جنرل ضیا اور جنرل مشرف بھی ایک پارلیمنٹ رکھتے تھے جس کے اراکین عوامی ووٹوں سے منتخب کروائے گئے تھے۔ جرنیلوں کے زیر سایہ وزیر اعظم اور لاتعداد وزرا پر مشتمل کابینہ بھی وجود میں لائی گئی تھی۔ چاروں صوبوں میں صوبائی اسمبلیاں بھی عوامی ووٹوں سے معرض وجود میں لائی گئیں۔ صوبائی وزرا اعلیٰ اور وزرا بھی دندناتے پھرتے تھے۔

مگر جرنیلوں کی چھتری کے نیچے کنٹرولڈ ڈیموکریسی اور کنٹرولڈ جمہوری اداروں کی حیثیت سے عوام بخوبی آگاہ تھے۔ پارلیمنٹ کے ربڑ سٹیمپ ھونے، اسکی بے اختیاری اور بے بسی پر عوام کو کبھی شک نہیں رہا۔ وزیر اعظم، وزرا اعلیٰ اور وزرا کی طاقت کا سر چشمہ پارلیمنٹ ، آئین اور قانون نہیں بلکہ صدر کے روپ میں اقتدار پر براجمان ایک ڈکٹیٹر جرنیل تھا۔ میڈیا کی آزادی آمروں کے آہنی شکنجے کی نظر ھو چکی تھی۔ طاقت کا دبدبا اور خوف ایسا کہ اعلیٰ ترین عدالت نے فوجی آمروں کو آئین کا حلیہ بگاڑنے اور من مانی ترامیم کا غیر آئینی اختیار تفویض کر دیا۔ تاریخ شاہد ہے کہ عدالت عظمیٰ نے آئین کو ڈکٹیٹروں کے گھر کی باندی بنا دیا تھا۔

آمروں نے عدلیہ کے غیر آئینی فیصلوں سے حاصل کردہ ماورائے آئین اختیارات سے عوامی جمہوری حقوق اور وفاقی جمہوری اصولوں کی دھجیاں اڑائیں۔ وفاق، چاروں صوبوں اور بلدیاتی اداروں کے مالی اور سیاسی اختیارات کا منبہ مرکز میں بیٹھا ایک آمر قرار پایا۔ آمر کی خواہش پر صوبوں کی خودمختاری، اختیارات کی صوبوں اور نچلی سطح تک منتقلی کے راستے بند کر دئے گئے۔ عوامی خوشحالی اور عوامی مسائل کا حل تو ڈکٹیٹروں کے ایجنڈے میں شامل نہیں ھوتا۔ اس لئے عالمی طاقتوں کے ایجندے کی تکمیل اور مالی محتاجی آمرانہ حکومتوں کا طرہ امتیاز رہا ہے۔ اسی لئے آمروں کے اقتدار کو طول دینے میں عالمی طاقتوں نے اہم کردار ادا کیا۔

آج ملک کے اقتدار پر کسی طالع آزما آمر کا قبضہ نہیں۔ ملک میں ایک منتخب پارلیمنٹ ہے۔ وفاق اور تین صوبوں میں تحریک انصاف اور اتحادی جماعتوں کی مخلوط حکومتیں ہیں جبکہ صوبہ سندھ میں پیپلز پارٹی برسراقتدار ہے۔ مگر آج بھی پارلیمنٹ کی بے بسی اور بے اختیار ھونے کا رونا رویا جا رہا ہے۔ پی ٹی آئی حکومت قومی اہمیت کے معاملات قومی اسمبلی میں زیر بحث لانے سے گریزاں ہے۔ اہم خارجہ، داخلہ، اورقومی سلامتی امور پارلیمنٹ سے بالا بالا طے کئے جاتے ہیں۔ اپوزیشن الزام لگا تی ہے کہ حکومت نے قومی اسمبلی کو عضو معطل بنا دیا ہے۔ پی ٹی آئی حکومت پارلیمنٹ کی بالادستی اور اہمیت کو کمتر کرنے پر تلی ھوئی ہے۔ منی بجٹ پیش کرنے کے علاوہ حکومت قانون سازی پر توجہ مرکوز کرنے میں ناکام رہی ہے۔ جوڈیشل ایکٹوازم کے سامنے پارلیمنٹ، سول اداروں اور انتظامیہ کی بے بسی بھی دیدنی ھوتی ہے۔ جوڈیشل ایکٹوازم سے پارلیمنٹ اور آئین کی بالادستی، اور سول انتظامی اداروں کی خودمختاری کو دھچکا لگنا شروع ھو جاتا ہے۔ اگر چیف جسٹس مقننہ اور انتظامیہ کا کام سنبھال لے تو جمہوری عمل، جمہوری حکومتوں اور انتظامیہ پر عوام کا اعتماد اٹھنے لگاتا ہے۔ جوڈیشل ایکٹوازم کا ایسا تسلسل غیر جمہوری اور آمرانہ قوتوں کا راستہ ھمورا کرنے کا سبب بن سکتا ہے۔ بقول ایک ماہر قانون سابقہ چیف جسٹس ثاقب نثار کا جوڈیشل ایکٹوازم جوڈیشل ڈکٹیٹرشپ میں تبدیل ھو گیا تھا اور انہوں نے آئینی حدود سے آگے جا کر کام کیا۔

