انفلوئنزا سے کروناوائرس تک۔۔آغر ندیم سحر

یہ سو سال پرانی بات ہے:
پوری دنیا میں تباہی پھیلا دینے والی انفلوائنزا کی وبا 1918ء کے موسمِ خزاں میں امریکی کی 48ریاستوں میں نہایت تیزی سے پھیلی۔امریکی شہروں میں اشتہار لگا دیے گئے کہ کھانسنا یا چھینکنا ایک غیر قانونی عمل ہے اور ایسا کرنے والے افراد کو 500ڈالر جرمانہ ادا کرنا پڑے گا۔واشنگٹن ڈی سی کے ڈاکٹر نوبل پی بیرنز نے کہا ”چھینکنے یا کھانسنے والے افراد پر جرمانہ لگانا چاہیے‘انہیں قید کر دینا چاہیے اور اس وقت تک ان کے منہ پر نقاب یا ماسک چڑھا دینا چاہیے جب تک وہ صحت یاب نہیں ہو جاتے“۔ہزاروں لوگوں کو گلیوں اور گھروں میں ہلاک کر دینے والے غیر مرئی حملہ آور سے جنگ لڑنے والے شہری حکام اور محکمہ صحت کے کارکنوں کی مایوسی کا عالم ایسا عجیب و غریب تھا اور ان کا خیال بھی یہ تھا کہ اس و با سے بچنا مشکل ہی نہیں ناممکن ہے سو وہ اگرچہ اپنی ڈیوٹیاں سر انجام دے رہے تھے لیکن ان کی حالت بھی ایسی ہی تھی جیسی آج کرونا وائرس سے جنگ لڑنے والوں ڈاکٹرز‘پیرا میڈیکل سٹاف‘پولیس اور ریسکیو1122والوں کی ہے۔اس زمانے میں ایک پوسٹر جگہ جگہ چسپاں کیا گیا جس کی عبارت کچھ یوں تھی”یہ بیماری نہایت تیزی سے پھیلتی ہے‘اس سے بچاؤ کی دوا نہیں ہے“۔اس وقت کے ڈاکٹرز کا یہی کہنا تھا کہ اس کا سب سے بہترین علاج احتیاط اور صرف احتیاط ہے۔

انفلوئنزا کی وبا دو لہروں کی صورت میں پھیلی۔پہلی لہر 1918ء کی ابتدا میں امڈی اور دوسری لہر 1918ء کے موسمِ گرما میں وائرس کی قسم میں تبدیلی کے بعد پھیلی اور شدید ترین نقصان پہنچایا۔اس وبا کا باعث بننے والا وائرس سب سے پہلے فروری1918ء میں  سپین کے ایک چھوٹے سے ساحلی قصبے سان سباسٹیان(یہ قصبہ فرانس کی سرحد سے تقریباً بیس میل دور واقع ہے) میں پھیلا تھا،اس اتفاق کی بنا پر اس بیماری کوہسپانوی نزلہ یا ہسپانوی لیڈی کا نام دیا گیا۔ انفلوئنزا کی  شدت کا اندازہ اس بات سے لگایئے کہ 1919ء کے موسمِ بہار تک اس وائرس نے بیشتر یورپ اور پورے امریکہ کو اپنی لپیٹ میں لے لیا۔مارچ1918ء یعنی پہلی جنگ کے آخری برس میں امریکی ریاست کنساس کے علاقے فورٹ ریلے میں کیمپ فنسٹن اور انفلوئنزا کی وبا کے پہنچنے تک وہ یورپ اور ایشیا میں بربادی پھیلا چکی تھی۔ایسی قوم جسے پہلی جنگِ عظیم نے ویسے ہی برباد کر دیا تھا جب یہاں سے انفلوئنزا رخصت ہوئی تو اس نے ان برباد ہوئی اقوام کو معاشرتی اور معاشی بحران کے ذریعے تباہی سے دوچار کر دیا تھا۔اس پراسرا بیماری کے بارے مختلف نظریات سامنے آئے۔نیویارک ٹائمز(21جون 1981ء) کے مطابق جرمن فوج شلجم زیادہ استعمال کرتی تھی جس کی وجہ سے اس بیماری نے جنم لیا،دو ہفتے بعد ٹائمز نے یہ رپورٹ دی کہ فرانس کی طرف سے آنے والی ہواؤں نے اس بیماری کو جنم دیا۔اس وائرس نے جب ایک بار بحیرہِ  اوقیانوس پار کر لیا تو پھر انتہائی تیزی سے امریکہ میں پھیلا۔ستمبر1918ء میں امریکہ میں انفلوئنزا سے 387افراد روزانہ کی بنیاد پہ لقمہ اجل بنے اور اس ایک مہینے میں مجموعی طورپر  12ہزار افراد اس وائرس سے ہلاک ہوئے اوراسی طرح اکتوبر میں روزانہ کی بنیاد پر ہلاک ہونے والوں کی تعداد 6300ہو گئی اور ایک ماہِ اکتوبر میں ایک لاکھ پچانوے ہزارنوے  لوگ ہلاک ہو گئے۔ہلاکتوں کی ہولناکی واضح کرنے کے لیے یہ کافی ہے کہ اس وائرس نے مجموعی طور پر دو کروڑ بیس لاکھ اور ایک اور رپورٹ کے مطابق چار کروڑ لوگوں کو ہلاک کیا۔اس حوالے سے سابق ہیلتھ کمشنر نیویارک ڈاکٹر گولڈ وائز نے اپنے ایک بیان میں یہاں تک کہا تھا کہ ”جو اموات محکمہ صحت والے بتا رہے ہیں یہ جھوٹ ہے بلکہ اموات اس سے کہیں زیادہ ہوئیں جو عوام سے چھپائی گئیں“۔ اس عالمگیر قاتل نے کیسے کیسے چن چن کر لوگوں کو قتل کیا اور کہاں سے آئی اور کیسے پھیلی اس بارے میں درجنوں تحقیقات ہوئیں مگر ابھی تک کوئی واضح تحقیق سامنے نہیں آئی۔سٹیفن جے سپگنیس نے اپنی کتاب میں لکھا تھا ”انفلوئنزا کی بیماری آج بھی موجود ہے اور موثر ویکسی نیشن پروگراموں کی بدولت یہ وبا محدود رہی ہے۔ہمارے پاس انفلوئنزا کے بہت سے جراثیموں کا علاج موجود ہے تاہم فطرت باوسیلہ ہے اور ہمیشہ اس ات کا امکان رہے گا کہ کوئی ایسا وائرس نمودار ہو جائے گا جس سے ہم کوئی بچاؤ نہیں کر سکیں گے اور وہ دوبارہ اسی طرح پوری دنیا کو اپنی لپیٹ میں لے لے گا“۔

