اچھی آواز والوں کے لئے ایک بہترین کیریئر۔۔میاں جمشید

آپ نے یہ بات تو سنی ہی ہو گی کہ گانا اور رونا سبھی کو آتا ہے مگر اس محاورے میں فرق ڈالنے والی بات ہے اچھی آواز ۔ ۔ ہمارے ہاں عام دیکھا گیا ہے کہ جس کی آواز اچھی ہو اس کو گانا گانے یا نعت پڑھنے کا مشورہ دیا جاتا ہے۔ کلاس روم ہو یا کوئی اور محفل ،اچھی آواز رکھنے والے کو یہی کہا جاتا  ہے،چلو کچھ سناؤ ۔ تب ایسی ہی حوصلہ افزائی سے کچھ لوگ سنگر بننے کی قسمت آزمائی میں لگ جاتے  ہیں کہ پہلے اچھی آواز کے مالک لوگوں کو کوئی شعبہ نظر نہیں آتا تھا، جس میں وہ اپنی آواز کا جادو چلا سکیں ۔ یا پھر جن لوگوں کی بڑے شہروں تک رسائی تھی تو وہ ٹی وی / ریڈیو سٹیشن یا تھیٹر میں ایکٹنگ ، اینکر یا نیوز کاسٹر کے طور پر اپنی جگہ بنا لیتے تھے ۔

یہ تو بھلا ہو انٹرنیٹ کا کہ جس کی وجہ سے روزگار کی دنیا میں انقلاب آیا۔ روزگار کے نئے مواقع جو پہلے بڑے ممالک یا شہروں تک محدود تھے اب ہر جگہ باآسانی میسر ہیں۔ صرف ان کو تلاش کرنے اور پھر اسی مطابق اپنے آپ کو تراشنے کی ضرورت ہے۔ ایسے ہی نئے روزگار کے مواقعوں میں سے اچھی آواز والے افراد کے لئے بھی جو مفید روزگار سامنے آیا وہ ہے ” وائس اوور / ڈبنگ ” کا کیریئر ۔ جس کی طلب میں روزبروز اضافہ ہو رہا ہے ۔ آپ ترکی کے مشہور ڈرامہ “ارطغرل غازی” کی مثال لیں یا مختلف فلموں و کارٹونز کی جن کو اردو زبان میں ڈب کیا گیا ہے ۔ اسی طرح مختلف اشتہارات اور ڈاکومنٹریز میں وائس اوور کا استعمال ہوتا ہے ۔

اس وائس اوور / ڈبنگ کی خاص بات یہ کہ اس میں عمر و تعلیم کی کوئی حد نہیں ۔ بچوں سے لے کر بڑی عمر کے لوگوں کے لئے یکساں مواقع ہیں۔ صرف آپ کا لب و لہجہ معیاری ہونا چاہیے جو کہ سیکھنے سے آ ہی جاتا ہے ۔ اس کے ساتھ ہی کچھ ٹیکنیکل کام بھی آنے چاہئیں جیسے آڈیو ریکارڈنگ اور ایڈیٹنگ ۔ مگر یہ سب بھی آج کل باآسانی سیکھے جا سکتے ہیں ۔

اب میں آپ کو اسی وائس اوور / ڈبنگ کیریئر کے حوالے سے  کچھ مشورے دے رہا  ہوں ،جن پر عمل کر کے آپ اس روزگار کو اختیار کر سکتے ہیں ۔

1۔ سب سے پہلے گوگل اور یوٹیوب پر وائس اوور اور ڈبنگ کے حوالے سے بنیادی معلومات حاصل کریں ۔

2۔ وائس اوور اور ڈبنگ والی مختلف ویڈیوز غور سے سنیں اور دیکھیں ۔ ان میں موویز ، کارٹون ، ٹی وی / ریڈیو کمرشل سب شامل ہیں ۔ اس کے ساتھ ساتھ مختلف اخبارات و رسائل میں موجود اشتہارات کو مختلف لب و لہجہ میں پڑھیں۔ جیسے ٹی وی ایڈ یا کسی ڈب ویڈیو میں بولا جا رہا ہو ، آپ بھی ویسا ہی بولنے کی کوشش کریں۔

3۔ کچھ ویڈیوز پر اپنی وائس ریکارڈ کر کے ڈبنگ یا وائس اوور کرنے کی کوشش شروع کریں ۔ اس حوالے سے یوٹیوب پر موجود مختلف ٹیوٹوریل ویڈیوز سے مدد لیں ۔

4۔ اپنے شہر میں موجود کیبل یا ٹی وی کے لئے ویڈیو ایڈ بنانے والوں سے ملیں۔ مختلف ویڈیو گرافر اور ایڈورٹائزنگ ایجنسیز والے آپ کو مزید بہتر گائیڈ کر سکتے ہیں۔ ہو سکے تو ان کے ساتھ رضاکارانہ مل کر اس کام کو عملی طور پر سیکھنے کی کوشش میں لگ جائیں۔

5۔ آج کل اکثر شہروں میں وائس اوور اور ڈبنگ سکھانے کے لئے مختلف ایکسپرٹ یا میڈیا اکیڈمیز موجود ہیں جو کچھ فیس لے کے یہ کام سکھا رہے ہیں۔ آپ ان سے رابطہ کر کے پروفیشنل انداز میں سیکھ سکتے ہیں۔

6۔ شروع میں مختلف یو ٹیوب چینل والوں کے ساتھ رابطہ کر کے ان کے لئے مفت وائس اوور کا کام کریں یا اپنا چینل بنا کر شروعات کریں ۔

Advertisements
julia rana solicitors

تو دوستو یہ چند بنیادی معلومات ہیں جن پر مزید تحقیق کر کے آپ وائس اوور / ڈبنگ کیریئر کا آغاز کر سکتے ہیں جو کہ بہت منافع بخش ہے ۔ مگر یاد رہے کہ اس فیلڈ میں ہمیشہ ایکسپرٹ بننے کی کوشش کرتے رہیں گے تو ہی بہترین کامیابی ملے گی۔ اس کے لئے ہمیشہ کچھ نیا سیکھنے اور عمل کرنے سے کبھی نہ ہچکچائیے۔

Facebook Comments

میاں جمشید
میاں جمشید مثبت طرزِ زندگی کے مختلف موضوعات پر آگاہی ، رہنمائی اور حوصلہ افزائی فراہم کرتے ہیں ۔ ان سے فیس بک آئی ڈی jamshades پر رابطہ کیا جاسکتا ہے ۔

بذریعہ فیس بک تبصرہ تحریر کریں

Leave a Reply