فلو یا انفلوینزا ایک وائرس کی وجہ سے ہونے والی بیماری ہے یہ وائرس ہر سال اپنی ہیئت تبدیل کر لیتا ہے اور زیادہ تر موسم سرما میں بڑی تعداد میں بچوں، بڑوں اور بوڑھوں کو متاثر کرتا ہے۔ کان، گلا اور پھیپھڑے اس کی زد میں آتے ہیں، بخار کے ساتھ جسم اور سر میں درد، کھانسی، سانس لینے میں دشواری، گلا خراب، متلی یا قے اور دست لگنا اس کی علامات ہو سکتی ہیں۔

فلو کی ایک سے زیادہ اقسام ہیں، انفلوئنزا کے علاوہ دیگر وائرسز کے انفیکشن بھی انہیں علامات کے ساتھ آ سکتے ہیں۔اس سے ملتی جلتی بیماری سوائن فلو اور برڈ فلو ہیں جو ۲۰۰۹ اور ۲۰۱۰ میں بڑے پیمانے پر تباہی کا سبب بنیں۔

یہ انسانی جسم کی رطوبت سے پھیلتا ہے، کھانسی یا چھینک سے ہوا میں جانےوالےرطوبت کے ذرات سے پھیلاؤ ممکن ہے، یا وہ اشیاء جو ایک فلو کے مریض کے استعمال میں رہی ہوں اور ان میں اس کا تھوک یا رطوبت ہو۔ صفائی کے بہتر اعمال سے اس کے پھیلاؤ کو کسی حد تک روکا جا سکتا ہے، جیسے

فلو وائرس علامات سے ایک دن پہلے سے لے کر علامات ٹھیک ہونے کے تقریباً چار دن بعد تک ایک انسان سے دوسرے تک پھیلتا ہے، بچوں، بوڑھوں اور دائمی مریضوں میں یہ دورانیہ اور بھی لمبا ہوتا ہے۔یہ بیماری عمر رسیدہ لوگوں، حاملہ خواتین، بچوں اور کسی دائمی مرض والے مریض جیسے کہ ذیابیطس، دمہ یا قوت مدافعت کی کمی والے مریضوں میں جان لیوا حد تک خطرناک ہو سکتی ہے۔

صحت مند افراد میں زیادہ تر فلو ا بعد بغیر کسی علاج کے ایک ہفتے میں ٹھیک ہو جاتا ہے، اس ایک ہفتے میں جتنا ممکن ہو آرام کرنا چاہیے، پینے کی چیزیں پئیں، اور درد کے لیے پیراسیٹامول یا بروفن کھا سکتے ہیں۔اسپرین یا ڈسپرین کا استعمال بالکل نہ کریں، اس کے سائیڈ ایفیکٹ کافی ہیں خاص کر بچوں کو بالکل نہیں دینی چاہیے۔کھانسی کی دوا کا کوئی کردار نہیں بیماری کے جاتے ہی کھانسی بھی ٹھیک ہو جاتی ہے۔

درج ذیل علامات میں سے کوئی بھی ہو تو فوری ڈاکٹر کو دکھانا چاہیے

ابھی تک بچاؤ کا سب سے مؤثر طریقہ ویکسین ہے، یہ ویکسین چھ ماہ کی عمر کے بعد سب کو دی جا سکتی ہے،جن لوگوں کو کوئی پرانا مرض ہے ان کو اہل خانہ سمیت یہ ویکسین ضرور دی جانی چاہیے تا کہ ان سے بھی اس کا پھیلاؤ روکا جا سکے۔چونکہ وائرس ہر سال اپنی ہیئت تبدیل کرتا ہے اس لیے ہر سال فلو کے موسم سے پہلے ویکسین لگوانی چاہیے۔ویکسین کے سائیڈ ایفیکٹ میں انجکشن والی جگہ پہ درد، سوزش کے علاوہ کسی کسی کو ہلکا بخار ہو سکتا ہے، ویکسین سے فلو نہیں ہوتا کیونکہ اس میں وائرس مردہ حالت میں ہوتا ہے، جو بیماری پھیلانے کی سکت نہیں رکھتا۔

اینٹی وائیرل دوائی کا کردار محدود ہے، یہ بیماری کے دورانیے کو کم نہیں کرتی، صرف بیماری کی شدت کو ہلکا کرتی ہے۔ صحت مند افراد جنہیں کوئی پرانا یا دائمی طبی مسئلہ نہ ہو تو یہ انہیں نہیں دی جاتی۔ صرف ان مریضوں کو دی جاتی ہے جن کی بیماری شدید ہو یا کوئی پرانا دائمی مرض ہو۔اینٹی باؤٹک کا بھی کوئی کردار نہیں ہے، کیونکہ وہ وائرس پہ کوئی اثر نہیں رکھتی، صرف تب دی جاتی ہے جب معالج یہ سمجھے کہ فلو کے ساتھ کوئی دوسرا ایسا مرض بھی ہے جس میں وہ دی جانی ضروری ہے۔

ہاتھ باقائدگی سے دھونے، فلو کے مریض سے دور رہنے اور ہر سال ویکسین لگوانے سے اس بیماری سے کافی حد تک بچا جا سکتاہے۔