کراچی :بینکنگ کورٹ نے میگا منی لانڈرنگ کیس میں پاکستان پیپلز پارٹی کے شریک چیئرمین آصف زرداری ، ان کی بہن فریال تالپور اور دیگر ملزمان کی عبوری ضمانت میں 11 مارچ تک توسیع کردی۔

تفصیلات کے مطابق، منگل کو کراچی کی بینکنگ کورٹ میں میگا منی لانڈرنگ کیس کی سماعت ہوئی۔

سابق صدرآصف زرداری آج عدالت کےروبرو پیش نہیں ہوئے جبکہ ان کی ہمشیرہ فریال تالپور، حسین لوائی ، عبدالغنی مجید ،نمر مجید، علی کمال مجید  اور دیگر ملزمان عدالت میں پیش ہوئے۔

معاون وکیل نے عدالت کو بتایا کہ حسین لوائی کے وکیل شوکت حیات 7  مارچ تک چھٹیوں پر ہیں ۔

پراسیکیوٹر ایف آئی اے نے عدالت کو آگاہ کیا ملزم اسلم مسعود اسلام آباد میں ہماری حراست میں ہے،7 مارچ کو ریمانڈ کی مدت ختم ہوگی ۔

آصف علی زرداری کے وکیل فاروق ایچ نائیک کا کہنا تھا آصف علی زرداری قومی اسمبلی کے اجلاس میں مصروف ہیں، آصف علی زرداری کی عدم حاضری کے باعث سماعت ملتوی کر دی جائے۔

عدالت نے آصف زرداری ، فریال تالپور اور دیگر ملزمان کی عبوری ضمانت میں 11 مارچ تک توسیع کردی۔

عدالت نے ملزمان کو کیس اسلام آباد منتقل کرنے کی درخواست کی نقول بھی فراہم کیں، نیب نے مقدمہ کراچی سے اسلام آباد منتقل کرنے کی درخواست دائر کر رکھی ہے۔

Advertisements

واضح رہے کیس میں سابق صدر اصف زرداری، فریالپور، انور مجید، عبدالغنی مجید، حسین لوائی نامزد ہیں ،ملزمان کیخلاف بوگس اکاؤنٹ کے زریعے اربوں روپے کی منی لانڈرنگ کا الزام ہے، کیس میں انور مجید، عبدالغنی مجید، حسین لوائی، طحہ رضا گرفتار ہیں۔