سپریم کورٹ کی جانب سے مسیحی خاتون آسیہ بی بی کو توہین رسالت کے الزام سے بری کئے جانے کے خلاف مذہبی جماعتوں کے احتجاج اور ہڑتال کی کال کے بعد آپریشن کی خبروں کی تردید کرتے ہوئے وفاقی وزیر اطلاعات فواد چودھری نے کہا ہے کہ ملک میں امن و امان کی صورتحال کنٹرول میں ہے اور مظاہرین کے ساتھ مذاکرات جاری ہیں۔ انہوں نے اپنے ٹویٹر اکائونٹ سے جاری کئے گئے پیغام میں کہا کہ ملک بھر میں حالات کنٹرول میں ہیں، مظاہرین کے ساتھ مذاکرات جاری ہیں، حکومت عوام کی زندگی اور آزادی کی ضامن ہے مظاہرین کے خلاف آپریشن کی سوشل میڈیا پر خبریں غلط ہیں، حکومت تشدد کی راہ نہیں اپنانا چاہتی۔  انہوں نے کہا کہ وزیر اعظم کو صورتحال سے لمحہ بہ لمحہ باخبر رکھا جا رہا ہے اور چین کے اہم دورے کو سبوتاږ کرنے کی کوشش ناکام ہوگی۔