مجھے اپنے پڑوسی سے سخت چڑ تھی۔
محلے میں سب اس کی عزت کرتے ، مجھے کوئی منہ نہ لگاتا۔
اسی وجہ سے میں اس سے نفرت کرتا ،
اور اس کو تنگ کرنے کے بہانے ڈھونڈتا رہتا ۔
ایک روز سڑا ہوا کھانا اس کے صحن میں پھینک آیا۔
دوسرے دن اس کا بچہ گھر پرکیک دے گیا۔
ایک دن کچرا اس کے دروازے پر ڈال آیا۔
دوسرے دن کچھ پھول اپنے دروازے پر ملے۔
کل میں نے اسے محلے میں پکڑ لیا۔
”آخر تم مجھے اچھی اچھی چیزیں کیوں بھیجتے ہو؟“
وہ مسکرایا اور اپنائیت سے بولا۔
” گھر میں جو ہوتا ہے وہی پڑوسیوں کو بھیجا جاتا ہے۔“