آئین میں طے شدہ صوبائی حقوق کی خلاف ورزی اور پامالی پر احتجاجی آوازیں بلند ھو رہی ہے۔ صوبوں کو اٹھارویں آئینی ترامیم میں حاصل صوبائی خودمختاری کو عملا ختم کرنے کی سازشیں زور و شور سے جاری ہیں۔ وزیر اعظم عمران خان پنجاب، کے پی کے اور بلو چستان حکومتیں اسلام آباد بیٹھ کر ریموٹ کنٹرول سے چلا رہے ہیں۔ پیپلز پارٹی کی سندھ حکومت حکمرانوں کے مرکزیت پسند مذموم عزائم کی راہ میں سب سے بڑی رکاوٹ ہے۔ صوبہ سندھ کو غیر آئینی مرکزی کنٹرول میں لانے کے لئے کبھی گورنر راج کی بات کی جاتی ہے، تو کبھی پی پی پی میں فارورڈ بلاک بنا کر پی ٹی آئی کی حکومت قائم کرنے کی دھمکیاں دی جاتی ہیں۔ ان حالات میں پیپلز پارٹی اور سندھ حکومت نے صوبائی خودمختاری کے خلاف ہر قسم کی سازشوں کا ڈٹ کر مقابلہ کرنے کا اعلان کر دیا ہے۔ عدالت عظمیٰ نے گذشتہ دنوں کراچی کے ہسپتال کو وفاقی تحویل میں دینے کا فیصلہ کیا۔ آئینی ماہرین نے سپریم کورٹ کے سابق چیف جسٹس کے اس فیصلے کو صوبائی حقوق کی آئینی خلاف ورزی سے تعبیر کیا ہے۔ سیاسی تجزیہ کار سمجھتے ہیں کہ عدالت عظمیٰ کا یہ فیصلہ مستقبل میں صوبائی حقوق سلب کرنے کی راہ ہموار کر سکتا ہے۔ یہ بھی کہا جا رہا ہے کہ مقتدرہ قوتیں اٹھارویں آئینی ترمیم میں متعین کردہ صوبائی حقوق کو قومی سلامتی کے تقاضوں سے ہم آہنگ نہیں سمجھتیں۔ مگر حالات کی سنگینی نشاندھی کرتی ہے کہ وفاق اور صوبوں کے مابین طے شدہ آئینی اختیارات اور ذمہ داریوں کی اکھاڑ بچھاڑ ایک نئے سیاسی بحران کو جنم دے گی۔

اظہار خیال اور میڈیا پر غیر اعلانیہ سنسر شپ اور پابندیوں کا شور و غوغا ہر جانب سنا جا سکتا ہے۔ کئی خبریں اور کالم اشاعت سے روک دئے جاتے ہیں، متعدد میڈیا اینکر کو نام نہاد آزاد چینل چھوڑنے پر مجبور کر دیا گیا۔ سینکڑوں صحافی اور اخباری کارکن بیروزگاری کا شکار ھو چکے ہیں۔ کہا جاتا ہے کہ پرنٹ اور الیکٹرونک میڈیا طاقتور حلقوں کے متعین کردہ فریم ورک اور دائروں کے اندر رہ کر آزادی کا لطف اٹھاتا رہے۔ متعین کردہ حدود سے باہر قدم رکھنے کی صورت میں اشتہارات اور چینل بند ھونے کا خطرہ مول لینے کو تیار رہیں۔روز افزوں بڑھتی مہنگائی اور بے روزگاری نے عوامی زندگی اجیرن کر رکھی ہے۔ قرضوں اور تارکین وطن کی مالی ترسیلات کی محتاج زوال پذیر معیشت سے عوام کی زندگیوں میں خوشحالی لانے کے خواب شرمندہ تعبیر ھوتے نظر نہیں آتے۔