کوئٹہ میں امن دشمنوں نے سکیورٹی اہلکاروں کو پھر نشانہ بنا دیا۔ یہ واقعہ سریاب روڈ کے قریب لانگوآباد میں پیش آیا جہاں دو موٹر سائیکلوں پر سوار دہشت گردوں نے گشت پر مامور سکیورٹی اہلکاروں کی گاڑی پر فائرنگ کردی جس سے 4 ایف سی اہلکار شہید ہوگئے۔
واقعے کے فوری بعد پولیس اور امدادی ٹیمیں موقع پر پہنچ گئیں، علاقے کو گھیرے میں لیتے ہوئے لاشیں اسپتال منتقل کیں۔ پولیس کا کہنا ہے کہ شہید اہلکار ریلوے کی پٹری کی حفاظت کیلئے تعینات تھے۔ ابتدائی تحقیقات کے مطابق حملے میں نائن ایم ایم اور کلاشنکوف کا استعمال کیا گیا۔ خالی خول اور شواہد اکھٹے کر کے تحقیقات شروع کر دی گئی۔ سکیورٹی فورسز نے حملے میں ملوث افراد کی تلاش کیلئے سرچ آپریشن بھی شروع کر دیا ہے۔
آئی جی بلوچستان کی میڈیا سے گفتگو
آئی جی بلوچستان معظم جاہ انصاری نے میڈیا سے گفتگو کرتے ہوئے کہا سکیورٹی اہلکاروں پر فائرنگ صبح 7 بجکر 40 منٹ پر کی گئی، فائرنگ کے واقعے کا کوئی عینی شاہد نہیں مل سکا۔ آئی جی بلوچستان نے بتایا کہ سکیورٹی اہلکاروں پر فائرنگ دہشتگردی کا واقعہ ہے، شواہد سے معلوم ہوتا ہے 3 سے 4 دہشتگردوں نے فائرنگ کی، واقعے میں کلاشنکوف اور نائن ایم ایم پستول استعمال کی گئی، کچھ شواہد ملے ہیں جن پر تحقیقات ہو رہی ہیں۔
Facebook Comments
بذریعہ فیس بک تبصرہ تحریر کریں