بلا سے ہم نے نہ دیکھا تو اور دیکھیں گے
فروغِ گلشن و صوتِ ہزار کا موسم
میرے نزدیک یہ شعر دولتِ تیقن سے محروم کوئی شاعر نہیں کہہ سکتا۔تو ہمارے فیض صاحب دولت ِیقین و امید سے مالامال شاعر ہیں جن کی فکر تاریخی اور عصری بصیرت سے روشنی حاصل کرتی ہوئی ایک پُرامیداور پُرامن مستقبل کی منزل پر ٹھہرتی ہے۔اُن کادرجِ بالا شعر بھی اُن کے اُس گہرے سماجی شعور کا آئینہ دار ہے جس کا منبع ان کا فہمِ تاریخ تھا اور یہ یقین کی دولت ہی تھی جس نے انھیں طویل ’شبِ ہجراں‘کے کٹھن لمحات میں بھی رجائیت کی صبح کے روشن احساس سے دُور نہ ہونے دیا۔
ہم دیکھتے ہیں کہ عہد ساز شاعری ماضی کے آئینہ میں جب حال کے خدوخال سنوارنے میں مگن ہوتی ہے تب بھی اُس کی دُور رس نگاہ مستقبل کے دل کش رُخ سے کسی پَل ہٹتی نہیں۔ اِس ضمن میں میر و سودا و غالب واقبال کے سدا بہار شعری خزانے سے بھی حوالے دیئے جاسکتے ہیں اور فیض صاحب ہی کی طرح حبیب جالب،ظہیر کاشمیری،یزدانی جالندھری،احمد ندیم قاسمی، شہزاد احمد، افتخار عارف ، خالد احمد اور اسلم کولسری کے سرمایۂ غزلیات سے بھی استفادہ کیا جاسکتا ہے۔ تاہم یہاں بنیادی سوال یہ پیدا ہوتا ہے کہ تخیل اوروجدان کے پروں پر اُڑنے والے شاعر کو بھلا غمِ زمانہ سے کیا غرض؟ اُس کی تخلیقی اشتہا کی تسکین تو رزقِ تصورہی کرسکتا ہے۔زورِ تخیل پر کی گئی اِسی شاعری کو بعض نقاد’’خالص شاعری‘‘قرار دینے پر مصر رہے اور ہیں۔مگرممتاز نقاد شمیم حنفی کے الفاظ میں:
’’خالص شاعری‘ کاراگ الاپتے ہوئے لوگ اس حقیقت کو بھلا بیٹھتے ہیں کہ دنیا کا بڑے سے بڑا ادیب بھی اپنے ماحول سے بیگانگی کی روش اختیار نہیں کر سکتا۔‘‘
اور شمیم حنفی صاحب کی بات میرے دل کو لگتی ہے۔ وجہ یہ کہ دنیا میں بسنے والے دوسرے انسانوں کی طرح شاعر بھی تو اپنے ماحول سے، اپنے معاشرہ سے اور اپنے ارد گرد وقوع پزیر ہونے والے واقعات و حادثات سے، ٹوٹتی پھوٹی روایات سے اور نت نئی ایجادات سے یعنی معاشرتی تبدیلی کے مضمرات سے متاثر ہوتا ہے۔ ایک عام انسان اور شاعر میں فرق بس یہ ہوتا ہے کہ شاعر تخلیق کار ہونے کے سبب مشاہدے اور مطالعے میں آنے والے عناصر و عوامل کوایک ٹھوس حیثیت سے یا ان کی حقیقی صورت میں دکھانے کے بجائے انھیں اپنے تخلیقی شعور یا وجدان کی کٹھالی میں پگھلا کر حرف حرف سنہرے مصرعوں میں ڈھالتا ہے۔
اِس ضمن میں لینگسٹن ہیوز کی نظموں پر بات کی جاسکتی ہے جوامریکا میں سیاہ فام باشندوں، تارکینِ وطن اور مفلس گورے باشندوں کی حالتِ زار بیان کرتے ہوئے شہری آزادیوں اور برابر کے حقوق کا نعرہ بلند کرتی ہیں۔انگلستان کی جانب دیکھیں تو ولیم بلیک کی شاعری میں ہمیں مغرب کے صنعتی انقلاب کے سائے میں پلتی مفلسی اور محرومی کی داستانیں سنائی دیتی ہیں۔عالمی ادب میں ایک طرف ہمیں ایڈوِن مارکھم اور ڈڈلی رینڈل محنت کشوں کے استحصال اور نسل پرستی کے خلاف آواز اُٹھاتے دکھائی دیتے ہیں اور دوسری طرف کلاڈ میکے جبر اور ناانصافی پر اور کینیڈا کے شعرا آلڈن نولن اور مارگریٹ ایٹ وُڈ انسان کو قدرتی آب و ہوا اور فطرت سے قُرب کی حامل فضامیں لوٹ آنے کی ترغیب دیتے سنائی دیتے ہیں۔ کہنے کا مقصد یہ کہ حساس شاعر کہِیں کا بھی ہو وہ اپنے اردگرد سے بے خبر ہرگز نہیں ہوسکتا۔
اِس سب کو ذہن میں رکھتے ہوئے جب ہم اردو کے استاد شاعرجناب یزدانی جالندھری کے صاحب زادے، کینیڈا میں مقیم جدید لب و لہجہ کے پاکستانی شاعرحامد یزدانی کی شاعری پر نظر ڈالتے ہیں تو ہم پر منکشف ہوتا ہے کہ اُن کی غزلیات کے اشعار میں بھی جا بہ جا معاشرتی یا سماجی شعور کی جھلکیاں بکھری ہوئی ہیں۔
