کراچی: پاکستان کے تیزترین ایتھلیٹ انتقال کرگئے ہیں، جان پرمل کینسر کی بیماری میں مبتلا تھے اور بدھ کے روز موت سے جنگ لڑتے ہوئے زندگی کی بازی ہار گئے۔

تفصیلات کے مطابق پاکستان کے تیز ترین اتھلیٹ کا اعزاز حاصل کرنے والے جان پرمل انتقال کر گئے ہیں۔ جان پرمل سن 1964 سے 1974 کے درمیان پاکستان کے تیز ترین ایتھلیٹ رہے تھے۔

جان پرمل نے 1972 کے میونخ میں ہونے والے اولمپکس مقابلے اور 1966، 1970 میں ہونے والے ایشین گیمز میں پاکستان کی نمائندگی کی تھی ۔ انہوں نے سندھ کیلئے 1968 میں ڈھاکہ میں ہونے والے نیشنل گیمز میں سونے کا تمغۃ بھی حاصل کیا تھا۔

جان پرمل کینسر کی بیماری میں مبتلا تھے، گزشتہ برس جون کے مہینے میں انہیں کینسر کی بیماری کا تشخیص ہوئی تھی ۔ جان پرمل ریٹائرمنٹ کے بعد دس سالوں تک روزانہ 3 کلو میٹر پیدل چلا کرتے تھے۔

Advertisements

تاہم وہ گزشتہ 10 ماہ میں موت سے جنگ لڑتے ہوئے زندگی کی بازی ہار گئے ۔ انتقال کے وقت جان پرمل کی عمر 72 برس تھی۔