پشاور اور کوئٹہ میں طاقت کا بھرپور مظاہرہ کرنے کے بعد مولانا فضل الرحمان نے وزیر اعظم عمران خان سے مستعفیٰ ہونے کا مطالبہ کر دیا۔ انہوں نے کہا اس وقت ملک میں جمہوریت نام کی کوئی چیز نہیں بلکہ غیر اعلانیہ مارشل لا نافذ ہو چکا ہے۔ گزشتہ روز کوئٹہ میں ایک بہت بڑی ریلی سے خطاب کرتے ہوئے جے یو آئی کے سربراہ مولانا فضل الرحمان نے اعلان کیا کہ وزیراعظم عمران خان اگست کے مہینے میں مستعفیٰ ہو جائیں، ورنہ اکتوبر میں اسلام آباد کی جانب مارچ کیا جائے گا۔ انہوں نے کہا جعلی حکومت کے خلاف طبل جنگ بج چکا ہے اور وہ حکومت کا خاتمہ کر کے گھروں کو لوٹیں گے۔

متحدہ اپوزیشن کو اعتماد میں لیے بغیر مولانا فضل الرحمان نے پی ٹی آئی حکومت کے خاتمے تک جدوجہد جاری رکھنے کا اعلان کر دیا۔ مولانا جیسے منجھے ہوئے، زیرک اور حالات کا رخ پہچاننے والے سیاستدان نے حکومت گرانے کا اعلان سوچے سمجھے بغیر نہیں کیا ہو گا۔ مولانا نے سیاست میں کچی گولیاں نہیں کھیلیں اور نہ ہی وہ تپتی زمین پر پاوں رکھتے ہیں۔ مولانا بلا مقصد بڑے بڑے دعوے نہیں کرتے اور محض اپنی جماعت اور عوام پر بھروسہ کر کے حکومت کے خاتمے کی تحریک چلانے کا اعلان کیسے کر سکتے ہیں۔ مولانا مقتدرہ قوتوں سے حکومت کی پشت پناہی کرنے پر شکوہ تو کرتے ہیں۔ مگر ان قوتوں سے کسی قسم کا ٹکراو مول لینے کو تیار نہیں۔ شاید مولانا کی حکمت عملی ہے کہ وہ متحدہ اپوزیشن کی قوت سے سیاسی دباؤ بڑھا کر مقتدرہ قوتوں کو غیر جانبدار کرنے میں کامیاب ہو جائیں گے۔ حکومتی نا اہلی، ناقص اقتصادی منصوبہ بندی، کمر توڑ مہنگائی، بے روزگاری اور معاشی بد حالی کی وجہ سے حکومت کے خلاف عوام میں پائی جانے والی بے چینی، تاجروں کی ملک گیر شٹرڈاون ہڑتال، جھوٹے صنعتکاروں کا حکومتی پالیسیوں پر عدم اعتماد، آئے روز وکلا کے احتجاج اور اس پر متحدہ اپوزیشن کی حکومت گراؤ تحریک، مقتدرہ قوتوں کی حالیہ سوچ پر اثر انداز ہو سکتے ہیں۔

مولانا نے عمران خان حکومت کو ایک بڑا چیلیج تو کر دیا، ساتھ ہی انہوں نے آصف زرداری اور شہباز شریف کو ایک کڑے امتحان میں ڈال دیا ہے۔ دیکھنایہ ہے کہ زرداری اور شہباز کی مفاہمت کے نام پر مصلحت پسندی اور موقع پرستی کی سیاست مولانا کے عزائم کو ناکامی سے دوچار کرتی ہے، یا پیپلز پارٹی اور مسلم لیگ ن مولانا کے اعلان کو متحدہ اپوزیشن کا بیانیہ بنانے پر رضامند ہوتے ہیں۔

For All your tax and accounting needs

http://www.taxchops.ca

جب تک پنجاب اور خیبر پختون خوا، اپوزیشن تحریک کا مرکز نہیں بنتے حکومت کو گرانا نا ممکن ہو گا۔ جے یو آئی اور اے این پی خیبر پختون خوا میں حکومت کے خلاف میدان سجانے کو تیار بیٹھی ہیں۔ یہ دونوں جماعتیں متحد ہو کر صوبہ خیبر پختون خوا میں حکومت مخالف تحریک چلانے کی بھر پور صلاحیت رکھتی ہیں۔ پی پی پی، ن لیگ اور متحدہ اپوزیشن کی دیگر جماعتوں کی شمولیت سے خیبر پختون خوا میں حکومت مخالف تحریک کامیابی سے ہمکنار ہو سکتی ہے۔

جب تک پنجاب میں مسلم لیگ ن، شہباز شریف کی مصلحت پسندی سے نجات حاصل کر کے تحریک چلانے کا عہد نہیں کرتی، پی ٹی آئی کی حکومت کا خاتمہ دیوانے کا خواب رہے گا۔ ان حالات میں مریم نواز کو مسلم لیگ کی روائتی موقع پرستانہ سیاست سے چھٹکارا پا کر تاریخی کردار ادا کرنے کا سنہری موقع مل سکتا ہے۔ بلاول بھٹو بھی حکومت مخالف تحریک میں موثر کردار ادا کر کے پنجاب میں پیپلز پارٹی کی بحالی کی بنیاد رکھ سکتے ہیں۔