پشاور: خیبر پختونخوا کے مرکزی شہر پشاور میں خودکش دھماکے کا مقدمہ سی ٹی ڈی تھانے میں درج کر لیا گیا۔

پشاور دھماکے کا مقدمہ ایس ایچ او تھانہ خان رازق کی مدعیت میں درج کیا گیا۔ مقدمہ میں قتل، اقدام قتل اور دہشت گردی کی دفعات شامل کی گئی ہیں۔

مقدمے کے متن کے مطابق خودکش حملہ آور نے مسجد میں گھس کر پہلے فائرنگ کی اور پھر فائرنگ کے بعد خود کش حملہ آور نے خود کو دھماکے سے اڑا دیا۔

اس سے قبل پشاور خود کش دھماکے کا مقدمہ درج کرنے کے لیے پولیس نے مراسلہ سی ٹی ڈی کو ارسال کیا تھا۔ مراسلہ ایس ایچ او خان رازق وارث خان کی مدعیت میں ارسال کیا گیا تھا۔

ارسال کردہ مراسلے میں کہا گیا کہ حملہ آور نے کالا لباس پہنا ہوا تھا اور حملہ آور نے حملے سے پہلے فائرنگ کر کے پولیس اہلکار کو نشانہ بنایا۔ مراسلہ میں قتل، اقدام قتل اور دہشت گردی دفعات شامل کی گئی تھیں۔

پولیس اسٹیشن سے ارسال مراسلے کی بنیاد پر ہی سی ٹی ڈی میں مقدمہ درج کیا گیا۔

گزشتہ روز پشاور کے علاقے قصہ خوانی بازار کی جامع مسجد میں نماز جمعہ کے دوران خود کش دھماکہ ہوا جس میں 56 افراد شہید جبکہ 194 زخمی ہوئے تھے۔ پولیس کے مطابق کوچہ رسالدار کی مسجد میں خود کش حملہ آور نے داخل ہو کر پولیس اور نمازیوں پر فائرنگ کی اور پھر خود کو دھماکے سے اڑا لیا۔

آئی جی خیبر پختونخوا کے مطابق پہلے پستول سے فائرنگ اور پھر خودکش حملہ کیا گیا۔ دھماکے میں 5 سے 6 کلوگرام دھماکہ خیز مواد استعمال ہوا۔ دھماکے کے حوالے سے کوئی پیشگی اطلاع نہیں تھی، سی سی ٹی وی فوٹیج میں ایک دہشت گرد کو دیکھا گیا ہے۔