سوشیالوجی یعنی معاشریات اور سوشل ورک میں تعلیمی اور پیشہ ورانہ پس منظر رکھنے والے اس شاعرکے اشعارمیں جہاں ذاتی کرب کی ترجمانی ملتی ہے وہاں معاشرتی موضوعات کی بھی بھرپور عکاسی ملتی ہے۔
فروغِ گلشن و صوتِ ہزار کا موسم
میرے نزدیک یہ شعر دولتِ تیقن سے محروم کوئی شاعر نہیں کہہ سکتا۔تو ہمارے فیض صاحب دولت ِیقین و امید سے مالامال شاعر ہیں جن کی فکر تاریخی اور عصری بصیرت سے روشنی حاصل کرتی ہوئی ایک پُرامیداور پُرامن مستقبل کی منزل پر ٹھہرتی ہے۔اُن کادرجِ بالا شعر بھی اُن کے اُس گہرے سماجی شعور کا آئینہ دار ہے جس کا منبع ان کا فہمِ تاریخ تھا اور یہ یقین کی دولت ہی تھی جس نے انھیں طویل ’شبِ ہجراں‘کے کٹھن لمحات میں بھی رجائیت کی صبح کے روشن احساس سے دُور نہ ہونے دیا۔
ہم دیکھتے ہیں کہ عہد ساز شاعری ماضی کے آئینہ میں جب حال کے خدوخال سنوارنے میں مگن ہوتی ہے تب بھی اُس کی دُور رس نگاہ مستقبل کے دل کش رُخ سے کسی پَل ہٹتی نہیں۔ اِس ضمن میں میر و سودا و غالب واقبال کے سدا بہار شعری خزانے سے بھی حوالے دیئے جاسکتے ہیں اور فیض صاحب ہی کی طرح حبیب جالب،ظہیر کاشمیری،یزدانی جالندھری،احمد ندیم قاسمی، شہزاد احمد، افتخار عارف ، خالد احمد اور اسلم کولسری کے سرمایۂ غزلیات سے بھی استفادہ کیا جاسکتا ہے۔ تاہم یہاں بنیادی سوال یہ پیدا ہوتا ہے کہ تخیل اوروجدان کے پروں پر اُڑنے والے شاعر کو بھلا غمِ زمانہ سے کیا غرض؟ اُس کی تخلیقی اشتہا کی تسکین تو رزقِ تصورہی کرسکتا ہے۔زورِ تخیل پر کی گئی اِسی شاعری کو بعض نقاد’’خالص شاعری‘‘قرار دینے پر مصر رہے اور ہیں۔مگرممتاز نقاد شمیم حنفی کے الفاظ میں:
’’خالص شاعری‘ کاراگ الاپتے ہوئے لوگ اس حقیقت کو بھلا بیٹھتے ہیں کہ دنیا کا بڑے سے بڑا ادیب بھی اپنے ماحول سے بیگانگی کی روش اختیار نہیں کر سکتا۔‘‘
اور شمیم حنفی صاحب کی بات میرے دل کو لگتی ہے۔ وجہ یہ کہ دنیا میں بسنے والے دوسرے انسانوں کی طرح شاعر بھی تو اپنے ماحول سے، اپنے معاشرہ سے اور اپنے ارد گرد وقوع پزیر ہونے والے واقعات و حادثات سے، ٹوٹتی پھوٹی روایات سے اور نت نئی ایجادات سے یعنی معاشرتی تبدیلی کے مضمرات سے متاثر ہوتا ہے۔ ایک عام انسان اور شاعر میں فرق بس یہ ہوتا ہے کہ شاعر تخلیق کار ہونے کے سبب مشاہدے اور مطالعے میں آنے والے عناصر و عوامل کوایک ٹھوس حیثیت سے یا ان کی حقیقی صورت میں دکھانے کے بجائے انھیں اپنے تخلیقی شعور یا وجدان کی کٹھالی میں پگھلا کر حرف حرف سنہرے مصرعوں میں ڈھالتا ہے۔
اِس ضمن میں لینگسٹن ہیوز کی نظموں پر بات کی جاسکتی ہے جوامریکا میں سیاہ فام باشندوں، تارکینِ وطن اور مفلس گورے باشندوں کی حالتِ زار بیان کرتے ہوئے شہری آزادیوں اور برابر کے حقوق کا نعرہ بلند کرتی ہیں۔انگلستان کی جانب دیکھیں تو ولیم بلیک کی شاعری میں ہمیں مغرب کے صنعتی انقلاب کے سائے میں پلتی مفلسی اور محرومی کی داستانیں سنائی دیتی ہیں۔عالمی ادب میں ایک طرف ہمیں ایڈوِن مارکھم اور ڈڈلی رینڈل محنت کشوں کے استحصال اور نسل پرستی کے خلاف آواز اُٹھاتے دکھائی دیتے ہیں اور دوسری طرف کلاڈ میکے جبر اور ناانصافی پر اور کینیڈا کے شعرا آلڈن نولن اور مارگریٹ ایٹ وُڈ انسان کو قدرتی آب و ہوا اور فطرت سے قُرب کی حامل فضامیں لوٹ آنے کی ترغیب دیتے سنائی دیتے ہیں۔ کہنے کا مقصد یہ کہ حساس شاعر کہِیں کا بھی ہو وہ اپنے اردگرد سے بے خبر ہرگز نہیں ہوسکتا۔
