آپ نے اب تک ہیری پوٹر فلم سیریز میں جادوگری کی تعلیم دیتے دیکھا ہوگا لیکن اب برطانوی یونیورسٹی باقاعدہ جادو ٹونے کی تعلیم اور ڈگری دے گی۔

غیر ملکی میڈیا کے مطابق برطانیہ کی یونیورسٹی آف ایکسیٹر نے آئندہ سال سے جادو ٹونے کی تعلیم دینے کے ساتھ اس میں با قاعدہ پوسٹ گریجویٹ ڈگری دینے کا اعلان کر دیا ہے۔

اس حوالے سے یونیورسٹی حکام کا کہنا تھا کہ جامعہ کی جانب سے یہ پروگرام آئندہ سال ستمبر 2024 میں شروع کیا جائے گا اور اس کورس میں جادو کی تاریخ کا جائزہ لینے کے ساتھ ادب، فلسفے، آثارِ قدیمہ، عمرانیات، نفسیات، ڈراما اور مذہب کا جادو کے حوالے سے تجزیہ کیا جائے گا۔

جادو ٹونے سے متعلق نئے شعبہ تعلیم کی سربراہ پروفیسر ایمیلی سیلوو ہوں گی جنہوں نے یونیورسٹی کے بلاگ میں لکھا کہ یونیورسٹی کے اندر اور باہر جادو ٹونے میں دلچسپی میں اضافے کی بنیاد معاشرے سے متعلق اٹھنے والے سوالات میں پائی جاتی ہے۔ اسی لیے یہ پروگرام لوگوں کو اس خیال کا دوبارہ جائزہ لینے کے قابل بنائے گا کہ مغرب عقلیات اور سائنس کی جگہ ہے جبکہ باقی دنیا کا تعلق جادو اور توہم پرستی سے ہے۔

Advertisements

ان کا کہنا تھا کہ ڈیکولونائزیشن، علمیات کے متبادل کی تلاش، فیمنزم اور انسداد نسل پرستی اس پروگرام کے بنیاد میں ہے۔