Advertisements
julia rana solicitors london

قارئین کرونا وائرس بھی نزلہ‘زکام‘کھانسی اور چھینکنے سے شروع ہوا اور دیکھتے ہی دیکھتے اس نے بیشتر یورپ اور امریکہ سمیت پورے ایشیا کو اپنی لپیٹ میں لے لیا اور دنیا کے دو سو ممالک اس وائرس کے سامنے سرینڈر کرچکے ہیں کیونکہ اس وائرس کی نہ پہلے کوئی ویکسین تھی اور نہ ہی آج کوئی ویکسین ہے۔آج سے ایک سو دو سال قبل بھی ہمارے ڈاکٹرز اور محکمہ صحت والے یہ سوچتے رہے کہ یہ وائرس کہاں سے آیا‘کیسے آیا اور کہاں گیا‘کسی کے پاس کوئی جواب نہیں تھا اور جواب ہوتا بھی کیسا کیونکہ ایک انگریز اپنی کتاب میں جاتے جاتے یہ بتا یاتھا کہ ”قدرت باوسیلہ(اس نے چالاک کا لفظ استعمال کیا تھا)ہے“لہٰذا قدرت کبھی بھی ناراض ہو کر کسی بھی طرح کا امتحان لا سکتی ہے۔ آج اس وائرس پر مبصرین کے مختلف گروہ بن گئے‘دائیں بازو والوں کا خیال ہے کہ یہ ایک قدرتی آفت ہے اور اس کا علاج صرف دعا اور صدقہ ہے جبکہ بائیں باوزو والوں کا کہنا ہے کہ یہ سب بائیولاجیکل وار ہے اور اس سے جلد ہی چھٹکارا مل جائے گا۔اور تیسرا گروہ سائنس دانوں اور ریسرچرز کا ہے جن کے پاس نہ آج سے سو سال قبل انفلوئنزا کی کوئی ویکسین بن سکی اور نہ ہی ان سے کرونا وائرس کی کوئی ویکسین بن پا رہی ہے سو میرا آج بھی یہی خیال ہے کہ اس کا علاج وہی ہے جو آج سے ایک سو دو سال قبل انفلوئنزا کے بچاؤ کے لیے اپنایا گیا تھا اور وہ تھا ”کھانسنا منع ہے“ یا ان پر جرمانہ عائد کر دیں۔حیرت تو اس بات پر ہے کہ پاکستان میں اس وائرس کے آغاز میں اعلان کیا گیا کہ گھروں سے نہ نکلیں لیکن لوگ باز نہ آئے۔لاک ڈون کر دیا گیا کہ لوگ شاید گھر بیٹھ جائیں لیکن لوگ تب بھی باز نہ آئے اور اب کرفیو پر غور کیا جا رہا ہے۔اس قوم کو کرفیو بھی گھر نہیں بٹھا سکتا کیونکہ یہ ایک کنفیوز قوم ہے جو ہمیشہ وہ کام کرتی ہے جس سے اسے روکا جاتا ہے۔کسی نے کیا خوب کہا کہ اس قوم کو اگر جنت بھی بھیج دیا جائے تو یہ ایک دفعہ جہنم کا چکر لازمی لگائے گی،صرف یہ دیکھنے کہ وہاں ہو کیا رہا ہے۔ اس قوم کوامریکہ کی طرح جرمانے کریں‘ماسک دیں یا پھر سینیٹائزر گھر گھر تقسیم کریں‘یہ قوم صرف یہ دیکھنے باہر نکلتی ہے کہ یار کرونا واقعی ہے یا صرف ڈرایا جا رہا ہے۔آپ اس عظیم قوم کی ذہنیت کا اندازہ اس بات سے لگایے کہ حکومت نے لاک ڈون کے دنوں میں مستحقین کو گھر گھر راشن پہنچانے کی ذمہ داری لی‘ایسے میں ہزاروں ایک گھرانوں ے بھی اپلائی کردیا جو آسانی کے ساتھ اپنا گزارہ کر سکتے ہیں یعنی وبا کے دنوں میں بھی مخصوص لوٹ مار کا ذہن رکھنے والا طبقہ مظلوم کا حق مارنے سے باز نہیں آ رہا۔ایسی قوم پر اگر طاعون‘انفلوئنزا یا کرونا جیسے وائرس جیسا عذاب
نہ آئے تو کیا آئے۔قومیں مشکل وقتوں میں کیسے سروائیو کرتی ہیں؟اپنے عمل سے پہچانی جاتی ہیں اور کرونا وائرس کے دنوں میں ہمارے اعمال کیا ہیں آپ حالیہ صورت حال سے اندازہ لگا سکتے ہیں کہ روز بروز کرونا وائرس کی پھیلاؤ میں تیزی سے اضافہ ہورہا ہے اور اگر ہم نے خود کو نہ بدلا‘ہم نے قدرت کی طرف رجوع نہ کیا اور اپنی اعمال نہ بدلے تو یقین جانیں طاعون سے اڑھائی کروڑ اور انفلوئنزا سے چار کروڑ لوگ ہلاک ہوئے تھے اور کرونا سے اس وقت تک پینتالیس ہزار لوگ مر چکے ہیں اور یہ تعدا روز بروز بڑھ رہی ہے۔

