اسلام آباد: وفاقی تحقیقاتی ادارے (ایف آئی اے) نے منی لانڈرنگ کیس میں بیانات ریکارڈ کرانے کیلئے پاکستان پیپلز پارٹی کے شریک چیئرمین اور سابق صدر آصف زرداری اور ان کی ہمشیرہ فریال تالپور کو آج طلب کرلیا۔
منی لانڈرنگ کیس میں ایف آئی اے کی جے آئی ٹی کا اجلاس ہوا، جس کی صدارت ایڈیشنل ڈی جی ساؤتھ ایف آئی اے و جے آئی ٹی سربراہ نجف مرزا نے کی۔
اجلاس میں ایف آئی اے پنجاب کے افسران نے بھی شرکت کی، جس کے دوران مقدمے کی اب تک کی پیشرفت کا جائزہ لیا گیا۔
ذرائع نے بتایا کہ اجلاس میں آصف زرداری اور فریال تالپور کو طلب کرنے کا فیصلہ کیا گیا۔
آصف زرداری اور فریال تالپور کو آج کمرشل بینکنگ سرکل میں طلب کیا گیا ہے اور متوقع طور پر جے آئی ٹی دونوں سے پوچھ گچھ کرے گی۔
ذرائع کا کہنا ہے کہ اجلاس میں سپریم کورٹ میں اس کیس کے حوالے سے آئندہ سماعت کیلئے کچھ اہم فیصلے بھی کئے گئے۔
یاد رہے کہ 12 جولائی کو سپریم کورٹ میں مبینہ جعلی بینک اکاؤنٹس سے متعلق از خود نوٹس کی سماعت کے دوران چیف جسٹس ثاقب نثار نے ایف آئی اے کو ہدایت کی تھی کہ آصف علی زرداری اور فریال تالپور کو الیکشن تک نہ بلایا جائے۔
بذریعہ فیس بک تبصرہ تحریر کریں