عمران خان حملہ کیس میں پولیس باز نہ آئی اور وزیراعلیٰ پنجاب کی جانب سے تھانیدار سمیت عملے کی معطلی کے باوجود حملہ آور کا دوسرا ویڈیو بیان جاری کردیا۔

اے آر وائی نیوز کے مطابق پولیس نے پی ٹی آئی چیئرمین اور سابق وزیراعظم عمران خان پر حملے میں ملوث گرفتار ملزم کا دوسرا ویڈیو بیان بھی جاری کر دیا گیا ہے جس میں ملزم نوید نے حملہ کرنے کے لیے من گھڑت الزامات عائد کیے اور جواز گھڑے ہیں۔

واضح رہے کہ گزشتہ روز وزیر آباد میں عمران خان کے حقیقی آزادی مارچ قافلے پر فائرنگ کرنے والے ایک حملہ آور کو وہاں موجود ایک کارکن نے پکڑ لیا تھا جس کو پولیس نے اپنی تحویل میں لے لیا تھا تاہم حیرت انگیز طور پر اس کے بیان کی ویڈیو کچھ دیر بعد ہی میڈیا کو جاری کردی گئی تھی۔

مبینہ حملہ آور کا یہ مختصر ویڈیو بیان تضادات سے بھرپور تھا جس میں پہلے اس نے کہا کہ اس نے لاہور میں مارچ شروع ہونے پر ہی عمران خان پر حملہ کرنے کا فیصلہ کر لیا تھا، پھر کہا کہ اچانک فیصلہ کیا۔

پولیس کی جانب سے گرفتار مبینہ حملہ آور کے بیان کی جاری کی گئی پہلی ویڈیو میں ملزم کا کہنا تھا کہ اس نے یہ اس لیے کیا عمران خان لوگوں کو گمراہ کر رہا تھا اور مجھ سے یہ چیز دیکھی نہیں گئی، اس لیے مارنے کی کوشش کی۔

مبینہ حملہ آور نوید کے گرفتاری کے فوری بعد اس ویڈیو بیان کے جاری ہونے کا وزیراعلیٰ پنجاب چوہدری پرویز الہٰی نے سخت نوٹس لیتے ہوئے تھانیدار سمیت پورے عملے کو معطل کردیا تھا۔

وزیراعلیٰ پنجاب نے آئی جی سمیت دیگر حکام کو واقعے کی مکمل تحقیقات کا حکم دیا تھا جب کہ تھانیدار سمیت عملے کے موبائل فون بھی ضبط کرلیے تھے جن کا فرانزک کرایا جانا ہے۔