وہ پیدا ہوا
تو شرافت اور نیک نامی کی ساری اُمیدیں
اُس سے وابستہ کر لی گئیں
تاکہ ۔۔۔فخر سے جیا جاسکے
بچپن ایسے روز چھین لیا گیا
جب ایک شرارت کے نام پر
اُس کی پیٹھ سرخ دھبوں سے چمک اُٹھی تھی
اور اُسے
پیروں سے روند کر
تاریک گوشے میں ڈال دیا گیا
تنہائی اور مایوسی نے نفرت ایجاد کی
اور شرارت کا گلاگھونٹ دیا
کھلونوں کی خواہش نے خواب جنم دیا
صرف ایک خواب ۔۔
جو اُس کے باپ کی موت پر ختم ہوتا تھا
مگر یہ اُس کے بس کی بات نہیں تھی
(اُس کے بس میں تو ایک قلم آیا تھا)
وہ بولتا لڑکا سمٹ گیا
اور اپنے بیانیے کا قتل کر ڈالا
تب اُس کی گونگی زبان نے
بےڈھنگی
بے تکی
علامتیں ایجاد کیں
اپنے اظہار کے لئے!
Facebook Comments
بذریعہ فیس بک تبصرہ تحریر کریں