ہمارے معاشرے میں جرائم کی رفتار جس تیزی سے بڑھ رہی ہے،اس سے دو ہی نتیجے اخذ کیے جاسکتے ہیں،
پہلا نتیجہ یہ کہ انتظامیہ اور حکومت اس رفتار کو خاطر میں نہیں لاتی،لہذا ان کے نزدیک کوئی تشویشناک بات نہیں۔
دوسرا نتیجہ یہ نکلتا ہے کہ جرائم کوختم کرنے کے ذرائع انتظامیہ کے پاس نہیں ہیں،لہذا وہ بے بس ہے۔اور اس پر طرہ یہ کہ جرائم کی نوعیت میں بھی فرق آچکا ہے۔چوری،لوٹ مار،ڈکیتی،قتل و غارت تو روزمرہ کے جرائم ہیں،اب ان میں جنسی جرائم بھی نمایاں ہورہے ہیں۔جرائم میں اضافے کے کئی اسباب ہیں۔معاشرے میں اقتصادی تغیررونما ہوچکا ہے،قدیم زمانے کی وہ اخلاقی قدریں ختم ہوچکی ہیں۔جن قدروں کے حوالے سے اخلاقیات کا رونا رویا جاتا ہے،ہم معاشرتی تبدیلیوں کو محسوس تو کرتے ہیں،لیکن ان کا تجزیہ کرنے کو تیار نہیں۔ہماری فکر کے ڈانڈے ماضی سے ملتے ہیں،حال کو دیکھنے اور پرکھنے کی جرات نہیں،یہی وجہ ہے کہ اب گفتگواور تھریر میں مبہم اور غیر یقینی باتیں پائیں گے۔

جو لوگ کہتے ہیں کہ معاشرے کی تنظیم ِ نوکے بغیر کوئی مسئلہ حل نہیں ہوسکتا۔ان کی بات کوئی سننے کو تیار نہیں ہے کہ معاشرے کی تنظیم ِ نو میں پرانے اور قدیم نظریات اور تصورات کی کوئی گنجائش نہیں ہے۔۔اور یہ کہ اب معاشرے میں اصلاحات کوئی معنی نہیں رکھتیں۔تنظیمِ نو کے ضمن میں بنیادی بات تو یہ ہے کہ ہمیں تسلیم کرنا پڑے گا معاشرتی زندگی کی بنیاد نظریات نہیں بلکہ “پیداواری رشتے”ہیں۔۔معاشرے کی اہمیت اس کی پیداواری صلاحیت کے مطابق نہیں ہے۔

ہمارے ہاں گزشتہ 72برسوں سے پیداوار کے ذرائع اور اس کی تقسیم میں بہت تبدیلی آچکی ہے،لیکن ہم اس تبدیلی کو معاشرے کی پرانی ہیت پر اثر انداز ہونے نہیں دیتے۔۔ہم صنعت و تجارت زرعی پیداوار کے نئے طریقوں اور انداز کو بحیثیت حقائق نہیں لیتے۔۔مثال کے طور پر ہم چور بازاری،رشوت،اورزخیرہ اندوزی کیخلاف بہت کچھ کہتے ہیں،لیکن یہ سوچنے کی تکلیف گوارا نہیں کرتے کہ چوربازاری اور ذخیرہ اندوزی سرمایہ پرست معیشت کے لازمی پہلو ہیں،اگر آپ سرمایہ دارانہ نظام معیشت برقرار رکھنے پر تیار ہیں تو پھر چور بازاری،مہنگائی،ذخیرہ اندوزی اور سمگلنگ کی نعمت سے چھٹکارہ حاصل نہیں کرسکتے،ہمارے ہاں ایسے سیاستدانوں اور رہنماؤں کی کمی نہیں،جو ان معاشرتی برائیوں کو اخلاقیات کی تعلیم سے ختم کرنا چاہتے ہیں،یہ دراصل معاشرتی حقائق سے چشم پوشی کرنے کے مترادف ہے،وہ سرمایہ داراور جاگیرداروں کے طبقوں کی حیثیت قائم رکھنا چاہتے ہیں۔کہ وہ خودسرمایہ دارانہ اور جاگیردارانہ ذہنیت کے مالک ہیں،پنڈٹ جواہر لال نہرو جاگیرداری کے خلاف اپنے دلائل دیتے ہوئے اکثر کہا کرتے تھے کہ روس نے زار کے بعد یہ کام انتہائی مختصر عرصے میں کرلیا تھا تو بھارت ایسا کیوں نہیں کرسکتا۔

