ربع صدی قبل جب آتش جوان تھا تو خون پسینہ کھیل کے میدان میں بہانے کا شوقین تھا ۔کھیلوں سے رغبت بچپن میں ہی ایسی پیدا ہوگئی تھی کہ اسکول میں بریک کے دوران اور بعد از چھٹی گراؤنڈ میں بھاگ دوڑ یا کھیلوں میں مصروف رہنا پسندیدہ مشغلہ ٹھہرا تھا۔کرکٹ کا رسیا ہونے کی وجہ سے اولین محبت بیٹ اور بال سے تھی مگر ہاکی بھی تب اپنے عروج پر تھی۔ہاکی ،فٹبال،کرکٹ کے ساتھ گلی ڈنڈا سب کھیل کھیلے جاتے تھے ۔1994 میں یونیورسٹی کرکٹ ٹیم میں جب سلیکشن ہوگئی تو گویا سونے پر سہاگے والی بات ہوئی ۔ساری زندگی کھیلوں سے محبت رہی مگر گھر کے کے سخت ماحول کی وجہ سے تعلیم پر توجہ اولین ترجیح ٹھہری تھی۔اسی لیے اسکول اور کالج کی ٹیم کی طرف سے کھیلنے کی اجازت نہ مل سکی مگر یونیورسٹی میں آنے کے بعد یہ پابندی اٹھ گئی تو گویا سوکھے دھانوں پر پانی پڑگیا۔یونیورسٹی کرکٹ ٹیم کی طرف سے کھیلتے ہوئے کرکٹ ٹیم کو پہلی بار فائنل راؤنڈ تک لے جانا تب یقیناََ اپنے آُپ میں ایک کارنامہ تھا ۔اس کی کہانی پھرکبھی مگر اتنا ضرور ہے یونیورسٹی کلر ملنا باعث صد افتخار بات تھی ۔

1994 کا سال کھیلوں کے حوالے سے پاکستان کے لیے بھی بہت سعید تھا۔پاکستان اپنے محدود وسائل کے باوجود چار ورلڈ کپ ٹائٹلز ہولڈر تھا۔کرکٹ میں 1992 ورلڈ کپ ( جسے اب کچھ یار لوگ آفٹر افیکٹس کے حوالے سے ایک ایسی تعبیر کا حصہ سمجھتے ہیں جو ان کے وہم و گمان میں بھی نہ تھی, مگر تب یہ سب کے لئے فخر کی بات تھی ). شہباز سینئر کی کپتانی میں ہاکی ورلڈ کپ جیتنا ایک ایسا جادوئی کارنامہ تھا جس کی کوئی بھی توقع نہیں رکھتا تھا مگر ہماری ہاکی ٹیم نے یہ معجزہ کر دکھایا تھا۔تیسرے ہمارے ورلڈ چیمپیئن جان شیر خان تھے جو اسکواش میں جہانگیر خان کے بعد سب سے نمایاں کھلاڑی رہے۔چوتھے ورلڈ چیمپئن ایمیچور اسنوکر کے کھیل میں محمد یوسف تھے جنہوں نے بغیر کسی امداد کے اپنی محنت شاقہ سے یہ ٹائٹل اپنے نام کیا تھا ۔خیر ہماری آج کی اس تحریر کا موضوع نہ تو پاکستان کا کھیل کے کے میدان میں نمایاں کارکردگی دکھانا ہے اور نہ ہی ذاتی طور پر کرکٹ میں جو کارنامے انجام دیئے اس پر لکھنا ہے بلکہ ایک ایسے کھیل کے بارے میں لکھنا ہے جس سے ربع صدی قبل محبت شروع ہوئی اور آج تک جاری و ساری ہے ۔ یہ کھیل باسکٹ بال کہلاتا ہے۔
نوے کی دہائی کے آغاز سے جب ایس ٹی این STN چینل نے نجی نشریات کا آغاز کیا تو گویا پی ٹی وی کے بعد یہ ایک ایسی تفریح تھی جو اس دور کے گھٹن والے ماحول میں ہوا کا ایک تازہ جھونکا ثابت ہوئی ۔پی ٹی وی پر پر کھیلوں کی خبریں دی جاتی تھیں اور ہفتے کے اختتام پر سپورٹس راؤنڈ اپ بھی نشر ہوتا تھا مگر جو مزہ سی این این کی اسپورٹس کی خبروں کو دیکھنے کا ہوتا تھا اس کا ثانی نہیں تھا۔انہی دنوں شمالی امریکہ کی کی اسپورٹس نیوز میں میں باسکٹ بال اور آئس ہاکی جو اپنی اپنی ایسوسی ایشنز NBA اور NHL پر مشتمل ہوتی تھیں ان میں آہستہ آہستہ دلچسپی پیدا ہونا شروع ہوگئی۔باسکٹ بال کے اس دور کی ٹیم اور کھلاڑیوں کو کون بھول سکتا ہے ہے جب بھی شکاگو بلز(Chicago Bulls) کا نام آتا تو ساتھ ہی مائیکل جارڈن کا چہرہ ابھرآتا۔میجک جانسن LA Lakers, حکیم الاجوان اور ہیوسٹن راکٹس،ڈینس راڈمین، شکیل اونیل اور بڑے بڑے نامی کھلاڑی جنہوں نے کئی نسلوں کو متاثر کیا اور باسکٹ بال کے کھیل میں کئی بڑے کھلاڑیوں کی آمد کا سبب بنے۔


1994 میں ہی کینیڈا میں باسکٹ بال کی پہلی NBA فرنچائز لینے کی کوششوں میں مصروف ٹیم کو اپنی شناخت کے لئے نام کے انتخاب کا مرحلہ درپیش تھا ۔ امریکا سے باہر یہ دوسری ٹیم تھی۔ وینکوور گرزلیز کے بعد جو ٹورانٹو میں باسکٹ بال کی نشاۃ ثانیہ چاہتی تھی ۔دوہزار سے زائد انٹریز میں سے فائنل ہونے والے چند ناموں میں سے ایک نام “Raptors” تھا ۔

1993 میں اٹیون اسپیل برگ کی ہدایت کاری میں بننے والی فلم “جراسک پارک” نے دھوم مچا دی تھی ۔فلم کے ٹائٹل پر سب سے نمایاں تصویر ایک ایسے ڈائناسار کی تھی جسے ریپٹر کے نام سے جانا جاتا ہے۔لگ بھگ پچھتر ملین ا سال قبل پایا جانے والا یہ ڈائناسار ستر کلوگرام وزنی ہوتا تھا اور اڑ نہیں سکتا تھا مگر کافی تیز رفتاری سے بھاگ سکتا تھا ۔ تو اس ڈائنا سار کے نام پر نئی ٹیم کا اتفاق ہو گیا۔اسی لئے آج بھی ایرینا کے باہر عام لوگوں کے لئے بڑی اسکرین پر میچ دکھانے والے ایریا کو جراسک پارک کہا جاتا ہے ۔