قول قرار ۔۔۔۔۔ سلیم خاں گمی

اوہ چور اچکا تے بدمعاش ڈاکو سی۔ پولیس اوہدے پچھے لگی ہوئی سی۔ اوہنے تے اوہدے چار دوسرے ساتھیاں اک ساہوکار دے گھر ڈاکہ ماریا سی تے ساری دولت قابو کرن دے بعد ساہوکار دی دھی نوں پستول مار کے مار دتا سی۔ کیوں پئی ساہوکار دی دھی نے ٹرنکاں تے پیٹیاں دیاں چابیاں تے کنجیاں دین توں انکار کیتا سی۔ پولیس نے ایدھر اودھر چھاپے مارے۔ اوہدے چارے ساتھی گرفتار کر لئے تے اوہناں کولوں ڈاکے دا مال نکل آیا۔ صرف اک اوہ قابو نہ آیا کیوں جو اوہ کدھرے  چھپ چھپا گیا سی۔

پولیس ڈاکواں دے سردار ملکھی سانسی نوں چھیتی توں چھیتی پھڑنا چاہندی سی کیوں پئی اوہو اصلی مجرم سی۔ ڈاکہ مارن دا سارا منصوبہ ملکھی نے ای بنایا سی۔ اوہدے نال دے ڈاکو تے ایتھوں تیک کہندے سی پئی ملکھی تے ساہوکار دی دھی بملا دا ناجائز تعلق سی تے بملا نے ملکھی نوں قول قرار دتا سی پئی اوہ ساری عمر اوہدی رہوے گی۔ پر جد بملا دے پیو نے اوہدا ویاہ کر دتا تے اوس چپ چپیتیاں ویاہ کرا لیا۔ ملکھی غصے اچ آ گیا۔

tripako tours pakistan

اوہ کلم کلا ساہوکار دے گھر گیا تے بملا نوں تھاں مار کے آ گیا۔ ملکھی دی ساتھیاں نے  پولیس نوں آکھیا پئی اوہ نہ تے ملکھی دے نال سن نہ اوہناں نوں پتہ سی پئی فلانے دن ملکھی بملا نوں قتل کرو  گا۔ ملکھی دے نال دے ڈاکواں  دیاں گلاں نتارن واسطے پولیس دا اک خاص دستہ مقرر ہو چکیا سی۔ ملکھی دے چارے ساتھی جان دے سن پئی اوہناں پولیس نال جھوٹھ بولیا اے کہ ملکھی اکلا سی۔ ہن اوہناں دی کوشش سی پئی اوہ کسے نہ کسے طرحاں ملکھی نوں اعتبار اچ لے لین۔

ایس غرض نال اوہناں اک حوالاتی نال ساز باز کیتی پئی اوہ کسے ناں کسے طرحاں ملکھی نوں اوہناں دے بیان دس دیوے۔ حوالاتی نے بری ہون  تے حوالات چوں نکلن توں پہلاں قول دتا سی پئی اوہ اپنا وعدہ پورا کرے گا۔ پولیس ملکھی دے موراں تے چڑھی ہوئی سی۔ اوہناں اوہدا حلقہ گھیر لیا سی تے ملکھی جان بچاندا پھردا سی۔

اک دن ملکھی چوری چوری اک واڑے اچ گیا تے خربوزیاں تے ہدوانیاں دے بپاری نوں کہن لگا پئی اوہنوں ہدوانہ کھوا۔ تن دن توں بھکھا تے جنگل اچ چھپیا سی۔ جد بپاری نوں پتہ لگا کہ ملکھی اوہدا پروہنا اے تے اوس اوہنوں خوشی خوشی ہدوانہ کھوایا تے حقے تے اگ رکھ کے حقہ چا سامنے کیتا۔ ملکھی اوسدے ورتارے توں بہت خوش ہویا تے کہن لگا، “ جیوندا رہیا تے تینوں ہدوانہ کھواون تے حقہ چھکاون دا دس ہزار روپیہ دیاں گا۔ اجےاوہ حقہ پی رہیا سی جے پولیس اوس نوں گھیر کے گرفتار کر لیا۔ جد پولیس اوس نوں ہتھ کڑیاں تے بیڑیاں پہنا کے حوالات ول لے جا رہی سی برہ ہون والے حوالاتی نے اوس نوں اوہدے ساتھیاں دے بیان بارے دسیا۔

Advertisements
merkit.pk

ملکھی بولیا پئی اوہ ایہہ بیان دیوے گا پئی اکلا سی تے اوہدے ساتھی بے گناہ نیں۔ پر اوہدے ساتھی فلانے خربوزیاں دے بپاری نوں دس ہزار روپیہ دین گے۔ کجھ چر بعد بپاری نوں اک راتیں دس ہزار روپیہ مل گیا تے روپیہ ملن دے نو دن بعد ملکھی نوں پھانسی ہو گئی۔

  • merkit.pk
  • merkit.pk

مہمان تحریر
مہمان تحریر
وہ تحاریر جو ہمیں نا بھیجی جائیں مگر اچھی ہوں، مہمان تحریر کے طور پہ لگائی جاتی ہیں

بذریعہ فیس بک تبصرہ تحریر کریں

Leave a Reply