اِس سب کو ذہن میں رکھتے ہوئے جب ہم اردو کے استاد شاعرجناب یزدانی جالندھری کے صاحب زادے، کینیڈا میں مقیم جدید لب و لہجہ کے پاکستانی شاعرحامد یزدانی کی شاعری پر نظر ڈالتے ہیں تو ہم پر منکشف ہوتا ہے کہ اُن کی غزلیات کے اشعار میں بھی جا بہ جا معاشرتی یا سماجی شعور کی جھلکیاں بکھری ہوئی ہیں۔
سوشیالوجی یعنی معاشریات اور سوشل ورک میں تعلیمی اور پیشہ ورانہ پس منظر رکھنے والے اس شاعرکے اشعارمیں جہاں ذاتی کرب کی ترجمانی ملتی ہے وہاں معاشرتی موضوعات کی بھی بھرپور عکاسی ملتی ہے۔
میری خوش بختی کہ میں حامد کے لگ بھگ سارے ہی تخلیقی سفر کا گواہ ہوں جس کا آغاز غالباً ستّر کے عشرہ کے اواخر میں ہوا تھاجب انھوں نے کہا تھا:
گھر سے وہ نکلی ہے یوں پیلا دوپٹہ اوڑھ کر
چاند نکلے جس طرح چہرے پہ ہالا اوڑھ کر
لیکن اُن کا شعری ذوق جب پیلے دوپٹے کی نرم رومانوی چھاؤں سے آگے بڑھ کر دشتِ فکر کی پہنائیوں سے آشنا ہوا تو وہی حامد کہنے لگے:
دیکھیے، دشت میں کِھلتے ہیں کہاں لالہ وگل
دیکھیے، پاؤں کہاں آبلہ پا رکھتا ہے
مجھے یاد ہے جب حامد نے پہلی بار یہ شعر پاک ٹی ہاؤس میں سنایا تھا تو اسرار زیدی،خالد احمد، سراج منیر، نجیب احمد، محمد خالد،علی اکبر عباس اور ہم سب نوجوان شعرا نے اسے خوب داد دی تھی اور اس کے ساتھ ایک بڑے شعری امکان کی امید وابستہ کرلی۔مقام مسرت ہے کہ حامدبزرگوں اور دوستوں کی توقع پر پورا اُترا اور وہ شعر کی وادی کی سیر کرتے ہوئے پھر کِہیں رُکا نہیں۔ برابرقدم آگے بڑھاتا رہا۔وقتی داد و تحسین سے بے نیاز، ادبی گروہ بندیوں سے کوسوں دُور۔۔۔بہ ظاہرکبھی یورپ گردی میں مشغول، کبھی لاہورکے شب وروز جھیلنے میں مگن اور کبھی کینیڈا، شمالی امریکاکے برف زار عبور کرنے میںمصروف۔۔۔مگر بہ باطن وہ تخلیقی خطے ہی کی دشت نوردی کرتا رہا۔اُس کی شاعری رنگا رنگ خیال پیش کرتی رہی جس میں ذات کے دکھوں کے ساتھ ساتھ کائنات کے اسرارکے رنگ بھی نمایاں ہیں۔اپنی داخلی تخلیقی واردات کو بیان کرتے ہوئے بھی وہ اپنے شعر میں عصری اور سماجی شعورسے صرفِ نظر نہیں کرتا۔کربھی کیسے سکتا ہے کہ شاعر تو ہوتا ہی باشعور ہے۔حامد کا تخلیقی شعور یا وجدان اسے اب اس مرحلے پر لے آیاہے:
میں تلاوت کررہا ہوں رحلِ نسیاں پر تمہیں
تم بھی تسبیح ِ فراموشی پہ دہرانا مجھے
۔۔۔۔۔
گھر سے وہ نکلی ہے یوں پیلا دوپٹہ اوڑھ کر
چاند نکلے جس طرح چہرے پہ ہالا اوڑھ کر
لیکن اُن کا شعری ذوق جب پیلے دوپٹے کی نرم رومانوی چھاؤں سے آگے بڑھ کر دشتِ فکر کی پہنائیوں سے آشنا ہوا تو وہی حامد کہنے لگے:
دیکھیے، دشت میں کِھلتے ہیں کہاں لالہ وگل
دیکھیے، پاؤں کہاں آبلہ پا رکھتا ہے
مجھے یاد ہے جب حامد نے پہلی بار یہ شعر پاک ٹی ہاؤس میں سنایا تھا تو اسرار زیدی،خالد احمد، سراج منیر، نجیب احمد، محمد خالد،علی اکبر عباس اور ہم سب نوجوان شعرا نے اسے خوب داد دی تھی اور اس کے ساتھ ایک بڑے شعری امکان کی امید وابستہ کرلی۔مقام مسرت ہے کہ حامدبزرگوں اور دوستوں کی توقع پر پورا اُترا اور وہ شعر کی وادی کی سیر کرتے ہوئے پھر کِہیں رُکا نہیں۔ برابرقدم آگے بڑھاتا رہا۔وقتی داد و تحسین سے بے نیاز، ادبی گروہ بندیوں سے کوسوں دُور۔۔۔بہ ظاہرکبھی یورپ گردی میں مشغول، کبھی لاہورکے شب وروز جھیلنے میں مگن اور کبھی کینیڈا، شمالی امریکاکے برف زار عبور کرنے میںمصروف۔۔۔مگر بہ باطن وہ تخلیقی خطے ہی کی دشت نوردی کرتا رہا۔اُس کی شاعری رنگا رنگ خیال پیش کرتی رہی جس میں ذات کے دکھوں کے ساتھ ساتھ کائنات کے اسرارکے رنگ بھی نمایاں ہیں۔اپنی داخلی تخلیقی واردات کو بیان کرتے ہوئے بھی وہ اپنے شعر میں عصری اور سماجی شعورسے صرفِ نظر نہیں کرتا۔کربھی کیسے سکتا ہے کہ شاعر تو ہوتا ہی باشعور ہے۔حامد کا تخلیقی شعور یا وجدان اسے اب اس مرحلے پر لے آیاہے:
میں تلاوت کررہا ہوں رحلِ نسیاں پر تمہیں
تم بھی تسبیح ِ فراموشی پہ دہرانا مجھے
۔۔۔۔۔
حامدیزدانی کے تینوں 
اردو شعری مجموعے ’’ابھی اک خواب رہتا ہے‘‘، ’’گہری شام کی بیلیں‘‘ اور ’’ہم ابھی رستے میں ہیں‘‘اس حقیقت کے شاہد ہیں اور میرے دعوے پر دلیل ہیں کہ ان کے اشعار کے موضوعات کا دائرہ کربِ ذات،معاشرتی ناانصافی، افلاس، طبقاتی تفریق، ثقافتی تغیر، احساسِ بیگانگی، عدم مساوات،، اور سماجی جبر جیسے موضوعات تک ہی محدود نہیں بلکہ وہ معاشرہ کو تشکیل دینے والے بنیادی سماجی اداروں یعنی خاندان، مذہب، معیشت، تعلیم، سیاسیات وغیرہ کے وظائف اور ان کی اثر پزیری کو بھی ہم پر تخلیقی انداز میں اجاگر کرتا ہے۔
مثال کے طور پر خاندان، جس میں بچہ اپنی ماں کی گود میں ابتدائی انسانی تربیت حاصل کرتا ہے،بدلتی ہوئی اقدار کے مقابل اپنا وجود بچانے کی جدوجہد کررہا ہے۔بعض نوجوان اپنی امنگوں اور نئی دنیا کے تقاضوں سے ہم آہنگ ہونے کے لیے ماں کی آغوش کا حق ادا کرنا ہی بھول جاتے ہیں۔
اسلم کولسری کہتے ہیں نا کہ:
شہر میں آکر پڑھنے والے بھول گئے
کس کی ماں نے کتنا زیور بیچا تھا
اس المیّے کو حامدیزدانی کچھ یوں بیان کرتے ہیں:
ذرا سے پر نکلتے ہی پرندے بھول جاتے ہیں
انھیں کس ماں نے پالا تھا یہ بچے بھول جاتے ہیں
یا پھر یوں :
وہ بُڑھیا راتوں کو سویٹر بُنتی تھی
جس کا بیٹا دن بھر سپنے بُنتا تھا
۔۔۔۔۔
نئے زمانے کے نئے آدمی نے دیہات کی سادہ زندگی پر شہری زندگی کی ظاہری چکاچوند اور آسائشوں کو ترجیح دینا پسند کیا اور یہ بھول گیا کہ اس زندگی کی قیمت اسے تنہائی اور احساسِ بیگانگی سے ادا کرنا ہوگیا۔ اور نقل مکانی کی صعوبتیں الگ سے۔اس صورتِ حال کو حامد یوں بیان کرتے ہیں:
میں تنہا پھرتا ہوں شہر کی سڑکوں پر
سرپر ایک ستارا تنہا تنہا ہے
۔۔۔۔۔
گھر سے نکلے تھے پانے کو منزل تِرے جمال میں ہم
لیکن آج بھی اَٹے ہوئے ہیں گردِ رہِ ملال میں ہم
۔۔۔۔۔۔
نہ چھت، نہ دیوار تھی فقط در بنا لیے تھے
یہ ہم نے کیسے عجیب سے گھر بنا لیے تھے
۔۔۔۔۔
ابھی رختِ سفر باندھا تو آیا دھیان جی میں
کہ ساری عمر ہم کیسے مکانوں میں رہے ہیں
۔۔۔۔
منزلوں، منزلوں بیگانہ روی ہے، حامد
ایک رستا بھی نہیں ہے جسے اپنا کہہ لیں
۔۔۔۔۔
شہروں کے تنگ و تاریک مکانات فضائی آلودگی اور تارکول کی سیاہ سڑکوں نے انسان کو اس کے اصل سرسبز ماحول سے کتنا دور کردیا ہے اس کا احساس بھی ہر صاحب ِ دل کو تڑپاکر رکھ دیتاہے۔ ٹریفک کے بے ہنگم شور میں وہ کبھی کبھی اپنے دل کی یہ پکار بھی سنتاہے:
چہرے کیا، اِس شور سے سوچیں آلودہ ہیں
آؤ، شہر کی خاطر جنگل ڈھونڈ کے لائیں
۔۔۔۔۔۔
پکی عمارتوں میں مِرا گاؤں کھوگیا
حدِ نگاہ تک کوئی کچا مکاں نہیں
۔۔۔۔۔
اس میں کوئی شک نہیں کہ گلوبل وارمنگ عصرِ حاضر کا ایک ایسا بڑا مسئلہ ہے جس نے بنی نوعِ انسان کو کرہِ ارض کے مستقبل کے حوالہ سے فکر مند کررکھا ہے۔ زمین کے بچاؤ کے لیے ضروری ہے کہ اس پر انسان، پیڑ ،پودے، پرندے، پہاڑ، پانی سب ایک تناسب سے موجود رہیں کیوں کہ ان کے تال میل سے ہی اس سیارہ پر زندگی کی بقا ممکن ہے۔ ان باتوں کی روشنی میں ذرا یہ اشعار دیکھیے:
