بھارت کے مشہور جریدے ووگ انڈیا کے حالیہ شمارے کے سرورق پر بالی وڈ کنگ شاہ رخ خان کی صاحبزادی سہانا خان کے فوٹو شوٹ کو شدید تنقید کا نشانہ بنایا جارہا ہے۔ سماجی رابطے کی ویب سائٹ ٹویٹر پر متعدد صارفین نے جریدے کے سرورق پر سہانا خان کی تصویر کواقربا پروری قرار دیا اور کہا کہ وہ کوئی سٹار نہیں اور نہ ہی ان کے کریڈٹ پر کوئی فنی کامیابیاں ہیں، لیکن شاہ رخ خان کی وجہ سے انہیں بھی سٹار قرار دیا جارہا ہے۔ ایک بھارتی صحافی  نے ووگ کے سرورق پر لکھے گئے الفاظ کو دہرایا اور لکھا کہ طالبہ، تھیٹر پسند، مستقبل کی سٹار اور سٹار کی بیٹی جو تب تک ان کی فلموں کے لئے خرچ کریں گے جب تک کہ وہ سٹار نہیں بن جاتیں۔ علاوہ ازیں انہوں نے بالی وڈ ہدایت کار کرن جوہر کو بھی تنقید کرتے ہوئے لکھا کہ قربا پروری کی دھوم ہے ۔ بھارتی ٹی وی اداکارہ بھومیکا چڈا نے بھی اپنی ٹویٹ میں خفگی کا اظہار کرتے ہوئے لکھا کہ تصور کریں کہ ہر دن کوئی نیا امتحان ہو اور آپ کو کسی بھی وجہ سے مسترد کر دیا جائے، لیکن وہ وجہ ٹیلنٹ نہ ہو۔ ساتھ ہی انہوں نے لکھا کہ مجھے اس پر اعتراض ہے کہ جب سہانا خان ووگ انڈیا آفس گئیں تو ان کو کسی نے نہیں کہا ہوگا کہ آپ مطلوبہ معیار پر پورا نہیں اترتیں۔ ایک صارف نے ووگ انڈیا کے تمام امیدواروں پر میم بنائی اور دکھایا کہ سب آڈیشن کے لئے موجود ہیں، سہانا کو تو یہاں بھی جانے کی ضرورت نہیں پڑی ہوگی۔ واضح رہے کہ 18 سالہ سہانا خان نے اب تک بالی وڈ میں کوئی ڈیبیو نہیں دیا ہے اور ان کی تعلیم کا سلسلہ جاری ہے۔