لاہور:بھارتی ایئر فورس کے گرفتارپائلٹ ابھی نندن کو واہگہ بارڈر پہنچا دیا گیا جسے اب سے کچھ دیر بعدبھارتی حکام کے حوالے کیا جائے گا۔

تفصیلات کے مطابق، جمعے کو بھارتی پائلٹ ابھی نندن کو سخت سیکورٹی حصار میں واہگہ بارڈر پہنچایا گیا، جہاں اسے بھارتی حکام کے حوالے کیا جائے گا۔

گرفتار بھارتی پائلٹ کے ہمراہ بھارتی سفارتخانے کے عملے کے اہلکار بھی موجود ہیں۔

اس موقع پر انتہائی سخت سیکورٹی اقدامات کئے گئے ہیں اور جلو موڑ سے واہگہ بارڈر تک مختلف مقامات پر سیکیورٹی اہلکار تعینات ہیں۔

ترجمان دفترخارجہ ڈاکٹر محمد فیصل کے مطابق بھارتی پائلٹ ابھی نندن کو تھوڑی دیر میں بھارت کے حوالے کیا جائے گا اور اس حوالے سے تمام تیاریاں مکمل کرلی گئی ہیں۔

پاکستان میں تعینات بھارتی ائیر اتاشی بھی اپنے پائلٹ کے ہمراہ بھارت جائیں گے، بھارتی حکومت نے سرحد پر اپنی جانب پریڈ اور پرچم اتارنے کی تقریب منسوخ کرتے ہوئے بھارتی شہریوں کو شرکت سے روک دیا ہے جبکہ پاکستان میں یہ تقریب معمول کے مطابق ہوگی۔

قبل ازیں بھارتی قائم مقام ہائی کمشنر اسلام آباد میں دفتر خارجہ پہنچے جہاں پاکستانی حکام نے انہیں پائلٹ حوالگی سے متعلق باضابطہ طور پر مطلع کیا۔ بھارتی ہائی کمیشن نے بھی اپنے گرفتار پائلٹ کی حوالگی کےلیے سفری دستاویزات مکمل کرلی ہیں۔