Facebook Comments

آغر ندیم سحر
تعارف آغر ندیم سحر کا تعلق منڈی بہاءالدین سے ہے۔گزشتہ پندرہ سال سے شعبہ صحافت کے ساتھ وابستہ ہیں۔آپ مختلف قومی اخبارات و جرائد میں مختلف عہدوں پر فائز رہے۔گزشتہ تین سال سے روزنامہ نئی بات کے ساتھ بطور کالم نگار وابستہ ہیں۔گورنمنٹ کینٹ کالج فار بوائز،لاہور کینٹ میں بطور استاد شعبہ اردو اپنی خدمات سرانجام دے رہے ہیں۔اس سے قبل بھی کئی اہم ترین تعلیمی اداروں میں بطور استاد اہنی خدمات سرانجام دیتے رہے۔معروف علمی دانش گاہ اورینٹل کالج پنجاب یونیورسٹی لاہور سے اردو ادبیات میں ایم اے جبکہ گورنمنٹ کالج و یونیورسٹی لاہور سے اردو ادبیات میں ایم فل ادبیات کی ڈگری حاصل کی۔۔2012 میں آپ کا پہلا شعری مجموعہ لوح_ادراک شائع ہوا جبکہ 2013 میں ایک کہانیوں کا انتخاب چھپا۔2017 میں آپ کی مزاحمتی شاعری پر آسیہ جبیں نامی طالبہ نے یونیورسٹی آف لاہور نے ایم فل اردو کا تحقیقی مقالہ لکھا۔۔پندرہ قومی و بین الاقوامی اردو کانفرنسوں میں بطور مندوب شرکت کی اور اپنے تحقیق مقالہ جات پیش کیے۔ملک بھر کی ادبی تنظیموں کی طرف سے پچاس سے زائد علمی و ادبی ایوارڈز حاصل کیے۔2017 میں آپ کو"برین آف منڈی بہاؤالدین"کا ایوارڈ بھی دیا گیا جبکہ اس سے قبل 2012 میں آپ کو مضمون نگاری میں وزارتی ایوارڈ بھی دیا جا چکا ہے۔۔۔آپ مکالمہ کے ساتھ بطور کالم نگار وابستہ ہو گئے ہیں

بذریعہ فیس بک تبصرہ تحریر کریں

Leave a Reply