یہ مُردہ شہر کا منظر جو اب بھی زندہ ہے
ضرور اِس میں کہِیں پر کوئی پرندہ ہے
۔۔۔۔۔
نوید صبحِ طرب کون دینے آئے گا
کسی شجر پہ پرندہ کوئی تو رہنے دو
۔۔۔۔۔۔
یہ کیا کہ آج کا دن بھی ہے سُرمئی، حامد
یہ کس نے دھوپ نگر میں دھواں اتار دیا
۔۔۔۔۔
انسانی مسائل گلوبل وارمنگ تک ہی محدود نہیں۔معاشرتی اور سیاسی نظام کی خرابیوں کی بھی ایک طویل فہرست اس میں شامل ہے۔ہم دیکھتے ہیں کہ ہمارا شاعر اپنے عہد میں عدل و انصاف کی عدم فراہمی پر بھی شکوہ کُناں ہے اور اہلِ معاشرہ کو اس ضرورت کی جانب توجہ دینے پر مائل کرتا بھی دکھائی دیتا ہے۔ وہ کہتا ہے:
اربابِ ادب جھوٹ کا بیوپار بکھیریں
ہرسمت ، بہ ہرکوچہ و بازار بکھیریں
دنیا نہ سہی عدل و مساوات کی قائل
کچھ لوگ تو انصاف کے انوار بکھیریں
۔۔۔۔۔
آپ بچ جائے گا، کشتی کو ڈبونے والا
یہ کرشمہ تو مِری جاں نہیں ہونے والا
اپنے ارد گرد ظلم، زیادتی اور جبر کی کاروائیاںدیکھ کر کوئی بھی سوچنے والا ذہن اور محسوس کرنے والا دل کیونکر متاثر ہوئے بغیر رہ سکتا ہے۔ معاشرہ کی بے حسی اورسیاسی، سماجی دباؤ کی چکی میں پسنے والے افرادکی حالت زار دیکھ کر حامد یزدانی کا قلم بھی شمشیرِ احتجاج میں ڈھل جاتا ہے :
اٹھیں گے ایک دن سوال بن کے دوستو
جو سر ڈھلک گئے ردا کے انتظار میں
بپا بھی حشر ہوچکا کہ وقت سوچکا
ہیں لوگ جانے کس صدا کے انتظار میں
۔۔۔۔۔
انصاف کے تقاضوں پر بات کرتے ہوئے وہ محض کسی ایک طبقے کواس صورتِ حال کا ذمہ دار نہیں ٹھہراتا بلکہ خود احتسابی کا عمل ہر فرد کے لیے لازم سمجھتا ہے:
قصور وار ہیں سب اعتراف کون کرے
سزا کا فیصلہ اپنے خلاف کون کرے
کھڑی ہے راہ میں کُہنہ روایتوں کی فصیل
ہے کس میں حوصلہ، اس میں شگاف کون کرے
۔۔۔۔۔۔
سماجی اقدار کی تبدیلی کے بارے میں آگاہی بھی عصری سماجی شعور ہی کے زمرے میں آتی ہے۔ نام نہاد ترقی یافتہ معاشروں میں ترقی کے نام پر کم لباسی یا عریانیت کے فیشن کو بھی کچھ لوگ جدید زندگی کا لازمہ قرار دیتے ہیں مگر روایتی دینی معاشروں میں اس کا تصور بھی شرم ناک
ٹھہرتا ہے۔ اس موضوع پرحامدیزدانی کا ایک شعر:
بِنتِ حوا بڑھ رہی ہے دورِ ماضی کی طرف
کل پِھرے کی دیکھ لینا ایک پتّہ اوڑھ کر
۔۔۔۔۔
قدرتی اور سیاسی فضاؤں میں بڑھتی ہوئی آلودگی سے ذرا ہٹ کر دیکھیں توآج انسانی رشتوں میں بھی منافقت درآئی ہے جو حامد کے دل کو بہت دکھ دیتی ہے۔ اسی لیے تو وہ کہتا ہے:
حامد، اک سے ایک بڑھ کر ہے یہاں بہروپیا
کون پِھرتا ہے نہ جانے کس کا چہرا اوڑھ کر
۔۔۔۔۔۔
مادی وسائل کی نامناسب تقسیم نے معاشرہ میں جو درجہ بندی قائم کردی ہے اس نے انسانی زندگی کے حُسن کو پامال کردیا ہے۔ ہم دیکھتے ہیں کہ نئی معاشی نظام نے امیر کو اور بھی امیر اور مفلس کو مفلس تر بنا دیا ہے۔اب تو حالات اس ڈگر پر آگئے ہیں کہ لوگوں کے لیے اپنی بنیاد ی ضروریات پوری کرنا مشکل ہوگیا ہے۔ ایسے میں محنت کش طبقے پر کیا گزر رہی ہے اس صورت حال کا ترجمان ایک دُکھ بھراشعرملاحظہ ہو:
ملگجے ہاتھوں میں امید کی گُڑیا دے کر
اپنی بچی کو سُلاتا ہے کھلونے والا
۔۔۔۔۔
اور یہ بھی:
اک تازہ مگر سادہ سی خبر، جو شام کے اخباروں میں نہ تھی
سانسوں کے بوجھ سے ہستی کا لرزاں لرزاں پُل ٹوٹ گیا
۔۔۔۔۔
دانا چگنے آئے کبوتر قیدی بن گئے
جال سے باہر بھوک تماشا دیکھ رہی تھی
۔۔۔۔۔
