آتا ہے یاد مجھ کو اسکول کا زمانہ

وہ دوستوں کی صحبت وہ قہقہے لگانا

رضوان عمیر وقاص شایان کے ساتھ مل کر

وہ تالیاں بجانا ،بندر کو منہ چڑانا

اتوار کا دن ہو اور میں ایوب پارک میں نہ ہوں ،ایسا تو ہو نہیں سکتا ۔ عمران خان کی جب اگلی حکومت آئے گی تو میں اس سے یہی کہوں گا کہ بھائی مجھے یہاں پر چھوٹا سا جھونپڑا بنا دے۔ یہاں کا ماحول مجھے بہت پسند ہے ۔ حسب روایت اس دفعہ بھی بچوں کو لے کے ہم ایوب پارک پہنچے ۔ ایک سکول کا ٹرپ دیکھا ۔ جس میں ہر عمر کے بچے تھے ، چھوٹی بیٹی عائشہ سے کہا کہ جا کے پوچھ کے آئے کہ کس سکول کا ٹرپ ہے ۔ پتہ چلا ماڈرن پبلک سکول گجرخان سے بچے سکول ٹرپ میں ایوب پارک آئے ہیں۔ بہت خوشی ہوئی بچوں کے کھل کھلاتے چہرے دیکھ کر ۔ میرا تعلق بھی تعلیمی شعبے سے ہے اور جیسا کہ اکثر میں یہ بات برملا کہتا ہوں کہ حکومتی نالائقی کی بنا پر تعلیمی شعبے کو غیر پڑھے لکھے امراء نے یرغمال بنا لیا ہے ۔ اب جس کے پاس پیسہ ہے وہ ایک سکول کھول لیتا ہے اور بچوں کے مستقبل سے کھیلتا ہے۔ فیکٹریوں والوں نے فیکٹریاں بند کر کے سکول کھول لیے ہیں منافع ہی منافع ہے ۔ استادوں کو تنخواہ تو دینی نہیں ہے تنخواہ تو اونٹ کے منہ میں زیرے سے بھی کم ہے ۔ اب جو ہماری جنریشن ہے وہ کسی قدر سکول سے تعلیم یافتہ ضرور ہے ۔ اگر آپ ذہن پہ زور ڈال کے دیکھیں تو آپ کو سکول کے دن کے کم ہی یاد ہوں گے زیادہ تر جو دن آپ کی یادداشت میں ہے وہ کوئی کھیل کا دن ہوگا یا کوئی سکول کی پارٹی یا خصوصاً کوئی ٹرپ ہوگا جس کا ایک ایک لمحہ آپ کے ذہن میں نشین ہوگا، کہ آغاز کیسے ہوا، بس میں کیسے بیٹھے ، کس کی طبیعت خراب ہوئی ، کس سے بات ہوئی، کس کے پیسے گم گئے ، کس کا وہاں جا کے لنچ باکس نہیں ملا ، واپسی پہ کون گم گیا ، کون سے دوست آپس میں ناراض ہو گئے، یہ سب باتیں ہمارے ذہن نشین رہتی ہیں ۔

دو سال پہلے بطور پرنسپل سکول کا ٹرپ ٹیکسلا عجائب گھر لے جانے کا اتفاق ہوا، آدھا گھنٹہ میں بچے وہاں سے بور ہوگے ۔ موقع پر فیصلہ کیا کہ خان پور ڈیم لے جاتے ہیں آج تک بچے وہ دن یاد کرتے ہیں کہ زندگی کا یادگار دن تھا کیونکہ وہ جانا بھی وہاں ہی چاہتے تھے جب ان کی خواہش اچانک پوری ہوئی اس کے بعد اتنے نظم وضبط کا مظاہرہ کیا کہ کیا کہنے۔ ماہر تعلیم اس بات پر زور دیتے ہیں کہ تفریحی دورے تربیت کا اہم حصہ ہیں ، انسان جب خوش ہو ،سیکھنے کے بہت زیادہ موڈ میں ہوتا ہے ۔ نظم و ضبط سکھانا ہو، مل کے بیٹھ کے گروپ میں کام کرنا سکھانا ہو، شیئرنگ کرنے کی عادت ڈالنی ہو ذمہ داری نبھانا سکھانا ہو، بہت آسان ہوتا ہے اپنی بات طلبہ تک پہنچانا ۔

سرکاری اداروں کی حالت تو آپ کے سامنے ہی ہے اس وقت یہ صورت حال ہے کہ ان کو پرائیویٹائز کرنے تک کی نوبت آ چکی ہے۔ ایسی ظالم حکومت 75 سال میں نہیں دیکھی ہو گی استادوں کی پنشن بھی ختم کر دی ۔ کسی اور سرکاری ادارے میں دینے والی مراعات کو ختم نہیں کیا ،بس اساتذہ کے درپئے ہیں ۔ نگران وزیراعلیٰ صاحب نجی تعلیمی ادارے تو ویسے بھی ڈبہ نما ہوتے ہیں اکثر میں ان کو ٹفن نما سکول کہا کرتا ہوں ۔ پانچ پانچ آٹھ مرلے کے سکولوں میں کھلے ہوئے سکول بچوں کے لیے کیا تفریحی فراہم کریں گے ۔ سال میں ایک مرتبہ ٹرپ لے کر جانا ہوتا ہے وہ بھی حاجی چوک سے ایوب پارک ۔ او ر سونے پہ سہاگہ وہ بھی صرف اپنی کمائی کے چکر میں۔ ایک دفعہ کوبرا سانپ ڈسنا چھوڑ سکتا ہے نجی سکول والے اپنا فائدہ نہیں چھوڑ سکتے ۔

اس کے علاوہ سکول مالکان اپنی ذمہ داری سے جان چھڑاتے ہیں، اسی طرح پرنسپل حضرات، اساتذہ میں سے کوئی بھی ذمہ داری لینے کے لیے تیار نہیں ہوتا، جس سے ان کا بچوں سے ایسا تعلق نہیں بن پاتا کہ وہ بچوں کے دل تک پہنچ پائیں ۔ محترم ہمارے روحانی استاد اشفاق احمد صاحب کہتے ہوتے تھے کہ دل کے دروازے کی کنڈی اندر کی طرف ہوتی ہے اسے باہر سے نہیں کھولا جا سکتا ۔ اسی لیے اساتذہ کو چاہیے کہ بچوں کے دلوں تک پہنچنے کے لیے چھوٹے چھوٹے سکول ٹرپس کا اہتمام کیا جائے، کلاس پارٹیز کا بندوبست کیا جائے، بچوں کے لیے تفریح فراہم کی جائے، انڈور گیمز کا بندوبست کیا جائے تاکہ بچے ان کے ساتھ مانوس ہو سکیں ،ان کو یہ نہ لگے کہ یہ کوئی ہٹلر ان کے اوپر نافذ ہے۔ وہ بچوں کے ساتھ کھیلیں بھی،کرکٹ میچز کا انعقاد کروائیں تاکہ بچے دوبارہ سے موبائلوں سے نکل گراؤنڈوں میں آئیں، صرف کرونا ہی نہیں ذمہ دار بچوں کو موبائلوں تک محدود کرنے میں، اساتذہ والدین اور سکول مالکان کا بھی برابر کا حصہ ہے۔