انسانی جسم قدرت کی ایک پیچیدہ تخلیق ہے جو کسی مشین کی طرح کام کرتا ہے۔ جسم کو صحت مند رکھنے کے لئے اسے بے حد خیال اوردیکھ بھال کی ضرورت ہے ۔ اسی طرح جسم کو ظاہری طور پر بھی خوبصورت بنانا انسان کی شخصیت کے لئے لازمی ہے۔ شخصیت کا ایک بہت ہی نمایاں جز دانت ہیں۔ جو بھی غذا ہم لیتے ہیں وہ ہماری جسمانی صحت کے ساتھ ساتھ دانتوں کی صحت پر بھی اثر انداز ہوتی ہے۔ اس لئے کچھ ایسی غذائیں جو دانتوں کو نقصان پہنچا سکتی ہیں ان سے پرہیز ضروری ہے۔
٭ بھنے مکئی کے دانے(پاپ کارن)
مکئی غذائیت اور مزہ سے بھرپور چیز ہے ۔لیکن بھنے دانوں میں بہت سے دانے کچے رہ جاتے ہیں۔ انہیں کھانے سے دانتوں کی مضبوطی کو نقصان پہنچ سکتا ہے۔ اسکے علاوہ مکئی کی چھال بھی دانتوں کے بیچ پھنس کر مسوڑوں میں تکلیف پیدا کر سکتی ہے۔
٭ خشک میوہ (ڈرائی فروٹ)
فائبر سے بھرپور خشک میوہ نہ صرف مزیدار لگتا ہے بلکہ ذہنی صحت کے لئے بھی انتہائی مفید ثابت ہوتا ہے۔ مگر افسوس کی بات یہ ہے کہ دنیا بھر کے ڈینٹسٹ تجویز کرتے ہیں کہ خشک میوہ جات دانتوں میں چپک کر ہائیجین پر اثر انداز ہوسکتے ہیں ۔ اور اس طرح دانتوں میں کیڑا پیدا ہونے کا خدشہ رہتا ہے۔
٭ دودھ میں بنی کافی
دودھ بلا شبہ مکمل غذا ہے ۔لیکن کافی یا چائے میں چینی کے ساتھ اس کا مسلسل استعمال مضر ثابت ہوتا ہے۔اس سے منہ کے اندر پیدا ہونے والے جراثیم اور ایسڈز دانتوں کی صحت پر تیزی سے اثر انداز ہوتے ہیں۔
٭ پھلوں کے خشک بیج
عام طور پر وقت بے وقت کھائی جانے والی چیزوں میں خربوزے کے خشک بیج بھی شامل ہیں ۔یہ بیج دانت سے توڑ کر کھانے سے دانت کے کنارے جھڑ سکتے ہیں۔
٭ جیلی
جیلی بھی چینی سے بنی ایک چیز ہے جو آج کل بچوں کو کھانے میں بہت پسند ہے۔ جیلی بہت جلد دانتوں میں چپک کر انہیں خراب کر سکتی ہے۔
٭ لیموں کا پانی
تروتازگی اوروزن گھٹانے کے لئے عام طور پر استعمال کئے جانے والے مشروبات میں لیموں کا پانی بہت نمایاں ہے۔ مگر ڈینٹسٹ کے مطابق یہ دانتوں کی قدرتی چمک کو ختم کرتا ہے۔
٭ برف
دانتوں سے برف چبانا انتہائی لطف اندوز ثابت ہوتا ہے۔ مگر برف درحقیقت بہت سخت ہوتی ہے جو دانتوں میں دراڑ پیدا کرسکتی ہے۔
٭ انرجی ڈرنکس
دماغ کو حاضر رکھنے کے لئے ایک نئی ایجاد اینرجی ڈرنکس ہیں ۔ان میں ضرورت سے زیادہ شوگرزاور ایسڈز کا استعمال کیا جاتا ہے جو ہمارے دانت خراب کرسکتا ہے۔
٭ کین فروٹ
کین فروٹ کا نام کافی اچھا محسوس ہوتا ہے ،صرف اس لئے کیونکہ اس میں فروٹ یعنی پھل کا لفظ موجود ہے۔پھل بے شک بہت صحت بخش غذا ہے ۔ لیکن وہ پھل جوکین میں دستیاب ہوں وہ چینی اور شیرے سے لیس ہوتے ہیں ۔ جبکہ چینی دانتوں کی صحت کے لئے سب سے زیادہ خطرناک ہے۔
Facebook Comments
بذریعہ فیس بک تبصرہ تحریر کریں