معاشرہ میں عدم تحفظ کا احساس ایک خوف ناک احساس ہے جو ہماری آج کی زندگی اور سوچ کا مستقل حصہ بن چکا ہے۔لڑائی بھڑائی، تشدد، منافرت اور لاقانونیت کے ماحول میں نہ کوئی گھر کی چاردیواری میں مکمل محفوظ محسوس کرتا ہے اور نہ باہر۔ یہ بات اپنی جگہ حقیقت ہے کہ کہیں چادرا ور چار دیواری کی حرمت کی باتیں ہورہی ہیں اور کہیں صنفی امتیاز کے خلاف نعرہ زنی ہورہی ہے مگر عملی طور پر انسان کی ناموس اور اس کا وقار مسلسل مجروح ہورہا ہے۔ایسے میں ہم دیکھتے ہیں کہ ایک لڑکی جانے کب سے اپنے ہی گھر کی دہلیز پر کھڑی ہے۔وہ باہر قدم نکالنے سے ڈر رہی ہے ، جانے کب سے! اس کیفیت کو حامد ان الفاظ میں بیان کرتے ہیں:
پھر زندگی دہلیز پہ بیٹھی ہی نہ رہ جائے
یہ سوچ کے وہ گھر سے نکلتی ہی نہیں ہے
۔۔۔۔۔
آج جب ساتھ ساتھ واقع گھروں کے مکیں باہم دست و گریباں ہیں،ہمسایہ ممالک ایک دوسرے پر اسلحہ باری کررہے ہیں،ملکوں کے اندر بھی بدانتظامی کا دوردورہ ہے،سیاسی انتقام لیے جارہے ہیں،ادارے اداروں کے خلاف محاذ آرائی کررہے ہیں،سیاسی وابستگیاں عدم برداشت کو ہوا دے رہی ہیں،مہنگائی کی طرح فضائی آلودگی بھی آسمان کو چُھو رہی ہے، بے روزگاری، تشدد اور جبر جیسے مسائل سانپوں کی طرح پھن پھیلائے ہوئے ہیں۔ایسے میں ہم دعا ہی کرسکتے ہیں کہ کہیں سے امن و سکوں، رواداری اور تحمل و دانش کی کوئی کرن، کوئی پرندہ نمودار ہو جو ہمارے اس کرۂ ارض کے لیے اچھے مستقبل کا پیام بر ثابت ہو۔ورنہ زندگی کا کیاہے! وہ تو ہے ہی ایک سفر سے عبارت۔ایک خواب سے مشابہ۔ایک ایسی حقیقت جو خواب نما ہے۔آنکھ کھلتی ہے تو انسان ایک نئے خواب، ایک نئے سفر کی دہلیز پر کھڑا ہوتا ہے۔ یزدانی جالندھری فرماتے ہیں:
سانس کے قافلے کا رک جانا
ابتدا اک نئے سفر کی ہے
اور ہمارے حامدیزدانی کا کہنا ہے:
کہ پھر کانوں میں آغازِ سفر کی گھنٹیاں گونجیں
ابھی تو آئے تھے ، دہلیز پر سامان رکھا تھا
۔۔۔۔۔
میں اپنے اس مضمون کو اس امید پر ختم کرتا ہوں کہ حامدیزدانی کایہ تخلیقی سفر زندگی کے کارواں کے ساتھ ساتھ چلتا رہے گا۔
۔۔۔۔۔۔۔
اردو شعری مجموعے ’’ابھی اک خواب رہتا ہے‘‘، ’’گہری شام کی بیلیں‘‘ اور ’’ہم ابھی رستے میں ہیں‘‘اس حقیقت کے شاہد ہیں اور میرے دعوے پر دلیل ہیں کہ ان کے اشعار کے موضوعات کا دائرہ کربِ ذات،معاشرتی ناانصافی، افلاس، طبقاتی تفریق، ثقافتی تغیر، احساسِ بیگانگی، عدم مساوات،، اور سماجی جبر جیسے موضوعات تک ہی محدود نہیں بلکہ وہ معاشرہ کو تشکیل دینے والے بنیادی سماجی اداروں یعنی خاندان، مذہب، معیشت، تعلیم، سیاسیات وغیرہ کے وظائف اور ان کی اثر پزیری کو بھی ہم پر تخلیقی انداز میں اجاگر کرتا ہے۔مثال کے طور پر خاندان، جس میں بچہ اپنی ماں کی گود میں ابتدائی انسانی تربیت حاصل کرتا ہے،بدلتی ہوئی اقدار کے مقابل اپنا وجود بچانے کی جدوجہد کررہا ہے۔بعض نوجوان اپنی امنگوں اور نئی دنیا کے تقاضوں سے ہم آہنگ ہونے کے لیے ماں کی آغوش کا حق ادا کرنا ہی بھول جاتے ہیں۔
اسلم کولسری کہتے ہیں نا کہ:
شہر میں آکر پڑھنے والے بھول گئے
کس کی ماں نے کتنا زیور بیچا تھا
اس المیّے کو حامدیزدانی کچھ یوں بیان کرتے ہیں:
ذرا سے پر نکلتے ہی پرندے بھول جاتے ہیں
انھیں کس ماں نے پالا تھا یہ بچے بھول جاتے ہیں
یا پھر یوں :
وہ بُڑھیا راتوں کو سویٹر بُنتی تھی
جس کا بیٹا دن بھر سپنے بُنتا تھا
۔۔۔۔۔
نئے زمانے کے نئے آدمی نے دیہات کی سادہ زندگی پر شہری زندگی کی ظاہری چکاچوند اور آسائشوں کو ترجیح دینا پسند کیا اور یہ بھول گیا کہ اس زندگی کی قیمت اسے تنہائی اور احساسِ بیگانگی سے ادا کرنا ہوگیا۔ اور نقل مکانی کی صعوبتیں الگ سے۔اس صورتِ حال کو حامد یوں بیان کرتے ہیں:
