو چھلکاؤ
تم نے ، وِلّو، میں کہتا ہوں
ایسی رمزیں، ایسا گوڑھا گیان بھلا کیسے سیکھا ہے؟
رونے کو بزدل لوگوں کی بات سمجھ کر
کائر کی اوقات سمجھ کر
مرد آدمی، میں تو ساری عمر نہیں رو پایا، ولّو

۔۔۔۔’’اسی لیے تو،مرد آدمی‘‘۔۔۔۔
وِلّو، پھر ہنستے روتے مجھے سے کہتی ہے
تم کھُل کر ہنس سکنے کے نا اہل رہے ہو
روتے، تو پھر ہنس بھی سکتے

تیسرا قصہ
’’اوپر اُٹھنا، آسمان کو چھونے کی کوشش میں گرنا
کندھوں سےدو پنکھ باندھ کر
اُڑنے کی بیکار سعی میں گر کر اپنی جان گنوانا
محل ماڑیاں آسمان کی سرحد تک اونچا لے جانا
میناروں کو
بادل کی اونچائی تک پہنچانے میں اک عمر گنوانا
ولّو روتے ہنستے روتے یہ کہتی ہے’ یہ نادانی تم انسانوں کا شیوہ ہے
پیڑ، گھنے، چھتنار، جڑیں پیوست کیے اوپر اُٹھتے ہیں
لیکن اونچائی تک جا کر
اپنی شاخوں کو لٹکا کر
پھرزمین کو چھونے کی کوشش کرتے ہیں
میں بھی اپنی گھنی گھنیری شاخیں، باہیں
دھرتی تک واپس پہنچا کر خوش رہتی ہوں
میرے گر جانے کا کچھ امکان نہیں ہے