نیویارک ٹائمز کی ایک رپورٹ کے بعد اسرائیل کے اسپائی ویئر بیگاسس کے ذریعے بھارت میں ججوں، سیاست دانوں، صحافیوں اور اہلکاروں کی جاسوسی کا معاملہ ایک بار پھر زور پکڑ رہا ہے۔

امریکی اخبار نیویارک ٹائمز نے جمعے کو اپنی ایک رپورٹ میں انکشاف کیا تھا کہ بھارت نے اسرائیلی سپائی ویئر پیگاسس خرید لیا ہے۔

اس سے پہلے جب مودی حکومت پر پیگاسس کے ذریعے جاسوسی کا الزام لگایا گیا تھا تو حکومت نے اسرائیل سے اسپائی ویئر خریدنے کا اعتراف نہیں کیا تھا۔

پچھلے سال، پیگاسس جاسوسی سافٹ ویئر کئی ممالک میں سیاستدانوں، صحافیوں اور سماجی کارکنوں کی کالز ریکارڈ کرنے کے لیے سامنے آیا تھا۔سپریم کورٹ کا ایک پینل اس معاملے کی جانچ کر رہا ہے۔

ادھر راہل گاندھی نے نیویارک ٹائمز کی رپورٹ پر ٹویٹ کرکے مودی حکومت پر حملہ بولا ہے۔

گاندھی کا کہنا ہے کہ پیگاسس کو ہماری جمہوریت کے بنیادی اداروں، سیاست دانوں اور عوام کی جاسوسی کے لیے خریدا گیا تھا۔ فون ٹیپ کرکے حکمران جماعت، اپوزیشن، فوج، عدلیہ سب کو نشانہ بنایا گیا ہے۔ یہ غداری ہے۔ مودی سرکار نے غداری کی ہے۔

Advertisements

نیویارک ٹائمز کی اس رپورٹ کے دعوے کے مطابق بھارت نے 2017 میں اسرائیل سے جاسوسی سافٹ ویئر خریدا تھا۔