میں تنہا پھرتا ہوں شہر کی سڑکوں پر
سرپر ایک ستارا تنہا تنہا ہے
۔۔۔۔۔
گھر سے نکلے تھے پانے کو منزل تِرے جمال میں ہم
لیکن آج بھی اَٹے ہوئے ہیں گردِ رہِ ملال میں ہم
۔۔۔۔۔۔
نہ چھت، نہ دیوار تھی فقط در بنا لیے تھے
یہ ہم نے کیسے عجیب سے گھر بنا لیے تھے
۔۔۔۔۔
ابھی رختِ سفر باندھا تو آیا دھیان جی میں
کہ ساری عمر ہم کیسے مکانوں میں رہے ہیں
۔۔۔۔
منزلوں، منزلوں بیگانہ روی ہے، حامد
ایک رستا بھی نہیں ہے جسے اپنا کہہ لیں
۔۔۔۔۔
شہروں کے تنگ و تاریک مکانات فضائی آلودگی اور تارکول کی سیاہ سڑکوں نے انسان کو اس کے اصل سرسبز ماحول سے کتنا دور کردیا ہے اس کا احساس بھی ہر صاحب ِ دل کو تڑپاکر رکھ دیتاہے۔ ٹریفک کے بے ہنگم شور میں وہ کبھی کبھی اپنے دل کی یہ پکار بھی سنتاہے:
چہرے کیا، اِس شور سے سوچیں آلودہ ہیں
آؤ، شہر کی خاطر جنگل ڈھونڈ کے لائیں
۔۔۔۔۔۔
پکی عمارتوں میں مِرا گاؤں کھوگیا
حدِ نگاہ تک کوئی کچا مکاں نہیں
۔۔۔۔۔
اس میں کوئی شک نہیں کہ گلوبل وارمنگ عصرِ حاضر کا ایک ایسا بڑا مسئلہ ہے جس نے بنی نوعِ انسان کو کرہِ ارض کے مستقبل کے حوالہ سے فکر مند کررکھا ہے۔ زمین کے بچاؤ کے لیے ضروری ہے کہ اس پر انسان، پیڑ ،پودے، پرندے، پہاڑ، پانی سب ایک تناسب سے موجود رہیں کیوں کہ ان کے تال میل سے ہی اس سیارہ پر زندگی کی بقا ممکن ہے۔ ان باتوں کی روشنی میں ذرا یہ اشعار دیکھیے:
یہ مُردہ شہر کا منظر جو اب بھی زندہ ہے
ضرور اِس میں کہِیں پر کوئی پرندہ ہے
۔۔۔۔۔
نوید صبحِ طرب کون دینے آئے گا
کسی شجر پہ پرندہ کوئی تو رہنے دو
۔۔۔۔۔۔
یہ کیا کہ آج کا دن بھی ہے سُرمئی، حامد
یہ کس نے دھوپ نگر میں دھواں اتار دیا
۔۔۔۔۔
انسانی مسائل گلوبل وارمنگ تک ہی محدود نہیں۔معاشرتی اور سیاسی نظام کی خرابیوں کی بھی ایک طویل فہرست اس میں شامل ہے۔ہم دیکھتے ہیں کہ ہمارا شاعر اپنے عہد میں عدل و انصاف کی عدم فراہمی پر بھی شکوہ کُناں ہے اور اہلِ معاشرہ کو اس ضرورت کی جانب توجہ دینے پر مائل کرتا بھی دکھائی دیتا ہے۔ وہ کہتا ہے:
اربابِ ادب جھوٹ کا بیوپار بکھیریں
ہرسمت ، بہ ہرکوچہ و بازار بکھیریں
دنیا نہ سہی عدل و مساوات کی قائل
کچھ لوگ تو انصاف کے انوار بکھیریں
۔۔۔۔۔
آپ بچ جائے گا، کشتی کو ڈبونے والا
یہ کرشمہ تو مِری جاں نہیں ہونے والا
اپنے ارد گرد ظلم، زیادتی اور جبر کی کاروائیاںدیکھ کر کوئی بھی سوچنے والا ذہن اور محسوس کرنے والا دل کیونکر متاثر ہوئے بغیر رہ سکتا ہے۔ معاشرہ کی بے حسی اورسیاسی، سماجی دباؤ کی چکی میں پسنے والے افرادکی حالت زار دیکھ کر حامد یزدانی کا قلم بھی شمشیرِ احتجاج میں ڈھل جاتا ہے :
اٹھیں گے ایک دن سوال بن کے دوستو
جو سر ڈھلک گئے ردا کے انتظار میں
بپا بھی حشر ہوچکا کہ وقت سوچکا
ہیں لوگ جانے کس صدا کے انتظار میں
۔۔۔۔۔
انصاف کے تقاضوں پر بات کرتے ہوئے وہ محض کسی ایک طبقے کواس صورتِ حال کا ذمہ دار نہیں ٹھہراتا بلکہ خود احتسابی کا عمل ہر فرد کے لیے لازم سمجھتا ہے:
قصور وار ہیں سب اعتراف کون کرے
سزا کا فیصلہ اپنے خلاف کون کرے
کھڑی ہے راہ میں کُہنہ روایتوں کی فصیل
ہے کس میں حوصلہ، اس میں شگاف کون کرے
۔۔۔۔۔۔
سماجی اقدار کی تبدیلی کے بارے میں آگاہی بھی عصری سماجی شعور ہی کے زمرے میں آتی ہے۔ نام نہاد ترقی یافتہ معاشروں میں ترقی کے نام پر کم لباسی یا عریانیت کے فیشن کو بھی کچھ لوگ جدید زندگی کا لازمہ قرار دیتے ہیں مگر روایتی دینی معاشروں میں اس کا تصور بھی شرم ناک