ہمارے ہاں کے قائدین اور رہنماؤں کے لیے سائنٹیفک تنظیم نو ء کا لفظ انتہائی تکلیف دہ بن گیا ہے۔دراصل یہی لوگ ہیں جو معاشرے کی تبدیلی کے خواہاں نہیں،یہی وہ صاحبِ اثر ہیں جو تنظیمِ نوء کے لفظ سے بدکتے ہیں،یہ عام لوگوں کی بھلائی ہر گز نہیں چاہتے بلکہ یہ لوگ ذاتی ملکیت کو زندگی کا محور سمجھتے ہیں،اور مملکت بن گیا ہے۔ضرورت اس بات کی ہے ہم معاشرتی زندگی کے اقتصادی اور مادی عوامل کو زیرِ بحث لائیں،معاشرتی برائیوں اور ان اسباب کا سائنٹیفک مطالعہ کریں اور حقیقت پسندانہ نگاہ سے معاشرتی زندگی کو دیکھیں،جب تک میں،آپ اور ہم سب ایسا نہیں کریں گے،اس وقت تک معاشرے میں انتشار موجود رہے گا۔

میرے حساب سے سائنٹیفک تحقیق کا انحصار کسی مسئلے کے بارے میں ذاتی نقطہ ء نظر، تجزیہ،تجربے یا احساس پر مبنی نہیں ہوتا،بلکہ تحقیق،ریسرچ اور دستیاب مواد کو سائنسی نقطہ نظر سے زیر تجزیہ لانے کا عمل ہے،یہی وجہ ہے کہ میں نے یہ بتانا بھی ضروری سمجھا ہے کہ یہ پاکستان کی معاشی،سماجی،مذہبی،سیاسی اور اقتصادی و معاشرتی زندگی میں تیزی سے پھیلتی ہوئی کرپشن سے افواج پاکستان بھی نہیں بچ سکی۔کہ فوج کی طاقت بے حساب ہے،اس لیے اس کی کرپشن کی بھی کوئی حد نہیں،کہ کون اپنے سیاسی کردار س دستبردار ہونا چاہے گا،جبکہ اس کردار کے ساتھ وافر مال و دولت وابستہ ہو۔

ایک بار اگر ادارے نے اپنی بیرکوں سے نکل کر اپنے آپ کو ملکِ شاد باد کی معاشی مین سٹریم سے جوڑا تو بعض افراد کی دولت میں بے پناہ اضافہ لازم تھا۔
میرے حساب سے جب سیاسی اور معاشی مفادات یکجا ہوجائیں تو فوج کا اپنی بیرکوں میں رہنا مشکل ہو جاتا ہے۔
اب آ ٓئیے حکایت سنیے۔۔۔
یاد رہے کہ اس حکایت کا میرے کالم سے ہر گز کوئی تعلق و واسطہ نہیں۔
ایک ایسے ہی انتشار زدہ معاشرے اور لہولہان ملک کا “بادشاہ”جنگل میں شکار کھیلنے گیا،اس نے یہ خوبصورت ہرنی کا نشانہ لیاجو خطا گیا۔۔۔
بولا۔۔بچ گئی
پھر ایک خرگوش کا نشانہ لیا،وہ بھی خطا گیا
بولا۔۔بچ گیا
اتنے میں پہاڑ سے ایک بھاری پتھر لڑھکا،قریب تھا کہ بادشاہ اس پتھر کے نیچے آکر کچلا جاتا،مگر وہ تیزی سے پہلو بچا گیا۔۔۔
اتنے میں کہیں سے آواز آئی۔۔۔۔۔”بچ گیا”!

Advertisements

لوگ بچتے ہیں محبت کی پریشانی سے
میں نے سیکھا ہے محبت میں پریشاں ہونا!