فرانس کے صدر ایمانوئل میکرون کو ٹی وی انٹرویو کے دوران قیمتی اور مہنگی گھڑی اتارنے پر تنقید کا نشانہ بنایا جارہا ہے۔

غیرملکی میڈیا کے مطابق بدھ کو ایک انٹرویو کے دوران صدر ایمانوئل میکرون پنشن کی عمر میں اضافے کی وجوہات کا جواز پیش کر رہے تھے۔

اپنا مؤقف پیش کرتے ہوئے ایمانوئل میکرون نے اپنے ہاتھ میز کے نیچے رکھے اور بات جاری رکھی تاہم جب وہ اپنے ہاتھ واپس میز پر لائے تو انہوں نے گھڑی ہٹادی تھی۔

اس حوالے سے فرانسیسی صدر کے ترجمان نے کہا ہے کہ انہوں نے گھڑی اس لیے اتاری کیونکہ وہ میز سے ٹکرا رہی تھی۔

دوسری جانب فرانسیسی صدر کے اس عمل پر انہیں تنقید کا نشانہ بنایا جارہا ہے۔

غیرملکی میڈیا کے مطابق ان کے ناقدین نے کہا ہے کہ گھڑی اتارنے سے پتا چلتا ہے کہ وہ عوام سے رابطے سے باہر ہیں۔

واضح رہے کہ فرانس ریٹائرمنٹ کی عمر 62 سے بڑھا کر 64 کرنے کے فیصلے پر احتجاج اور ہڑتالوں کی لپیٹ میں ہے۔