ٹھہرتا ہے۔ اس موضوع پرحامدیزدانی کا ایک شعر:
بِنتِ حوا بڑھ رہی ہے دورِ ماضی کی طرف
کل پِھرے کی دیکھ لینا ایک پتّہ اوڑھ کر
۔۔۔۔۔
قدرتی اور سیاسی فضاؤں میں بڑھتی ہوئی آلودگی سے ذرا ہٹ کر دیکھیں توآج انسانی رشتوں میں بھی منافقت درآئی ہے جو حامد کے دل کو بہت دکھ دیتی ہے۔ اسی لیے تو وہ کہتا ہے:
حامد، اک سے ایک بڑھ کر ہے یہاں بہروپیا
کون پِھرتا ہے نہ جانے کس کا چہرا اوڑھ کر
۔۔۔۔۔۔
مادی وسائل کی نامناسب تقسیم نے معاشرہ میں جو درجہ بندی قائم کردی ہے اس نے انسانی زندگی کے حُسن کو پامال کردیا ہے۔ ہم دیکھتے ہیں کہ نئی معاشی نظام نے امیر کو اور بھی امیر اور مفلس کو مفلس تر بنا دیا ہے۔اب تو حالات اس ڈگر پر آگئے ہیں کہ لوگوں کے لیے اپنی بنیاد ی ضروریات پوری کرنا مشکل ہوگیا ہے۔ ایسے میں محنت کش طبقے پر کیا گزر رہی ہے اس صورت حال کا ترجمان ایک دُکھ بھراشعرملاحظہ ہو:
ملگجے ہاتھوں میں امید کی گُڑیا دے کر
اپنی بچی کو سُلاتا ہے کھلونے والا
۔۔۔۔۔
اور یہ بھی:
اک تازہ مگر سادہ سی خبر، جو شام کے اخباروں میں نہ تھی
سانسوں کے بوجھ سے ہستی کا لرزاں لرزاں پُل ٹوٹ گیا
۔۔۔۔۔
دانا چگنے آئے کبوتر قیدی بن گئے
جال سے باہر بھوک تماشا دیکھ رہی تھی
۔۔۔۔۔
معاشرہ میں عدم تحفظ کا احساس ایک خوف ناک احساس ہے جو ہماری آج کی زندگی اور سوچ کا مستقل حصہ بن چکا ہے۔لڑائی بھڑائی، تشدد، منافرت اور لاقانونیت کے ماحول میں نہ کوئی گھر کی چاردیواری میں مکمل محفوظ محسوس کرتا ہے اور نہ باہر۔ یہ بات اپنی جگہ حقیقت ہے کہ کہیں چادرا ور چار دیواری کی حرمت کی باتیں ہورہی ہیں اور کہیں صنفی امتیاز کے خلاف نعرہ زنی ہورہی ہے مگر عملی طور پر انسان کی ناموس اور اس کا وقار مسلسل مجروح ہورہا ہے۔ایسے میں ہم دیکھتے ہیں کہ ایک لڑکی جانے کب سے اپنے ہی گھر کی دہلیز پر کھڑی ہے۔وہ باہر قدم نکالنے سے ڈر رہی ہے ، جانے کب سے! اس کیفیت کو حامد ان الفاظ میں بیان کرتے ہیں:
پھر زندگی دہلیز پہ بیٹھی ہی نہ رہ جائے
یہ سوچ کے وہ گھر سے نکلتی ہی نہیں ہے
۔۔۔۔۔
آج جب ساتھ ساتھ واقع گھروں کے مکیں باہم دست و گریباں ہیں،ہمسایہ ممالک ایک دوسرے پر اسلحہ باری کررہے ہیں،ملکوں کے اندر بھی بدانتظامی کا دوردورہ ہے،سیاسی انتقام لیے جارہے ہیں،ادارے اداروں کے خلاف محاذ آرائی کررہے ہیں،سیاسی وابستگیاں عدم برداشت کو ہوا دے رہی ہیں،مہنگائی کی طرح فضائی آلودگی بھی آسمان کو چُھو رہی ہے، بے روزگاری، تشدد اور جبر جیسے مسائل سانپوں کی طرح پھن پھیلائے ہوئے ہیں۔ایسے میں ہم دعا ہی کرسکتے ہیں کہ کہیں سے امن و سکوں، رواداری اور تحمل و دانش کی کوئی کرن، کوئی پرندہ نمودار ہو جو ہمارے اس کرۂ ارض کے لیے اچھے مستقبل کا پیام بر ثابت ہو۔ورنہ زندگی کا کیاہے! وہ تو ہے ہی ایک سفر سے عبارت۔ایک خواب سے مشابہ۔ایک ایسی حقیقت جو خواب نما ہے۔آنکھ کھلتی ہے تو انسان ایک نئے خواب، ایک نئے سفر کی دہلیز پر کھڑا ہوتا ہے۔ یزدانی جالندھری فرماتے ہیں:
سانس کے قافلے کا رک جانا
ابتدا اک نئے سفر کی ہے
اور ہمارے حامدیزدانی کا کہنا ہے:
کہ پھر کانوں میں آغازِ سفر کی گھنٹیاں گونجیں
ابھی تو آئے تھے ، دہلیز پر سامان رکھا تھا
۔۔۔۔۔
میں اپنے اس مضمون کو اس امید پر ختم کرتا ہوں کہ حامدیزدانی کایہ تخلیقی سفر زندگی کے کارواں کے ساتھ ساتھ چلتا رہے گا۔
۔۔۔۔۔۔۔
Facebook Comments
بذریعہ فیس بک تبصرہ تحریر کریں